ម៉ាឡេស៊ី ត្រៀមបញ្ជូនក្រុម ចូលរួមជាមួយ AOT មកពិនិត្យតំបន់ជម្លោះកម្ពុជា-ថៃ ខណៈអាមេរិក ក៏គាំទ្រ

ប្រទេសម៉ាឡេស៊ីបានប្រកាសពីការត្រៀមលក្ខណៈបញ្ជូនក្រុម ដើម្បីចូលរួមជាមួយក្រុមសង្កេតការណ៍អាស៊ាន (AOT) មកពិនិត្យមើលតំបន់ជម្លោះកម្ពុជា-ថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន Bernama នៅថ្ងៃព្រហស្បតិ៍ទី១៤ខែសីហាឆ្នាំ២០២៥, មេទ័ពម៉ាឡេស៊ីលោក Mohd Nizam Jaffar បានដាក់សំណើរួចហើយទៅនាយករដ្ឋមន្ត្រី អាន់វ៉ា អ៊ីប្រាហ៊ីម ដោយសុំឲ្យគាត់ទាក់ទងទៅមេដឹកនាំថៃនិងកម្ពុជាជាផ្លូវការ ដើម្បីបើកភ្លើងបៃតងឲ្យក្រុមម៉ាឡេស៊ី បានចូលរួមជាមួយ AOT មកពិនិត្យក្នុងតំបន់ជម្លោះជម្លោះនៃប្រទេសទាំងពីរ។

លោក Jaffar និយាយក្នុងទីក្រុង Putrajaya ថា «AOT មានតំណាងមកពីរដ្ឋជាសមាជិកអាស៊ាន ហើយនឹងត្រូវបានដាក់ពង្រាយជាបន្តបន្ទាប់ ដើម្បីធានានិងត្រួតពិនិត្យថា គ្មានការរំលោភលើកិច្ចព្រមព្រៀងឈប់បាញ់នោះទេ។ នេះគឺជាកិច្ចការដ៏ធំមួយ ពីព្រោះ មានព្រំដែនប្រហែល ៨៤០គីឡូម៉ែត្រ ដែលត្រូវពិនិត្យ។ សម្រាប់កិច្ចការនេះ យើងក៏កំពុងទទួលបានការគាំទ្រផ្នែកដឹកជញ្ជូនពីសហរដ្ឋអាមេរិកផងដែរ»។

មុននេះដែរ អ្នកនាំពាក្យក្រសួងការពារជាតិកម្ពុជា លោកជំទាវឧត្តមសេនីយ៍ឯក ម៉ាលី សុជាតា បញ្ជាក់ថា កម្ពុជាជំរុញឲ្យភាគីថៃសហការពន្លឿនការបង្កើត AOT ដឹកនាំដោយម៉ាឡេស៊ីដើម្បីផ្ទៀងផ្ទាត់និងធានាការអនុវត្តបទឈប់បាញ់ឲ្យបានពេញលេញនិងមានប្រសិទ្ធភាព។

មិនត្រឹមប៉ុណ្ណឹង លោកជំទាវក៏អំពាវនាវផងដែរឲ្យភាគីថៃ គោរពនូវលក្ខខណ្ឌនៃកិច្ចព្រមព្រៀងបទឈប់បាញ់ព្រមទាំងស្មារតីនិងការឯកភាពគ្នានៅក្នុងកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ដែលចែងថា ភាគីទាំងពីរព្រមព្រៀងគ្នារក្សាកម្លាំងយោធារបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឲ្យផ្លាស់ទីពីទីតាំងដែលខ្លួនឈរជើង ក្នុងពេលកិច្ចព្រមព្រៀងបទឈប់បាញ់ដែលចូលជាធរមាននៅម៉ោង១២អាធ្រាតថ្ងៃទី២៨ ខែកក្កដាឡើយ៕

អត្ថបទ៖ សុខ សុវណ្ណ

ចុចអាន៖ ឯកអគ្គរដ្ឋទូតអាមេរិកប្រចាំម៉ាឡេស៊ី អំពាវនាវឲ្យកម្ពុជា-ថៃ គោរពបទឈប់បាញ់