ចិន សុំចូលជួយដោះស្រាយ ជម្លោះកម្ពុជា-ថៃ

តាមការចុះផ្សាយរបស់ Straits Times, រដ្ឋមន្ត្រីក្រសួងការបរទេសចិន វ៉ាង យី បានបញ្ជាក់ថា ទីក្រុងប៉េកាំង គាំទ្រឲ្យកម្ពុជា-ថៃ ដោះស្រាយជម្លោះដោយសន្តិវិធី ហើយក៏នឹងចូលខ្លួនជួយផងដែរ បើប្រទេសទាំងពីរយល់ព្រម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍កាលពីថ្ងៃព្រហស្បតិ៍ទី១៤ខែសីហាឆ្នាំ២០២៥ ក្រោយលោក វ៉ាង ជួបជាមួយរដ្ឋមន្ត្រីការបរទេសកម្ពុជា ឯកឧត្តម ប្រាក់ សុខុន នៅខាងក្រៅកិច្ចប្រជុំ មេគង្គ-ឡាងឆាង លើកទី១០ នៅទីក្រុងអាននីង ខេត្តយូណាន ប្រទេសចិន, ប្រមុខការទូតចិន និយាយថា រដ្ឋាភិបាលទីក្រុងប៉េកាំង គាំទ្រជានិច្ចឲ្យប្រទេសអាស៊ីអាគ្នេយ៍ពង្រឹងកិច្ចសន្ទនា ហើយសង្ឃឹមថា ប្រទេសទាំងពីរស្តារទំនុកចិត្តគ្នាទៅវិញទៅមកនិងមិត្តភាពឡើងវិញ ព្រមទាំងអាចបើកព្រំដែនក្នុងពេលឆាប់តាមដែលអាចធ្វើទៅបាន។

សូមជម្រាបថា ក្នុងជម្លោះព្រំដែនកម្ពុជា-ថៃ, ប្រទេសចិនតែងបង្ហាញជំហរជាផ្លូវការ ដោយជំរុញឲ្យប្រទេសទាំងពីរដោះស្រាយតាមរយៈកិច្ចសន្ទនានិងការពិភាក្សាប្រកបដោយមិត្តភាព។

រដ្ឋាភិបាលទីក្រុងប៉េកាំង បានអះអាងហើយអះអាងទៀតថា ខ្លួនត្រៀមរួចជាស្រេចក្នុងការដើរតួនាទីជា អ្នកសម្របសម្រួលប្រកបដោយយុត្តិធម៌ មិនលំអៀងទៅភាគីណាមួយឡើយ។

មិនត្រឹមប៉ុណ្ណឹង ចិនតែងអំពាវនាវជាសាធារណៈឲ្យប្រទេសទាំងពីររក្សាភាពស្ងប់ស្ងាត់ និងអនុវត្តបទឈប់បាញ់ ដើម្បីបង្កើតបរិយាកាសអំណោយផលសម្រាប់កិច្ចចរចា៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ត្រៀមបញ្ជូនក្រុម ចូលរួមជាមួយ AOT មកពិនិត្យតំបន់ជម្លោះកម្ពុជា-ថៃ ខណៈអាមេរិក ក៏គាំទ្រ