ព័ត៌មានអន្ដរជាតិ

អង់គ្លេស៖ ផែនការដណ្ដើមយកហ្គាហ្សាទាំងមូលរបស់ ណេតាន់យ៉ាហ៊ូ មិនអាចបញ្ចប់ជម្លោះទេ មានតែការបង្ហូរឈាមខ្លាំងជាងមុន

បានផុស

៩ ខែ មុន

នៅ

ថ្ងៃសុក្រ ៨ សីហា ២០២៥

ដោយ

Chheang

នាយករដ្ឋមន្ត្រីអង់គ្លេស លោក Keir Starmer បានរិះគន់យ៉ាងខ្លាំងទៅលើការសម្រេចចិត្តរបស់អ៊ីស្រាអែល ក្នុងការបង្កើនការវាយលុកយោធារបស់ខ្លួននៅក្នុងតំបន់ហ្គាហ្សា ដោយហៅទង្វើនេះថា «ខុស» និងទាមទារឲ្យរដ្ឋាភិបាលរបស់លោក បេនចាមីន ណេតាន់យ៉ាហ៊ូ ពិចារណាឡើងវិញជាបន្ទាន់។

នៅក្នុងសេចក្តីថ្លែងការណ៍នាថ្ងៃសុក្រទី៨ខែសីហាឆ្នាំ២០២៥នេះ លោក Starmer បានព្រមានថា គម្រោងវាយដណ្ដើមយកហ្គាហ្សាទាំងមូល នឹងធ្វើឲ្យជម្លោះកាន់តែអូសបន្លាយ បង្កការឈឺចាប់កាន់តែអាក្រក់ដល់ស៊ីវិល និងរារាំងកិច្ចខិតខំប្រឹងប្រែងដើម្បីដោះលែងចំណាប់ខ្មាំងដែលកំពុងស្ថិតក្រោមកណ្ដាប់ដៃក្រុមហាម៉ាស។

លោក Starmer បានរៀបរាប់ថា «សកម្មភាពនេះ នឹងមិនជួយបញ្ចប់ជម្លោះនេះ ឬជួយធានាឲ្យមានការដោះលែងចំណាប់ខ្មាំងនោះឡើយ។ វានឹងនាំមកនូវការបង្ហូរឈាមកាន់តែច្រើន។ អ្វីដែលយើងត្រូវការ គឺបទឈប់បាញ់ ការកើនឡើងនៃជំនួយមនុស្សធម៌ ការដោះលែងចំណាប់ខ្មាំងទាំងអស់ដោយក្រុមហាម៉ាស និងដំណោះស្រាយចរចា»។

សូមជម្រាបថា នៅថ្ងៃសុក្រនេះ គណៈរដ្ឋមន្ត្រីសន្តិសុខរបស់អ៊ីស្រាអែល បានអនុម័តផែនការដណ្តើមកាន់កាប់តំបន់ហ្គាហ្សាទាំងមូល។ ការគ្រប់គ្រងហ្គាហ្សាទាំងស្រុង នឹងផ្ទុយពីការសម្រេចចិត្តឆ្នាំ២០០៥របស់អ៊ីស្រាអែល ដែលខ្លួនបានដកពលរដ្ឋនិងទាហានចេញពីទឹកដីនេះ ប៉ុន្តែរក្សាការគ្រប់គ្រងលើព្រំដែន ដែនអាកាស និងឧបករណ៍ប្រើប្រាស់។

យោងតាមតួលេខចុងក្រោយពីក្រសួងសុខាភិបាលប៉ាឡេស្ទីននៅហ្គាហ្សា គិតចាប់តាំងពីថ្ងៃទី ៧ ខែតុលា ឆ្នាំ ២០២៣ មក សង្គ្រាមហ្គាហ្សា បានផ្តាច់ជីវិតមនុស្សចំនួន៦១ ១៥៨នាក់ និងរបួស១៥១ ៤៤២នាក់៕