ព័ត៌មានអន្ដរជាតិ

ការវាយប្រហារដ៏សាហាវសម្លាប់មនុស្ស៧នាក់ក្នុងប្រទេសកូឡុំប៊ី

បានផុស

១ year មុន

នៅ

ថ្ងៃពុធ ១១ មិថុនា ២០២៥

ដោយ

យោងតាមការចេញផ្សាយរបស់សារព័ត៌មានBBC នៅថ្ងៃទី១១ខែមិថុនានេះ ប្រទេសកូឡុំប៊ីកំពុងវិលទៅរករលកនៃការវាយប្រហារដោយហិង្សាដែលបានបណ្តាលឱ្យមនុស្សយ៉ាងហោចណាស់មនុស្ស៧នាក់ស្លាប់ និងរាប់សិបនាក់រងរបួសនៅទូទាំងតំបន់ភាគនិរតី រួមទាំងទីក្រុង Cali។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមអ្នកស្លាប់ក៏មានប៉ូលិសពីរនាក់ផងដែរ ដោយការវាយប្រហារទាំងនោះពាក់ព័ន្ធនឹងការបំផ្ទុះរថយន្ត និងម៉ូតូ ការបាញ់កាំភ្លើង រួមទាំងយន្តហោះគ្មានមនុស្សបើកបានវាយប្រហារប៉ុស្តិ៍ប៉ូលិស អគារក្នុងទីក្រុង និងតំបន់ជនស៊ីវិលរស់នៅ។

ក្រសួងការពារជាតិកូឡុំប៊ីបាននិយាយថា មានការវាយប្រហារសរុបចំនួន ១៩ដង ដោយ១២ដងនៅក្នុងតំបន់ Cauca និង ៧ដងនៅតំបន់ Valle del Cauca ។ ក្រសួងបានចោទការវាយប្រហារនេះទៅលើ ក្រុមឧក្រិដ្ឋជនប្រដាប់អាវុធ ដែលប៉ូលិសកំពុងតាមប្រមាញ់។ ក្រុមទាំងនេះត្រូវបានគេរាយការណ៍ថាមិនសប្បាយចិត្ត ដោយសារតែសកម្មភាព និងប្រតិបត្តិការខុសច្បាប់របស់ពួកគេកំពុងត្រូវបានរំខាន។

បើតាមសេចក្តីរាយការណ៍របស់ព័ត៌មានក្នុងស្រុក ក្រុមបំបែកខ្លួនចេញពីអតីតក្រុមឧទ្ទាម FARC ប្រហែលជានៅពីក្រោយការវាយប្រហារនេះ ប៉ុន្តែនេះមិនទាន់មានការបញ្ជាក់ជាផ្លូវការនោះទេ។

ពាក់ព័ន្ធបញ្ហានេះ អភិបាលក្រុង Cali បានប្រដូចអំពើហិង្សាបច្ចុប្បន្នទៅនឹងអំពើហិង្សាកាលពីឆ្នាំ១៩៨៩ ជាពេលដែលក្រុមជួញដូរគ្រឿងញៀនបង្កបញ្ហាជាច្រើននៅក្នុងទីក្រុង ខណៈរលកនៃការវាយប្រហារនាពេលថ្មីៗនេះកើតឡើងតែប៉ុន្មានថ្ងៃបន្ទាប់ពីមានមនុស្សព្យាយាមសម្លាប់បេក្ខជនប្រធានាធិបតីលោក Miguel Uribe Turbay នៅរដ្ឋធានី Bogota។

គួរបញ្ជាក់ថា ការវាយប្រហារថ្មីៗនេះបានបង្ហាញពីការកើនឡើងយ៉ាងខ្លាំងនៃបញ្ហាប្រឈមផ្នែកសន្តិសុខរបស់ប្រទេសកូឡុំប៊ី ដែលបង្ហាញពីការកើតឡើងវិញនៃក្រុមប្រដាប់អាវុធ និងភាពផុយស្រួយនៃកិច្ចខិតខំប្រឹងប្រែងសន្តិភាពនៅក្នុងតំបន់៕