ម៉ាឡេស៊ី​ ឃាត់អ្នកដំណើរ​៧​នាក់ ម្នាក់ជាជនជាតិ ថៃ សង្ស័យមិនមែនជាអ្នកទេសចរពិត

ទីភ្នាក់ងារត្រួតពិនិត្យ និងការពារព្រំដែន (AKPS) កាលពីថ្ងៃ២២ ខែសីហា បានចេញសេចក្តីជូនដំណឹងអំពីការបដិសេធការចូល (NPMs) ដល់ជនបរទេសចំនួន ៧ នាក់ដែលប៉ុនប៉ងចូលប្រទេសតាមតាមរយៈច្រកអន្តោប្រវេសន៍ Bukit Kayu Hitam។

យោងតាមភ្នាក់ងារ Bernama នៅក្នុងសេចក្តីថ្លែងការណ៍មួយ AKPS បាននិយាយថា ជនបរទេសដែលរួមមានបុរសឥណ្ឌា ៥នាក់ បុរសថៃម្នាក់ និងស្ត្រីឥណ្ឌូនេស៊ីម្នាក់ ត្រូវគេសង្ស័យថា ពួកគេមិនមែនជាអ្នកទេសចរពិតប្រាកដឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពួកគេទាំងអស់ត្រូវបានផ្តល់ការជូនដំណឹងដោយអនុលោមតាមផ្នែកទី ៨ (៣) នៃច្បាប់អន្តោប្រវេសន៍ឆ្នាំ ១៩៥៩/៦៣ សម្រាប់ការមិនបំពេញតាមតម្រូវការនៃការចូលជាភ្ញៀវទេសចរណ៍ ទៅកាន់ប្រទេសម៉ាឡេស៊ី។ យ៉ាងណាក៏ដោយ ពួកគេ​ត្រូវ​បាន​ណែនាំ​ឲ្យត្រឡប់​ទៅ​ប្រទេស​ដើម​វិញ​ តាមច្រកចូល​ដដែល។

ជាមួយគ្នានេះដែរ នៅក្នុងករណីមួយទៀតកាលពីម្សិលមិញ AKPS បានរឹបអូសផលិតផលម្ហូបអាហារចំនួន២ម៉ឺន គីឡូក្រាមកៀកព្រំដែនថៃ ដែលគេស្គាល់ថាជាផ្លែមៀនក្រៀមដោយគ្មានស្លាកសញ្ញា ពីបទមិនគោរពតាមបទប្បញ្ញត្តិនៅក្នុងច្បាប់ចំណីអាហារឆ្នាំ ១៩៨៣ ទាក់ទងនឹងការដាក់ស្លាកផលិតផល។

ការរឹបអូសបានធ្វើឡើងក្នុងប្រតិបត្តិការដែលបានចាប់ផ្តើមនៅម៉ោង ៨ និង៣០នាទីយប់ ដែលផលិតផលត្រូវបាននាំយកមកជាមួយទំនិញផ្សេងទៀតដោយប្រើផ្លូវពាណិជ្ជកម្ម។ សរុបទឹកប្រាក់ដែលរឹបអូសត្រូវបានគេប៉ាន់ស្មានថាមានតម្លៃជាង ៤៨០,០០០ រីងហ្គីត ប៉ុន្តែមិនមានការចាប់ខ្លួនណាមួយឡើយ។

AKPS បាននិយាយថា ខ្លួនតែងតែប្តេជ្ញាចិត្តក្នុងការធានាថា រាល់ផលិតផលអាហារដែលនាំយកមកក្នុងប្រទេស គោរពតាមច្បាប់ និងស្តង់ដារសុវត្ថិភាពចំណីអាហារ។ កិច្ចសហប្រតិបត្តិការជិតស្និទ្ធជាមួយភ្នាក់ងារអនុវត្តច្បាប់ផ្សេងទៀតទាំងអស់នឹងបន្តត្រូវបានពង្រឹងដើម្បីធានាសុវត្ថិភាពអ្នកប្រើប្រាស់ និងការពារអធិបតេយ្យភាពនៃព្រំដែនរបស់ប្រទេស៕

អត្ថបទ៖ សាង ស្រីល័ក្ខ

ចុចអាន៖ចៅអធិការវត្តមួយនៅ ថៃ ឃុបឃិតជាមួយចោរ លួចលុយនិងមាស សរុបប្រាក់ជិត ៦៨ ម៉ឺនដុល្លារ