Pattaya ​ជាប់​ចំណាត់លេខមួយមានពេស្យាចារច្រើនជាងគេក្នុងប្រទេសថៃ

ទោះបីជាពេស្យាចារខុសច្បាប់នៅក្នុងប្រទេសថៃក៏ដោយ ក៏ឧស្សាហកម្មនេះនៅតែដក់ជាប់យ៉ាងជ្រៅ និងបន្តរីកចម្រើននៅក្នុងទីក្រុងទេសចរណ៍សំខាន់ៗ។ ក្នុង​ចំណោម​នោះ ទីក្រុងប៉ាតាយ៉ា (Pattaya​) ឈរ​ឈ្មោះ​ជា​កន្លែង​ដែល​មាន​ចំនួន​អ្នក​រកស៊ី​ផ្លូវ​ភេទ​ច្រើន​ជាង​គេ​ក្នុង​ប្រទេសថៃ ដែល​ជា​ញឹក​ញាប់​គេ​ហៅ​ថា​ជា «រាជធានី​ផ្លូវភេទ​របស់​ប្រទេស​ថៃ»។

មានទីតាំងជិះត្រឹមតែពីរម៉ោងពីទីក្រុងបាងកក ទីក្រុងប៉ាតាយ៉ាទាក់ទាញអ្នកទេសចររាប់លាននាក់ក្នុងមួយឆ្នាំៗ ដែលភាគច្រើនទាក់ទាញដោយផ្លូវថ្មើជើងដើរលេងដ៏ល្បីរបស់វា។ លាតសន្ធឹងប្រវែង ៦០០ ម៉ែត្រជាមួយមនុស្សកុះករផ្លូវនេះនេះអមដោយបារ ហាងម៉ាស្សា និងក្លឹបរាត្រី ដែលភាគច្រើនផ្តល់សេវាផ្លូវភេទទាំងបើកចំហ ឬដោយសម្ងាត់។ ជាមួយនឹងកេរ្តិ៍ឈ្មោះដោយសារការកម្សាន្តពេលរាត្រី និងការកម្សាន្តសម្រាប់មនុស្សពេញវ័យ ទិដ្ឋភាពភ្លើងក្រហមរបស់ទីក្រុង​ប៉ាតាយ៉ា មានប្រៀបជាងទីក្រុងបាងកក ទាំងទំហំ និងភាពចម្រុះ។

យោងតាមកាសែត The Sun និងរបាយការណ៍ផ្សេងទៀត ប៉ាតាយ៉ាត្រូវបានគេប៉ាន់ប្រមាណថាមានអ្នករកស៊ីផ្លូវភេទចន្លោះពី ២ម៉ីន៧ពាន់នាក់ ទៅ ៥ ម៉ឺននាក់ដែលធ្វើឱ្យវាក្លាយជាទីក្រុងដែលមានការប្រមូលផ្តុំស្រីពេស្យាច្រើនជាងគេនៅក្នុងប្រទេសថៃ។ តួរលេខនេះរាប់បញ្ចូលទាំងជនជាតិថៃ ជនចំណាកស្រុកខុសច្បាប់ និងកម្មករក្រៅម៉ោងផ្សេងទៀត ដែលជារឿយៗធ្វើប្រតិបត្តិការក្នុងសេដ្ឋកិច្ចក្រៅប្រព័ន្ធ។

ទីក្រុងបាងកក រាជធានីរបស់ប្រទេសថៃ ជាប់ចំណាត់ថ្នាក់ទី ២ ជាមួយនឹងឧស្សាហកម្មកម្សាន្តផ្លូវភេទក្នុងសង្កាត់ភ្លើងក្រហមធំៗចំនួនបីគឺ Soi Cowboy, Nana Plaza, និង Patpong។ នៅក្នុងសង្កាត់ Nana Plazaតែមួយមានបារ និងផ្ទះសំណាក់ជាង ៣០ កន្លែង ខណៈដែល Soi Cowboy គឺជាផ្លូវតូចមួយដែលល្បីល្បាញដោយសារភ្ភ្លើង ពណ៌​ឆើតឆាយនិងសម្បូរក្លឹប។ រីឯ Patpong ដែលធ្លាប់ជាមជ្ឈមណ្ឌលពាណិជ្ជកម្ម ឥឡូវនេះបានបញ្ចូលគ្នានូវទីផ្សាររាត្រីទេសចរណ៍ជាមួយនឹងកម្មវិធីសម្រាប់មនុស្សពេញវ័យ។ ទោះចំនួនអ្នករកស៊ីផ្លូវភេទនៅទីក្រុងបាងកកមិនត្រូវបានចងក្រងជាឯកសារផ្លូវការ ក៏ការប៉ាន់ប្រមាណបង្ហាញថាមនុស្សរាប់ម៉ឺននាក់បម្រើសេវាកម្មផ្លូវភេទទូទាំងកន្លែងកម្សាន្តពេលរាត្រីរបស់ទីក្រុងនេះ។

ចំណែកខេត្ត ភូកេត ជាពិសេសនៅជុំវិញផ្លូវ Bangla របស់ឆ្នេរ Patong ក៏ដើរតួយ៉ាងសំខាន់នៅក្នុងឧស្សាហកម្មផ្លូវភេទរបស់ប្រទេសថៃផងដែរ។ ភាពទាក់ទាញរបស់កោះនេះក្នុងនាមជាគោលដៅទេសចរណ៍វិស្សមកាលឆ្នេរនាំមកនូវការចម្រុះនៃភ្ញៀវទេសចរក្នុងស្រុក និងបរទេស ជាមួយនឹងហាងម៉ាស្សា បារ និងហាងខារ៉ាអូខេមាននារីបម្រើការតាមចំណង់ចំណូលចិត្តជាច្រើន។ ទោះបីជាមានទំហំតូចជាងទីក្រុងប៉ាតាយ៉ា ឬបាងកកក៏ដោយ ប៉ុន្តែទិដ្ឋភាពរបស់ភូកេតគឺសកម្ម និងរួមចំណែកដល់សេដ្ឋកិច្ចជីវិតពេលយប់របស់កោះនេះ។

កន្លែងផ្សេងទៀតរួមមានផ្លូវ Chang Khlan របស់ខេត្ត Chiang Mai និងតំបន់ឆ្នេរ Chaweng របស់កោះ Samui ។ ទីតាំងទាំងនេះ ទោះមិនសូវសកម្មដូចមុន តែវានៅតែមានហាងម៉ាស្សា និងកន្លែងកម្សាន្តជាច្រើន ដែលផ្តល់សេវាផ្លូវភេទមិនផ្លូវការ។

ឧស្សាហកម្មផ្លូវភេទរបស់ប្រទេសថៃនេះត្រូវបានបង្ក្រាបម្ដងម្កាល ក្រោមច្បាប់ការពារ និងបង្ក្រាបអំពើពេស្យាចារឆ្នាំ ១៩៩៦ ប៉ុន្តែនៅតែដំណើរការយ៉ាងទូលំទូលាយ ដោយសារចន្លោះប្រហោង កង្វះការអនុវត្ត និងអំពើពុករលួយរបស់ប៉ូលិសអនុញ្ញាតឱ្យវាបន្តជាមួយនឹងការរំខានតិចតួចបំផុត។

ភាពលេចធ្លោរបស់ទីក្រុងប៉ាតាយ៉ានេះមិនមែនគ្រាន់តែជាតួលេខនោះទេ វាគឺជាការឆ្លុះបញ្ចាំងពីការពឹងផ្អែកផ្នែកសេដ្ឋកិច្ចរបស់ទីក្រុងលើវិស័យទេសចរណ៍ផ្លូវភេទ។ របាយការណ៍បានបង្ហាញថា៧០% នៃសេដ្ឋកិច្ចក្នុងស្រុករបស់ប៉ាតាយ៉ា អាចត្រូវបានផ្សារភ្ជាប់ដោយផ្ទាល់ ឬដោយប្រយោលទៅនឹងឧស្សាហកម្មផ្លូវភេទ។ ទោះបីជាមានការរិះគន់ និងកិច្ចខិតខំប្រឹងប្រែងជាអន្តរជាតិកាន់តែខ្លាំងឡើងដើម្បីកែទម្រង់មុខមាត់របស់ប្រទេសថៃក៏ដោយ ក៏វិស័យកម្សាន្តផ្លូវភេទសម្រាប់មនុស្សពេញវ័យរបស់ប្រទេសនេះនៅតែជាកម្លាំងដ៏មានឥទ្ធិពល ជាពិសេសនៅទីក្រុងប៉ាតាយ៉ា ដែលខ្សែបន្ទាត់រវាងវិស័យទេសចរណ៍ និងការកេងប្រវ័ញ្ច៕

អត្ថបទ៖ ប៊ុន សុភាព