អ៊ីស្រាអែល​ យល់ព្រម​​ឲ្យ​​កាតា និង​ប្រទេស​ដទៃ​​ផ្តល់​មូលនិធិ​ដល់​​ហ្គាហ្សា ​ក្រោម​បទ​​ឈប់​បាញ់​ថ្មី

អ៊ីស្រាអែល បានយល់ព្រមអនុញ្ញាត​ឲ្យ​ប្រទេស​កាតា និងដៃគូអន្តរជាតិមួយចំនួនទៀតផ្តល់ហិរញ្ញប្បទានដល់ការកសាងឡើងវិញ​ក្នុង​តំបន់ហ្គាហ្សាស្ទ្រីប ដែលជាផ្នែក​មួយ​នៃកិច្ច​ចរចាបទឈប់បាញ់​ដែល​កំពុង​បន្ត​សំដៅបញ្ចប់ជម្លោះជាច្រើនខែជាមួយក្រុមហាម៉ាស។

ការ​ប្រកាស​នេះ ត្រូវបានគេមើលឃើញថាជា​ជំហាន​ដ៏សំខាន់នៅក្នុងកិច្ចចរចាដែលសម្របសម្រួលដោយអេហ្ស៊ីប សហរដ្ឋអាមេរិក និងអង្គការសហប្រជាជាតិ។ យោងតាមមន្ត្រីអ៊ីស្រាអែល កិច្ចព្រមព្រៀងនេះនឹងអនុញ្ញាត​ឲ្យ​កាតា អេមីរ៉ាតអារ៉ាប់រួម និងបណ្តាប្រទេសអឺរ៉ុបមួយចំនួន ផ្តល់មូលនិធិដោយផ្ទាល់ទៅក្នុងការសាងសង់ឡើងវិញនូវហេដ្ឋារចនាសម្ព័ន្ធស៊ីវិលដែលត្រូវបានបំផ្លាញនៅក្នុងតំបន់ហ្គាហ្សា រួមទាំង ផ្ទះ មន្ទីរពេទ្យ និងសាលារៀន ក្រោមការត្រួតពិនិត្យអន្តរជាតិ។

ប្រភពរបស់អ៊ីស្រាអែលបាននិយាយថា ការធានាសន្តិសុខ និងយន្តការត្រួតពិនិត្យយ៉ាងតឹងរ៉ឹង គឺជាផ្នែកមួយនៃកិច្ចព្រមព្រៀង ដើម្បីធានាថាមូលនិធិមិនត្រូវបានបង្វែរទៅ​ឲ្យ​ក្រុមហាម៉ាស ឬប្រើប្រាស់សម្រាប់ផលិតអាវុធ។ មូលនិធិនេះ នឹងត្រូវបានចែកចាយតាម​ទីភ្នាក់ងារអង្គការសហប្រជាជាតិ និងអ្នកម៉ៅការក្នុងស្រុកដែលត្រូវបានត្រួតពិនិត្យ ដោយអ៊ីស្រាអែលរក្សាការត្រួតពិនិត្យលើមូលដ្ឋាន។

ការសម្រេចចិត្តនេះ កើតឡើងចំពេលមានការកើនឡើងសម្ពាធអន្តរជាតិលើអ៊ីស្រាអែល ក្នុងការបន្ធូរបន្ថយលក្ខខណ្ឌមនុស្សធម៌នៅតំបន់ហ្គាហ្សា និងអនុញ្ញាត​ឲ្យ​មានការស្តារឡើងវិញរយៈពេលវែង បន្ទាប់ពីការវាយប្រហារតាមអាកាស និងប្រតិបត្តិការជើងគោកដ៏បំផ្លិចបំផ្លាញអស់​ជាច្រើនខែ។ សង្គ្រាម​បាន​ធ្វើ​ឲ្យ​មនុស្ស​រាប់​សែន​នាក់​ភៀស​ខ្លួន និង​​កម្ទេច​ហេដ្ឋារចនាសម្ព័ន្ធ​នានា​ឲ្យ​ក្លាយ​ជា​វាល​ល្ហល្ហេវ​​ដ៏​ធំ​ល្វឹងល្វើយ។

មន្ត្រីកាតាបានសម្តែងការត្រៀមខ្លួនដើម្បីចាប់ផ្តើមផ្តល់ជំនួយ«ក្នុងរយៈពេលប៉ុន្មានសប្តាហ៍ខាងមុខ» ដោយរង់ចាំការអនុម័តចុងក្រោយនៃលក្ខខណ្ឌបទឈប់បាញ់។ ផែនការសាងសង់ឡើងវិញ អាចមានតម្លៃ​រាប់រយលានដុល្លារ ក្នុងដំណាក់កាលដំបូង។

កិច្ចព្រមព្រៀងបទឈប់បាញ់​នៅតែស្ថិតក្រោមការចរចា ដោយក្រុមហាម៉ាសរំពឹងថានឹងផ្តល់ការឆ្លើយតបចុងក្រោយទាក់ទងនឹងការដោះលែងចំណាប់ខ្មាំង និងពេលវេលាកំណត់សម្រាប់ការរំសាយអាវុធ។

ក្រសួងការបរទេសសហរដ្ឋអាមេរិកបានសរសើរវិធានការ​នេះ​ថាជា «ជំហានស្ថាបនា និងចាំបាច់ឆ្ពោះទៅរកដំណោះស្រាយយូរអង្វែង» ខណៈពេលដែលជំរុញ​ឲ្យ​ភាគីទាំងអស់​ត្រូវ​ប្តេជ្ញាយ៉ាងពេញលេញចំពោះក្របខ័ណ្ឌសន្តិភាព៕

ដោយ៖ ឈាង