រុស្ស៊ី​ផ្លោង​មីស៊ីល​ដាក់​ក្រុង Dnipro ស្លាប់​១៧​នាក់ មុន​ហ្សេលេនស្គី និង​ត្រាំ ជួប​គ្នា​នៅ​កិច្ច​ប្រជុំ​ណាតូ

មីស៊ីលបាលិស្ទិក​របស់រុស្ស៊ី បានវាយប្រហារទីក្រុង Dnipro របស់​អ៊ុយក្រែន​ កាលពីថ្ងៃទី​២៤​ខែមិថុនា ដោយសម្លាប់​ជនស៊ីវិល ១៧​នាក់ និងជាង ២០០​នាក់ផ្សេងទៀតរងរបួស ប៉ុន្មានម៉ោងមុនពេលប្រធានាធិបតី វ៉ូឡូឌីមៀរ ហ្សេលេនស្គី ជួប​គ្នា​ជាមួយប្រធានាធិបតីអាមេរិក ដូណាល់ ត្រាំ នៅក្រៅកិច្ចប្រជុំកំពូលរបស់អង្គការណាតូ។

ការវាយប្រហារនេះ បាន​កំណត់​គោលដៅ​ជា​ច្រើន​លើ​ទីតាំង​ស៊ីវិល​​នៅ Dnipro ដូចជា សាលារៀន មន្ទីរពេទ្យ និង​រថភ្លើង។ មន្ត្រី​ក្នុង​​តំបន់ ​បាន​បញ្ជាក់​ថា មាន​កុមារ​១៨​នាក់​ស្ថិត​ក្នុង​ចំណោម​អ្នក​រង​របួស ដោយ​មួយ​ចំនួន​​កំពុង​មាន​​​ស្ថានភាព​​​ធ្ងន់ធ្ងរ។

លោក ហ្សេលេនស្គី ដែល​កំពុង​​បង្ហាញ​វត្តមាន​​នៅក្នុងកិច្ចប្រជុំកំពូលរបស់អង្គការណាតូ បាន​ជំរុញ​ឲ្យ​សម្ព័ន្ធមិត្តលោកខាងលិច​ជួយ​ពង្រឹងជាបន្ទាន់នូវការការពារដែនអាកាស​របស់​អ៊ុយក្រែន និងការដាក់ទណ្ឌកម្មកាន់តែខ្លាំង​លើ​រុស្ស៊ី។ លោកក៏បានរំលឹកឡើងវិញនូវក្តីបារម្ភថា បើគ្មានជំនួយបន្ថែមទេ ការឈ្លានពានរបស់រុស្ស៊ីអាច​លោត​ហួសពីអ៊ុយក្រែន ដោយអាចកំណត់គោលដៅសមាជិកណាតូក្នុងរយៈពេលប្រាំឆ្នាំ​ខាង​មុខ។

ជំនួបរវាងលោក ហ្សេលេនស្គី និង​លោក ត្រាំ កើតឡើងចំពេលមានការកើនឡើងនូវភាពមិនប្រាកដប្រជានៅក្នុងគោលនយោបាយរបស់សហរដ្ឋអាមេរិក ជា​ពិសេស​​ជំហរ​មិនអាចទាយទុកជាមុន​​បាន​​របស់​លោក ត្រាំ៕

ដោយ៖ ឈាង