ម៉ាឡេស៊ី បង់ក្លាដែស និងអាស៊ាន ចាប់ផ្តើមបេសកកម្មសន្តិភាព និងជំនួយដល់មីយ៉ាន់ម៉ា

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានប្រកាសនៅថ្ងៃអង្គារថា ប្រទេសម៉ាឡេស៊ី បង់ក្លាដែស និងដៃគូអាស៊ីអាគ្នេយ៍មួយចំនួននឹងបញ្ជូនបេសកកម្មរួមគ្នាមួយទៅកាន់ប្រទេសមីយ៉ាន់ម៉ាក្នុងប៉ុន្មានសប្តាហ៍ខាងមុខនេះ ដើម្បីលើកកម្ពស់សន្តិភាព និងការផ្តល់ជំនួយមនុស្សធម៌ដល់ជនភៀសខ្លួនរ៉ូហ៊ីងយ៉ា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១២ខែសីហា។​

គំនិតផ្តួចផ្តើមនេះ សម្របសម្រួលដោយរដ្ឋមន្ត្រីការបរទេសម៉ាឡេស៊ី ជាមួយសមភាគីឥណ្ឌូនេស៊ី ហ្វីលីពីន និងថៃ មានគោលបំណងដោះស្រាយជម្លោះដែលកំពុងបន្ត និងជួយជនរងគ្រោះ រួមទាំងអ្នកដែលរងផលប៉ះពាល់ដោយការរញ្ជួយដីនាពេលថ្មីៗនេះផងដែរ។

បច្ចុប្បន្នបង់ក្លាដែសជាម្ចាស់ផ្ទះជនជាតិរ៉ូហ៊ីងយ៉ាជាង ១ លាននាក់នៅក្នុងទីក្រុង Cox’s Bazar ដោយអង្គការសហប្រជាជាតិបានរាយការណ៍ថាមនុស្ស ១៥០,០០០ នាក់ទៀតបានភៀសខ្លួនចេញពីរដ្ឋ Rakhine របស់មីយ៉ាន់ម៉ាក្នុងរយៈពេល ១៨ ខែកន្លងមកដោយសារអំពើហិង្សា។

ក្នុងដំណើរទស្សនកិច្ចទៅម៉ាឡេស៊ីរបស់មេដឹកនាំបណ្តោះអាសន្នរបស់ប្រទេសបង់ក្លាដែស ម្ចាស់ពានរង្វាន់ណូបែលលោក Muhammad Yunus ម៉ាឡេស៊ី និងបង់ក្លាដែសក៏បានចុះហត្ថលេខាលើកិច្ចព្រមព្រៀងចំនួនប្រាំស្តីពីកិច្ចសហប្រតិបត្តិការការពារជាតិ និងហេដ្ឋារចនាសម្ព័ន្ធថាមពល រួមទាំងគម្រោង LNG និងប្រេង៕

អត្ថបទ៖ ប៊ុន សុភាព