អគ្គិភ័យឆេះហាងលក់សម្ភារៈផ្ទះបាយយ៉ាងសន្ធោសន្ធៅនៅថៃ បង្កការខាតបង់រាប់លានដុល្លារ

អគ្គិភ័យយ៉ាងសន្ធោសន្ធៅ បានឆាបឆេះហាងលក់សម្ភារៈផ្ទះបាយនៅក្រុង Udon Thani ប្រទេសថៃ បង្កការខាតបង់ក្នុងទំហំទឹកប្រាក់រាប់លានដុល្លារ ប៉ុន្តែមិនមានសេចក្តីរាយការណ៍អំពីមនុស្សស្លាប់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Khaosod, អគ្គិភ័យបានឆាបឆេះនាវេលាម៉ោង៩:៣០នាទីយប់ថ្ងៃសុក្រទី១៣ខែមិថុនា ខណៈមូលហេតុមិនត្រូវបានគេដឹងឡើយ ប៉ុន្តែគេសង្ស័យថា ប្រហែលមកពីទុស្សេខ្សែភ្លើង។

ប៉ូលិសបានឲ្យដឹងថា ហាងនេះគឺមានកម្ពស់៣ជាន់ មាន៣ប្លុកលក់គ្រឿងសម្ភារៈផ្ទះបាយនិងគ្រឿងសង្ហារិមផងដែរ ហើយក្រុមពន្លត់អគ្គិភ័យបានប្រើរថយន្តពន្លត់អស់៧គ្រឿង ដើម្បីគ្រប់គ្រងស្ថានការណ៍ក្នុងរយៈពេល១ម៉ោង។

ប៉ូលិសបញ្ជាក់ថា អគ្គិភ័យបានរាលដាលយ៉ាងលឿនពិបាកគ្រប់គ្រងព្រោះក្នុងហាងនោះសុទ្ធតែមានសម្ភារៈងាយឆាបឆេះ ដូចជាជ័រជាដើម៕

អត្ថបទ៖ សុខ សុវណ្ណ