Orban ច្រានចោល​សេចក្ដីថ្លែងការណ៍​រួម​ស្ដីពីអ៊ុយក្រែន ហើយ​ជំរុញ​ឲ្យ​មានកិច្ចប្រជុំ EU-រុស្ស៊ី

នាយករដ្ឋមន្ត្រីហុងគ្រី លោក Viktor Orban កាលពីថ្ងៃអង្គារ​ទី​១២​ខែ​សីហា​ឆ្នាំ​២០២៥បានច្រានចោលសេចក្តីថ្លែងការណ៍​រួម​របស់សហភាពអឺរ៉ុប (EU) ស្តីពីអ៊ុយក្រែន ដោយបានអំពាវនាវ​ឲ្យ​មាន​ការចរចាសន្តិភាពរវាង EU-រុស្ស៊ី​ជំនួស​វិញ ជាជាងកំណត់លក្ខខណ្ឌសម្រាប់ការពិភាក្សា​ជាមួយ​ក្រុម​មេដឹកនាំអឺរ៉ុបដែល​មិនមានកៅអីនៅតុ​ចរចា។

ហុងគ្រី គឺជាសមាជិកសហភាពអឺរ៉ុបតែមួយគត់ ដែលបដិសេធមិនគាំទ្រសេចក្តីថ្លែងការណ៍រួម​របស់​ក្រុម​​​ប្រទេស​ទាំង​២៦ ដែលគាំទ្រកិច្ចខិតខំប្រឹងប្រែងរបស់ប្រធានាធិបតីអាមេរិក ដូណាល់ ត្រាំ ក្នុងការសម្រុះសម្រួលបទឈប់បាញ់អ៊ុយក្រែន នៅមុនកិច្ចប្រជុំកំពូលអាឡាស្កាដែលបានគ្រោងទុកជាមួយមេដឹកនាំរុស្ស៊ីលោក វ្ល៉ាឌីមៀរ ពូទីន។

លោក Orban បាននិយាយនៅលើប្រព័ន្ធផ្សព្វផ្សាយសង្គមថា «សេចក្តីថ្លែងការណ៍​ព្យាយាមកំណត់លក្ខខណ្ឌសម្រាប់កិច្ចពិភាក្សាទាំង​ដែលមេដឹកនាំសហភាពអឺរ៉ុបមិនត្រូវបានអញ្ជើញ។ វា​អាក្រក់​មើលណាស់​​ដែល​អឺរ៉ុប​ត្រូវ​បាន​គេ​ទុក​ចោល»។

លោក​បាន​បន្ថែម​​ថា EU ​គួរ​ធ្វើ​តាម​គំរូ​របស់​សហរដ្ឋ​អាមេរិក ហើយ​រៀបចំ​កិច្ចប្រជុំ​កំពូល​របស់​ខ្លួន​ជាមួយ​ក្រុង​មូស្គូ។

សេចក្តីថ្លែងការណ៍របស់ EU ដែលចេញដោយក្រុមប្រឹក្សាអឺរ៉ុប បានសង្កត់ធ្ងន់ថា កិច្ចព្រមព្រៀងសន្តិភាពណាមួយត្រូវតែគោរពច្បាប់អន្តរជាតិ អធិបតេយ្យភាព និងបូរណភាពទឹកដីរបស់អ៊ុយក្រែន ខណៈពេលដែលសន្យាបន្តការគាំទ្រផ្នែកយោធា សេដ្ឋកិច្ច និងការទូតសម្រាប់ទីក្រុងកៀវ។

លោក ត្រាំ និង​លោក ពូទីន គ្រោងនឹងជួប​គ្នា​នៅថ្ងៃសុក្រ​សប្ដាហ៍​នេះ​ ហើយ​វា​ជា​កិច្ចចរចាផ្ទាល់លើកដំបូងរបស់ពួកគេចាប់តាំងពីឆ្នាំ​២០២១ ដោយផ្តោតលើបទឈប់បាញ់ដ៏មានសក្តានុពល និងទំនាក់ទំនងទ្វេភាគី ទោះបីជាអ៊ុយក្រែន និងសហភាពអឺរ៉ុបមិនត្រូវបានអញ្ជើញក៏ដោយ។ កិច្ចប្រជុំកំពូលនេះ បានធ្វើ​ឲ្យ​មានការព្រួយបារម្ភ​សម្រាប់​ទីក្រុង​កៀវ ដោយ​ហេតុ​​ថា កិច្ចព្រមព្រៀងណាមួយអាចដាក់សម្ពាធអ៊ុយក្រែន​ឲ្យ​ទទួល​យក​ការ​សម្បទានទឹកដី​ឲ្យ​រុស្ស៊ី។

Orban ដែលត្រូវបានរិះគន់ជាយូរមកហើយចំពោះជំហរមិត្តភាព​ជាមួយ​រុស្ស៊ីរបស់គាត់ បានអំពាវនាវម្តងហើយម្តងទៀត​ឲ្យ​មានការចរចាបទឈប់បាញ់ ជាជាងសង្គ្រាមអូសបន្លាយ។ ការជំរុញចុងក្រោយរបស់គាត់សម្រាប់កិច្ចប្រជុំកំពូល EU-រុស្ស៊ី បង្ហាញពីការបែកបាក់កាន់តែស៊ីជម្រៅនៅក្នុងប្លុក អំពីរបៀបដើម្បីដោះស្រាយ​ជម្លោះ៕

ដោយ៖ ឈាង