ព័ត៌មានអន្ដរជាតិ

អគ្គលេខាធិការ UN ជំរុញកម្ពុជានិងថៃអត់ធ្មត់ជា អតិបរិមា និងដោះស្រាយតាមការសន្ទនា

បានផុស

៤ ខែ មុន

នៅ

ថ្ងៃសុក្រ ២៥ កក្កដា ២០២៥

ដោយ

ប្រមុខអង្គការសហប្រជាជាតិ លោក Antonio Guterres បានជំរុញឲ្យប្រទេសថៃ និងកម្ពុជា អនុវត្តការអត់ធ្មត់ជាអតិបរមា និងត្រូវដោះស្រាយតាមរយការសន្ទនា ក្នុងជម្លោះប្រដាប់អាវុធដែលបានកើតឡើងកាលពីព្រឹកថ្ងៃព្រហស្បតិ៍ដែលបង្កឡើងដោយភាគីថៃវាយប្រហារមុនមកលើកងទ័ពកម្ពុជា។

ប្រមុខអង្គការសហប្រជាជាតិ លោក Antonio Guterres។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានប្រចាំថ្ងៃនៅឯអង្គការសហប្រជាជាតិ លោក Farhan Haq អ្នកនាំពាក្យរងរបស់ប្រធានអង្គការសហប្រជាជាតិ បាននិយាយនៅថា «អគ្គលេខាធិការកំពុងតាមដានរបាយការណ៍ពាក់ព័ន្ធអំពីការប៉ះទង្គិចគ្នាដោយអាវុធនៅព្រំដែនរវាងកម្ពុជា-ថៃ។ អគ្គលេខាធិការជំរុញឲ្យភាគីទាំងពីរអនុវត្តការអត់ធ្មត់់ឲ្យដល់កម្រិតអតិបរិមា និងដោះស្រាយបញ្ហានិមួយៗតាមរយៈការសន្ទនា និងស្មារតីអ្នកជិតខាងល្អ ជាមួយទស្សនស្វែងរកដំណោះស្រាយឲ្យដល់ទីបញ្ចប់ចំពោះជម្លោះនោះ»។

ប្រទេសកម្ពុជាបានប្រកាន់ជំហរគោរពច្បាប់អន្តរជាតិក្នុងជម្លោះដែលកើតមាន ដោយបានស្នើភាគីថៃនាំយកករណីជម្លោះនេះទៅកាន់តុលាការយុត្តិធម៌អន្តរជាតិ (ICJ) ប៉ុន្តែភាគីថៃ ដែលមានរដ្ឋាភិបាលមិនរឹងមាំ បានច្រានចោលសំណើរកម្ពុជា ហើយ យោធាថៃបានបង្កហេតុជាប់ជាប្រចាំ រហូតដល់មានការផ្ទុះអាវុធនៅព្រឹកថ្ងៃទី២៤ខែកក្កដា២០២៥។

យោងតាមការបញ្ជាក់របស់អ្នកនាំពាក្យក្រសួងការពារជាតិ ក្នុងជម្លោះប្រដាប់អាវុធនេះ ភាគីថៃបានបើកការវាយប្រហារតាមបណ្តោយព្រំដែន ចាប់ពីតំបន់ប្រាសាទតាមាន់ធំរហូតដល់តំបន់មុំបី។

ក្រោយផ្ទុះអាវុធភ្លាមៗ សម្តេចធិបតី លោកនាយករដ្ឋមន្ត្រី ហ៊ុន ម៉ាណែត បានបញ្ជាដាក់ពាក្យបណ្តឹងទៅកាន់ក្រុមប្រឹក្សាសន្តិសុខអង្គការសហប្រជាជាតិ ដែលតាមការគ្រោងទុកនឹងត្រូវកោះប្រជុំបន្ទាន់មួយដើម្បីពិភាក្សាពីបញ្ហានេះ នៅថ្ងៃសុក្រនេះ៕