ក្រុមផ្តាច់ខ្លួនភាគខាងត្បូងថៃ បើកការវាយប្រហារក្នុងខេត្ត Narathiwat

សកម្មប្រយុទ្ធផ្តាច់ខ្លួនភាគខាងត្បូងថៃមួយក្រុម បានបើកការវាយប្រហារក្នុងស្រុក Waeng នៃខេត្ត Narathiwat ដោយកំណត់គោលដៅលើរោងចក្រគីមីមួយកន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post នៅថ្ងៃចន្ទទី១៨ខែសីហាឆ្នាំ២០២៥, សកម្មប្រយុទ្ធ១០ទៅ១៥នាក់ បានបើកការវាយប្រហារ រួមទាំងការបំផ្ទុះគ្រាប់បែកផងដែរ ដោយបង្កការខូចខាតដល់រោងចក្រ Price of Wood Green Energy Co Ltd កាលពីចុងសប្តាហ៍ ធ្វើឲ្យរោងចក្រផ្អាកប្រតិបត្តិការ។

ទោះបីជាយ៉ាងណាក៏ដោយ មេបញ្ជាការភូមិភាគ៤ លោក Paisal Nusang បញ្ជាក់ថា មិនមានជនស៊ីវិលណាម្នាក់ស្លាប់និងរងរបួសក្នុងការវាយប្រហារនោះទេ។

ការវាយប្រហារនេះ កើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីខេត្តភាគខាងត្បូងមួយនេះ បង្ហាញសញ្ញាមិនស្រួល ដោយមេភូមិភាគ៤ ទទួលរបាយការណ៍អំពីក្រុមបះបោរផ្តាច់ខ្លួនកំពុងជួញដូរអាវុធចូលដីថៃ។ 

ភ្លាមៗនោះ លោក Paisal ក៏ទៅពិនិត្យមើលស្ថានការណ៍លើតំបន់ព្រៃភ្នំ ដើម្បីតាមដានការជួញដូរអាវុធនិងគ្រាប់រំសេវរបស់ក្រុមបះបោរពីប្រទេសជិតខាងចូលដីថៃ វាយតម្លៃផ្លូវរត់ពន្ធ ទីតាំងសម្ងាត់ និងចំណុចងាយរងគ្រោះដែលអាចត្រូវបានប្រើសម្រាប់ការជួញដូរអាវុធ រួចក៏កោះប្រជុំបន្ទាន់ ដើម្បីពិភាក្សានិងត្រៀមកម្លាំងទប់ទល់ការវាយប្រហារដែលអាចកើតឡើង។

សូមជម្រាបជាថ្មី អំពើហិង្សានៅភាគខាងត្បូងប្រទេសថៃ គឺជាជម្លោះដែលកើតមានឡើងជាយូរមកហើយរវាងរដ្ឋាភិបាលថៃនិងក្រុមបះបោរផ្តាច់ខ្លួនមូស្លីម។

យោងតាមតួលេខចុងក្រោយពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស។ ក្នុងចំណោមមនុស្សស្លាប់ក៏រួមមានមន្ត្រីយោធានិងប៉ូលិស ផងដែរ៕

អត្ថបទ៖ សុខ សុវណ្ណ

ចុចអាន៖ យន្តហោះចម្បាំងមីយ៉ាន់ម៉ា ទម្លាក់គ្រាប់បែកលើរដ្ឋ Kayah ជាប់ព្រំដែនថៃ សម្លាប់មនុស្ស ២៤នាក់នៅខាង មីយ៉ាន់ម៉ា