ព័ត៌មានអន្ដរជាតិ

ត្រាំ៖ គ្រប់យ៉ាងទុកឲ្យ ហ្សេលេនស្គី ជាអ្នកសម្រេច

បានផុស

១១ ខែ មុន

នៅ

ថ្ងៃសៅរ៍ ១៦ សីហា ២០២៥

ដោយ

Chheang

ទោះគ្មានវត្តមាននៅក្នុងកិច្ចប្រជុំកំពូលត្រាំ-ពូទីននៅរដ្ឋអាឡាស្កាកាលពីថ្ងៃសុក្រទី១៥ខែសីហាឆ្នាំ២០២៥ស្ដីពីការបញ្ចប់សង្គ្រាមនៅអ៊ុយក្រែនក៏ពិតមែន ក៏មេដឹកនាំអាមេរិកបានបញ្ជាក់ច្បាស់ៗថា អ្វីៗគ្រប់យ៉ាងនិងការវិវឌ្ឍទៅជាបែបណាទៀតនោះគឺទុកឲ្យលោក វ៉ូឡូឌីមៀរ ហ្សេលេនស្គី ជាអ្នកសម្រេច។

លោក ពូទីន និងលោក ត្រាំ នៅរដ្ឋអាឡាស្កាថ្ងៃទី១៥សីហា២០២៥ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយកិច្ចប្រជុំរយៈពេលប្រមាណជាបីម៉ោងរវាងប្រធានាធិបតីអាមេរិកលោក ដូណាល់ ត្រាំ និងសមភាគីរុស្ស៊ីលោក វ៉្លាឌីមៀរ ពូទីន គេសង្កេតឃើញថាពុំទាន់មានកិច្ចព្រមព្រៀងផ្លូវការណាមួយដែលសម្រេចបាននោះទេ។ ប៉ុន្តែលោក ត្រាំ អះអាងថា កិច្ចចរចាដំណើរការល្អ ហើយទាំងរូបលោក និងលោក ពូទីន បង្ហើបថានឹងមានជំនួបកំពូលលើកក្រោយទៀត ដែលអាចធ្វើឡើងនៅរដ្ឋធានីមូស្គូ តែកាលបរិច្ឆេទមិនទាន់បញ្ជាក់ច្បាស់ការទេ។

លោក ត្រាំ បានសង្កត់ធ្ងន់ថា អ្វីគ្រប់យ៉ាងគឺអាស្រ័យលើសកម្មភាពរបស់លោក ហ្សេលេនស្គី ដែលជាអ្នកសម្រេចចុងក្រោយ ដោយនិយាយថា «យើងបានយល់ព្រមលើចំណុចជាច្រើន។ ឥឡូវនេះវាអាស្រ័យទៅលើប្រធានាធិបតី ហ្សេលេនស្គី ពីរបៀបអនុវត្តអ្វីៗទាំងអស់នេះ ហើយប្រសិនបើពួកគេចង់បាន ខ្ញុំនឹងនៅក្នុងកិច្ចប្រជុំបន្ទាប់»។

បន្ថែមពីនេះ បន្ទាប់ពីកិច្ចប្រជុំ លោក ត្រាំ បាននិយាយថា លោកនឹងសង្ខេបជំនួបលើកនេះទៅកាន់សម្ព័ន្ធមិត្តណាតូ និងមេដឹកនាំអ៊ុយក្រែន អំពីលទ្ធផលដែលទទួលបាន។ ចំណែកឯលោក ពូទីន បានលើកឡើងដែរថា លោកពិតជាមានសណ្ដានចិត្តស្មោះត្រង់ ក្នុងការបញ្ចប់ជម្លោះ ដែលលោកចាត់ទុកថាជា «សោកនាដកម្មមួយ»។ យ៉ាងណាមិញ លោកទទូចថា រុស្ស៊ីត្រូវតែដោះស្រាយ«ដើមហេតុចម្បង» នៃជម្លោះជាមុនសិន ហើយព្រមានអ៊ុយក្រែន និងអឺរ៉ុបកុំឲ្យបំផ្លិចបំផ្លាញកិច្ចពិភាក្សាណាមួយ ហើយបានពណ៌នាកិច្ចប្រជុំជាមួយប្រធានាធិបតី ត្រាំ ថាជា«ចំណុចចាប់ផ្តើមសម្រាប់ដំណោះស្រាយ»៕