ព័ត៌មានអន្ដរជាតិ

ហ្សេលេនស្គី ចាប់ផ្ដើមរុះរើរដ្ឋាភិបាលទ្រង់ទ្រាយធំ តែងតាំងនាយករដ្ឋមន្ត្រីធ្វើជារដ្ឋមន្ត្រីការពារជាតិវិញ

បានផុស

១២ ខែ មុន

នៅ

ថ្ងៃអង្គារ ១៥ កក្កដា ២០២៥

ដោយ

Chheang

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានប្រកាសរុះរើរដ្ឋាភិបាលទ្រង់ទ្រាយធំមួយ ដោយក្នុងនោះមានការផ្លាស់ប្តូរនាយករដ្ឋមន្ត្រីបច្ចុប្បន្ន លោក Denys Shmyhal ទៅកាន់តំណែងជារដ្ឋមន្ត្រីការពារជាតិ។

លោក វ៉ូឡូឌីមៀរ ហ្សេលេនស្គី (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តដែលត្រូវបានប្រកាសនៅថ្ងៃទី១៤ខែកក្កដា គឺជាផ្នែកមួយនៃអ្វីដែលលោក ហ្សេលេនស្គី ហៅថាជាការចាប់ផ្ដើមថ្មីឡើងវិញនៃថ្នាក់ដឹកនាំរបស់អ៊ុយក្រែន ដើម្បីឆ្លើយតបទៅនឹងសង្រ្គាមដែលកំពុងបន្តជាមួយរុស្ស៊ី។

នៅក្នុងសុន្ទរកថាថ្នាក់ជាតិ លោក ហ្សេលេនស្គី បាននិយាយថា Shmyhal នឹងនាំមកនូវ«បទពិសោធន៍អតិបរមា» និង«ប្រសិទ្ធភាពអតិបរមា» ដល់តួនាទីការពារជាតិ ក្នុងអំឡុងពេលនៃការកើនឡើងសម្ពាធលើយោធាអ៊ុយក្រែន។ ដោយឡែក លោក Rustem Umerov ដែលជារដ្ឋមន្ត្រីការពារជាតិបច្ចុប្បន្ន នឹងត្រូវផ្ទេរទៅកាន់តំណែងជាឯកអគ្គរដ្ឋទូតអ៊ុយក្រែនប្រចាំសហរដ្ឋអាមេរិក។

ការផ្លាស់ប្តូរនេះ កើតឡើងនៅពេលដែលអ៊ុយក្រែនជំរុញឲ្យមានការបង្កើនផលិតកម្មអាវុធក្នុងស្រុក ពង្រឹងផ្នែកដឹកជញ្ជូនសមរភូមិ និងសម្របសម្រួលឲ្យកាន់តែជិតស្និទ្ធជាមួយសម្ព័ន្ធមិត្តអន្តរជាតិ។

ចំណែកឯតំណែងជានាយករដ្ឋមន្ត្រីអ៊ុយក្រែនថ្មី នឹងត្រូវធ្លាក់ទៅលើលោកស្រី Yulia Svyrydenko ដែលបច្ចុប្បន្នជាឧបនាយករដ្ឋមន្ត្រីទីមួយ និងជារដ្ឋមន្ត្រីសេដ្ឋកិច្ច។ នៅវ័យត្រឹមតែ៣៩ឆ្នាំ លោកស្រី Svyrydenko ត្រូវបានគេទទួលស្គាល់តាមរយៈការងារនៅក្នុងគោលនយោបាយសេដ្ឋកិច្ច និងសម្រាប់តួនាទីសំខាន់ក្នុងការធានាជំនួយហិរញ្ញវត្ថុបរទេស ជាពិសេសពីសហរដ្ឋអាមេរិក។

លោក ហ្សេលេនស្គី បានសរសើរសមត្ថភាពរបស់លោកស្រី Svyrydenko ក្នុងការគ្រប់គ្រងការងើបឡើងវិញនៃសេដ្ឋកិច្ចអ៊ុយក្រែន និងធានានូវប្រព័ន្ធគាំទ្រដែលមានស្ថិរភាពសម្រាប់ទាំងជនស៊ីវិល និងយោធាក្នុងអំឡុងពេលសង្រ្គាម។ ការតែងតាំងនេះ នឹងត្រូវសុំការអនុម័តពីសភាអ៊ុយក្រែន ប៉ុន្តែត្រូវបានគេរំពឹងថានឹងដំណើរការទៅមុខយ៉ាងរលូនដោយគ្មានការប្រឆាំងធំដុំអ្វីឡើយ។

សូមជម្រាបថា នេះគឺជាការរុះរើនយោបាយដ៏សំខាន់បំផុត គិតចាប់តាំងពីការឈ្លានពានពេញទំហឹងរបស់រុស្ស៊ីកាលពីខែកុម្ភៈឆ្នាំ២០២២៕