ត្រាំ គំរាមអ៊ីរ៉ង់ ថា បើហ៊ានសងសឹកអាមេរិក នឹងត្រូវខ្លាំងជាងនេះទៀត

ក្រោយបញ្ចប់សុន្ទរកថាទៅកាន់ប្រទេសជាតិនៅថ្ងៃអាទិត្យទី២២ខែមិថុនាឆ្នាំ២០២៥ ប្រមុខសេតវិមាន ដូណាល់ ត្រាំ បានគំរាមទៅអ៊ីរ៉ង់ថា ទីក្រុងតេហេរ៉ង់នឹងត្រូវខ្លាំងជាងនេះទៀត បើពិតជាហ៊ានសងសឹកមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារបង្ហោះលើបណ្តាញសង្គម Truth Social លោកត្រាំសរសេរថា «រាល់ការសងសឹកដោយអ៊ីរ៉ង់ប្រឆាំងសហរដ្ឋអាមេរិក នឹងត្រូវជួបប្រទះកម្លាំងខ្លាំងជាងអ្វីដែលឃើញនៅយប់នេះទៅទៀត»។

យ៉ាងណាការគំរាមរបស់លោកត្រាំនេះ កើតឡើងចំពេលអ៊ីរ៉ង់ បាញ់មីស៊ីលថ្មីទៀត វាយប្រហារអ៊ីស្រាអែល បណ្តាលឲ្យមានមនុស្សរបួសរាប់សិបនាក់ ដ្បិតមិនទាន់សងសឹកអាមេរិកក៏ដោយ។

មុននេះដែរ នៅក្នុងសុន្ទរកថាទៅកាន់ប្រទេសជាតិ លោកត្រាំ បានព្រមានវាយអ៊ីរ៉ង់ជាបន្តទៀតនិងកាន់តែខ្លាំង លុះត្រាតែមានកិច្ចព្រមព្រៀងសន្តិភាព។

លោកនិយាយថា «បើពួកគេមិនព្រម ការវាយប្រហារនៅថ្ងៃមុខនឹងខ្លាំងជាងនេះឆ្ងាយណាស់។ អាចនឹងមានសន្តិភាព ឬនឹងមានសោកនាដកម្មសម្រាប់អ៊ីរ៉ង់ លើសពីអ្វីដែលយើងបានឃើញក្នុងរយៈពេលប្រាំបីថ្ងៃចុងក្រោយនេះទៅទៀត។ ត្រូវចាំថា មានគោលដៅនៅសល់ច្រើនទៀត។ យប់នេះគឺជាយប់លំបាកបំផុត សម្រាប់ពួកគេ ហើយក៏ប្រហែលជាយប់សាហាវបំផុតដែរ។ ​ប៉ុន្តែ​ប្រសិនបើ​រកសន្តិភាព​មិន​បាន​លឿន​ទេនោះ យើង​នឹង​ឆ្ពោះទៅ​កាន់​គោលដៅ​ផ្សេង​ទៀត​ដោយ​ភាពជាក់លាក់ ល្បឿន និង​ជំនាញ​»។

សូមជម្រាបថា លោកត្រាំបានបញ្ជាក់ពីការ វាយប្រហារទីតាំងនុយក្លេអ៊ែរអ៊ីរ៉ង់ចំនួនបីនៅក្នុង «ការវាយប្រហារយ៉ាងជោគជ័យ» ហើយបន្ថែមថា កម្មវិធីនុយក្លេអ៊ែររបស់ទីក្រុង តេហេរ៉ង់ ត្រូវបានកម្ទេចចោលហើយ។

ការសម្រេចចិត្តរបស់លោក ត្រាំ ក្នុងការចូលរួមយុទ្ធនាការយោធារបស់អ៊ីស្រាអែលប្រឆាំងគូសត្រូវដ៏ធំរបស់ខ្លួនគឺអ៊ីរ៉ង់ ធ្វើឲ្យជម្លោះនេះកាន់តែក្តៅគគុក និងរីកធំឡើងៗ៕

អត្ថបទ៖ សុខ សុវណ្ណ

ចុចអាន៖ B-2៖ យន្តហោះទម្លាក់គ្រាប់បែកបំបាំងកាយដ៏អស្ចារ្យរបស់អាមេរិក តម្លៃជាង ២ពាន់លានដុល្លារ