ហេតុអ្វីអាស៊ី គឺជាគោលដៅនៃការយកពន្ធបដិការរបស់លោក ត្រាំ

កាលពីថ្ងៃអង្គារទី៨ខែកក្កដាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានផ្ញើលិខិតទៅប្រទេសចំនួន១៤ បញ្ជាក់ពីការសម្រេចយកពន្ធបដិការដែលនឹងចូលជាធរមាននៅថ្ងៃទី១ខែសីហា។

ប្រទេសកម្ពុជាក៏នឹងត្រូវអាមេរិកយកពន្ធ៣៦%ផងដែរ ប៉ុន្តែអ្វីដែលគេកត់សម្គាល់គឺថា ក្នុងចំណោមប្រទេសទាំង១៤ដំបូងនេះ គឺមានប្រទេសដល់ទៅ៩ទៅហើយ ដែលស្ថិតនៅតំបន់អាស៊ី។

ដូច្នេះ តើហេតុអ្វីបានជាតំបន់អាស៊ីក្លាយជាគោលដៅចម្បងនៅក្នុងបញ្ជីយកពន្ធដំបូងនេះ?

តាមការបញ្ជាក់ពីសេតវិមាន មានចំណុចសំខាន់ចំនួន៥នៅពីក្រោយការសម្រេចចិត្តរបស់លោកត្រាំ៖

១. ឱនភាពពាណិជ្ជកម្មធំធេងជាមួយអាមេរិក

ហេតុផលចម្បងគឺឱនភាពពាណិជ្ជកម្មដ៏ធំដែលសហរដ្ឋអាមេរិកមានជាមួយបណ្តាប្រទេសនៅអាស៊ី។ លោក ត្រាំ តែងជឿថា ច្រើនប្រទេសនៅអាស៊ីជាពិសេសចិន បាននាំចេញទំនិញមកអាមេរិកច្រើនជាងការនាំចូល ដែលបណ្ដាលឲ្យអាមេរិកខាតបង់ការងារ និងឧស្សាហកម្មក្នុងស្រុក។ ការដាក់ពន្ធគយនេះ គឺដើម្បីព្យាយាមកាត់បន្ថយគម្លាតពាណិជ្ជកម្ម។

២. ការអនុវត្តពាណិជ្ជកម្មមិនត្រឹមត្រូវ

លោកត្រាំចោទថា ប្រទេសជាច្រើននៅអាស៊ី បានអនុវត្តសកម្មភាពពាណិជ្ជកម្មដែលមិនត្រឹមត្រូវ ឬមិនយុត្តិធម៌ រួមមាន៖

• ការលួចកម្មសិទ្ធិបញ្ញា៖ ក្រុមហ៊ុនអាមេរិកត្រូវបានបង្ខំឲ្យចែករំលែកបច្ចេកវិទ្យា ឬកម្មសិទ្ធិបញ្ញា។
• ការឧបត្ថម្ភធនពីសំណាក់រដ្ឋ៖ រដ្ឋាភិបាលផ្តល់ជំនួយយ៉ាងច្រើនដល់ឧស្សាហកម្មរបស់ខ្លួន ដើម្បីឲ្យផលិតផលមានតម្លៃទាបជាងទីផ្សារ។
• ការបង្ខំផ្ទេរបច្ចេកវិទ្យា៖ ក្រុមហ៊ុនអាមេរិកដែលចង់ចូលទីផ្សារប្រទេសទាំងនោះ ត្រូវបានបង្ខំឲ្យផ្ទេរបច្ចេកវិទ្យា។
• ការគ្រប់គ្រងតម្លៃរូបិយប័ណ្ណ៖ ប្រទេសខ្លះរក្សាតម្លៃរូបិយប័ណ្ណរបស់ខ្លួនឲ្យនៅទាប ដើម្បីបង្កើនការនាំចេញ។

៣. បញ្ហាខ្សែសង្វាក់ផ្គត់ផ្គង់ និងការបង្វែរទំនិញ

តំបន់អាស៊ីមានទំនាក់ទំនងជិតស្និទ្ធនៅក្នុងខ្សែសង្វាក់ផ្គត់ផ្គង់សកល។ ប្រសិនបើលោក ត្រាំ ដាក់ពន្ធលើប្រទេសតែមួយ ក្រុមហ៊ុនអាចបង្វែរផលិតកម្មទៅប្រទេសជិតខាងដែលមិនជាប់ពន្ធ ដើម្បីគេចវេស។ ឧទាហរណ៍ ប្រសិនបើដាក់ពន្ធតែលើចិន នោះក្រុមហ៊ុនអាចផ្លាស់ប្តូរការផលិតទៅវៀតណាម ថៃ ឬកម្ពុជាវិញ។ ដូច្នេះ ការដាក់ពន្ធលើប្រទេសជាច្រើនក្នុងពេលតែមួយ គឺដើម្បីទប់ស្កាត់បាតុភូតការបង្វែរទំនិញ ដែលជាការបន្លំប្រភពដើមទំនិញដើម្បីគេចពន្ធ។

៤. គោលនយោបាយ «អាមេរិកជាចម្បង»

នេះគឺជាផ្នែកមួយនៃគោលនយោបាយ «អាមេរិកជាចម្បង» ដែលផ្ដោតលើការការពារផលប្រយោជន៍សេដ្ឋកិច្ចជាតិរបស់សហរដ្ឋអាមេរិកជាចម្បង។ លោកជឿថា ការប្រើប្រាស់ពន្ធគយជាឧបករណ៍មួយអាចជួយឲ្យសហរដ្ឋអាមេរិកទទួលបានសម្បទានពីដៃគូពាណិជ្ជកម្ម និងពង្រឹងជំហររបស់ខ្លួន។

៥. ការគ្រប់គ្រងរ៉ែសំខាន់ៗ

ថ្មីៗនេះ លោក ត្រាំ ក៏បានលើកឡើងពីការពឹងផ្អែករបស់អាមេរិកលើចិននិងប្រទេសដទៃទៀតសម្រាប់រ៉ែសំខាន់ៗ ដែលជាវត្ថុធាតុដើមចាំបាច់សម្រាប់ឧស្សាហកម្មបច្ចេកវិទ្យាខ្ពស់។ ការគ្រប់គ្រងរបស់ចិនលើធនធានទាំងនេះ ត្រូវបានគេចាត់ទុកជាបញ្ហាសន្តិសុខជាតិ៕

អត្ថបទ៖ សុខ សុវណ្ណ