ម៉ាឡេស៊ី ដាក់ផ្កាយរណប តាមដានបទឈប់បាញ់ កម្ពុជា-ថៃ

តាមការចុះផ្សាយរបស់សារព័ត៌មាន Bernama, នាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម បញ្ជាក់ថា ម៉ាឡេស៊ី បានដាក់ផ្កាយរណបរួចហើយ ដើម្បីតាមដានមើលបទឈប់បាញ់រវាងកម្ពុជានិងថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅថ្ងៃអង្គារទី៥ខែសីហាឆ្នាំ២០២៥ លោកអាន់វ៉ា អ៊ីប្រាហ៊ីម និយាយថា «មកទល់ពេលនេះ យើងបានដាក់ផ្កាយរណបរួចហើយ ហើយភាគីទាំងពីរក៏ឯកភាពដែរថា អនុព័ន្ធយោធាម៉ាឡេស៊ីនិងអាស៊ាន នឹងជួយសម្របសម្រួលសម្រាប់ការឃ្លាំងមើលពីសម្ងាយ»។

យ៉ាងណាក្តី តាមការបញ្ជាក់របស់លោក, នៅដំណាក់កាលនេះ វាដូចជាលឿនពេកហើយ ដែលត្រូវបង្កើតក្របខ័ណ្ឌសន្តិសុខក្នុងតំបន់ជាផ្លូវការ ក្រោមយន្តការដូចជាវេទិកាតំបន់អាស៊ាន ឬគំនិតផ្តួចផ្តើមសន្តិសុខផ្សេងទៀត។

សូមជម្រាបជាថ្មី ក្នុងនាមជាប្រធានអាស៊ានឆ្នាំ២០២៥ ម៉ាឡេស៊ី បានដើរតួនាទីដ៏សំខាន់ នាំឲ្យមានបទឈប់បាញ់ភ្លាមៗដោយឥតលក្ខខណ្ឌរវាងកម្ពុជានិងថៃ កាលពីថ្ងៃទី២៨ខែកក្កដាឆ្នាំ២០២៥។

ក្នុងកិច្ចប្រជុំនៅទីក្រុង Putrajaya ពេលនោះដែរ សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីកម្ពុជា និងនាយករដ្ឋមន្ត្រីស្តីទីថៃ Phumtham Wechayachai បានឯកភាពគ្នារៀបចំកិច្ចប្រជុំគណៈកម្មាធិការកិច្ចការព្រំដែនទូទៅ (GBC) ដែលជាផ្នែកមួយនៃកិច្ចព្រមព្រៀងឈប់បាញ់នេះ។

កិច្ចប្រជុំ GBC ចាប់ផ្តើមកាលពីថ្ងៃទី៤ខែសីហា ហើយនឹងបញ្ចប់ទៅនៅថ្ងៃទី៧ខែសីហា ដោយមានការចូលរួមពីសំណាក់ មន្ត្រីការពារជាតិជាន់ខ្ពស់នៃប្រទេសទាំងពីរ៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ប្រកាសចូលរួមកិច្ចប្រជុំ GBC រវាងកម្ពុជានិងថៃ