ព័ត៌មានអន្ដរជាតិ

ហ្សេលេនស្គី ដាក់គម្រោង៦ខែ ចង់ឲ្យពាក់កណ្ដាលនៃអាវុធអ៊ុយក្រែនជាផលិតផលក្នុងស្រុក

បានផុស

១២ ខែ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

Chheang

លោកប្រធានាធិបតី វ៉ូឡូឌីមៀរ ហ្សេលេនស្គី បានប្រាប់កាលពីថ្ងៃពុធទី១៦ខែកក្កដាថា ប្រហែល ៤០% នៃសព្វាវុធដែលប្រើប្រាស់ដោយកងកម្លាំងអ៊ុយក្រែនបច្ចុប្បន្ន គឺជាផលិតផលក្នុងស្រុក ហើយលោកបានកំណត់គោលដៅយ៉ាងម៉ឺងម៉ាត់ក្នុងការបង្កើនចំណែកនោះឲ្យដល់ ៥០% ក្នុងរយៈពេល៦ខែខាងមុខ។

លោក វ៉ូឡូឌីមៀរ ហ្សេលេនស្គី (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បាននិយាយថា «សព្វាវុធផលិតដោយអ៊ុយក្រែនឥឡូវនេះមានប្រហែល ៤០% នៃអាវុធដែលបានប្រើនៅជួរមុខ និងក្នុងប្រតិបត្តិការរបស់យើង។ នេះគឺច្រើនជាងពេលណាណាទាំងអស់ក្នុងឯករាជ្យភាពរបស់ប្រទេសយើងរួចទៅហើយ។ បរិមាណផលិតកម្មពិតជាធំ ប៉ុន្តែយើងត្រូវការបន្ថែមទៀត។ គោលដៅរបស់យើងគឺឈានដល់ ៥០% នៃសព្វាវុធដែលផលិតដោយអ៊ុយក្រែន ក្នុងរយៈពេល ៦ខែទៀត…។ ខ្ញុំជឿជាក់ថា នេះអាចសម្រេចបាន ទោះបីជាមិនងាយស្រួលក៏ដោយ»។

បន្ថែមពីនេះ មេដឹកនាំអ៊ុយក្រែន បានសង្កត់ធ្ងន់លើការពង្រីកផលិតកម្មយន្តហោះគ្មានមនុស្សបើក និងប្រព័ន្ធការពារដែនអាកាស រួមទាំងការវិនិយោគថ្មីៗចំនួន ៦,២លានដុល្លារនៅក្នុងកម្មវិធីស្ទាក់ចាប់យន្តហោះគ្មានមនុស្សបើក ដើម្បីការពាររដ្ឋធានីកៀវ។

សូមបញ្ជាក់ថា គំនិតផ្ដួចផ្ដើមនេះ ធ្វើឡើងបន្ទាប់ពីលោក ហ្សេលេនស្គី ប្រកាសផ្ដាស់ប្ដូរមុខតំណែងប្រមុខរដ្ឋាភិបាលអ៊ុយក្រែនសំខាន់ៗ ដោយក្នុងនោះ នាយករដ្ឋមន្ត្រី Denys Shmyhal ត្រូវផ្លាស់ទៅកាន់តួនាទីជារដ្ឋមន្ត្រីការពារជាតិ ខណៈឧបនាយករដ្ឋមន្ត្រីទីមួយ និងជារដ្ឋមន្ត្រីសេដ្ឋកិច្ច លោកស្រី Yulia Svyrydenko នឹងទទួលមុខតំណែងជានាយករដ្ឋមន្ត្រីជំនួសវិញ។ ដោយឡែក លោក Rustem Umerov ដែលជារដ្ឋមន្ត្រីការពារជាតិ បើតាមសេចក្ដីរាយការណ៍ ត្រូវប្ដូរជាឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិក៕