ព្រះសង្ឃ​ជាន់​ខ្ពស់​ថៃពីរអង្គត្រូវចាប់​ផ្សឹក ​ក្រោយ​បែកធ្លាយ​វីដេអូ​រាប់ម៉ឺនរួមរ័កជាមួយស្រី

យោងតាមការចេញផ្សាយរបស់កាសែត Bangkok Post នៅថ្ងៃទី១០ ខែ កក្កដា ព្រះសង្ឃជាន់ខ្ពស់ថៃពីរអង្គត្រូវបានចាប់ផ្សឹក បន្ទាប់ពីប៉ូលិសថៃរកឃើញវីដេអូ និងរូបភាពជាង ៨ម៉ឺន បង្ហាញពីសម្ព័ន្ធភាពផ្លូវភេទរវាងស្ត្រីម្នាក់ និងព្រះសង្ឃជាន់ខ្ពស់មកពីវត្តល្បីៗក្នុងទីក្រុងបាងកក និងខេត្តផ្សេងទៀត។

រឿងអាស្រូវផ្លូវភេទនេះត្រូវបានលាតត្រដាង បន្ទាប់ពីមន្ត្រីនគរបាលនាយកដ្ឋានប្រឆាំងអំពើពុករលួយ (ACD) ថៃ បានរកឃើញរូបភាព និងវីដេអូជាង៨ម៉ឺន ពីទូរស័ព្ទដៃចំនួន ៥ គ្រឿងដែលជាកម្មសិទ្ធិរបស់ស្ត្រីម្នាក់ ត្រូវបានគេស្គាល់ថា «Sika Kor» ក្នុងអំឡុងពេលឆែកឆេរផ្ទះរបស់នាងកាលពីថ្ងៃទី ០៤ ខែកក្កដា។

រូបភាពនិងវីដេអូទាំងនោះបានបង្ហាញពីទំនាក់ទំនងផ្លូវភេទ ភាពស្និតស្នាល និងការរួមភេទ រវាងនាង និងព្រះសង្ឃជាន់ខ្ពស់នៅវត្តល្បីៗរបស់ប្រទេសថៃ។ រហូត​មក​ដល់​ពេល​នេះ អាជ្ញាធរ​ថៃបាន​កំណត់​អត្តសញ្ញាណ​ព្រះសង្ឃ​ដែលពាក់ព័ន្ធចំនួន ៨អង្គ។

ក្រោយការបែកធ្លាយនេះ ប៉ូលិសបានទៅឆែកឆេរទីតាំងវត្តជាច្រើន ដោយដំបូងប៉ូលិសបានទៅវត្ត Paknam Phasi Charoen ក្នុងទីក្រុងបាងកក ប៉ុន្តែ​ព្រះ​ដែលជាជំនួយការចៅអធិការវត្តបានចាកចេញពីវត្តធ្វើដំណើរទៅកាន់ខេត្ត ឈៀងម៉ៃបាត់។ ក្រោយមកប៉ូលិសបានរកឃើញព្រះសង្ឃអង្គនេះនៅស្រុក Mae Taeng ខេត្ត ឈៀងម៉ៃ។

បន្ទាប់​មកនៅថ្ងៃពុធ ប៉ូលិស​បាន​ទៅវត្ត Sothon Wararam Worawihan ក្នុងខេត្ត Chachoengsao ប៉ុន្តែ​ជំនួយការព្រះចៅអធិការ​វត្ត​នៅ​ទីនោះ​ក៏​បាត់​ដែរ ដោយបាត់ទៅជាមួយរថយន្ត ទើប​ប៉ូលិស​ចាប់ផ្តើម​ស្វែងរក​។

នៅ​រសៀល​ថ្ងៃ​ដដែល ប៉ូលិស​ក៏បាន​រក​ឃើញ​ព្រះ​ចៅ​អធិការវត្ត Phra Phutthachai ក្នុង​ខេត្ត Saraburi មួយអង្គទៀតលាក់​ខ្លួន​ក្នុង​ខេត្ត Samut Prakan។

មកដល់ពេលនេះមានព្រះសង្ឃពីរអង្គហើយដែលជាប់ពាក់ព័ន្ធត្រូវបានរកឃើញ។ ក្រោយ​ពី​ប៉ូលិសបង្ហាញ​វីដេអូ និង​រូបភាពដែលបង្ហាញ​ពី​ការ​រួមភេទ​ជាមួយ​ស្ត្រី​នោះ ព្រះសង្ឃទាំងពីរ​អង្គក៏​យល់ព្រមសឹក។

គួរបញ្ជាក់ថារឿងអាស្រូវផ្លូវភេទរបស់ព្រះអង្គនេះបានធ្វើឱ្យមនុស្សជាច្រើននៅក្នុងប្រទេសថៃមានការភ្ញាក់ផ្អើល និងបានលើកឡើងពីការព្រួយបារម្ភយ៉ាងខ្លាំងអំពីអាកប្បកិរិយាមិនល្អក្នុងចំណោមព្រះសង្ឃជាន់ខ្ពស់ដែលធ្លាប់គួរឲ្យគោរពរបស់ប្រទេសថៃ៕

អត្ថបទ៖ ប៊ុន សុភាព