ព័ត៌មានអន្ដរជាតិ

រញ្ជួយដីកម្រិត ៤,១រ៉ិចទ័រនៅរដ្ឋ Johor ប្រទេសម៉ាឡេស៊ី

បានផុស

១១ ខែ មុន

នៅ

ថ្ងៃអាទិត្យ ២៤ សីហា ២០២៥

ដោយ

Chheang

ការរញ្ជួយដីកម្រិត៤,១រ៉ិចទ័រ បានវាយប្រហារនៅជិតទីក្រុង Segamat ក្នុងរដ្ឋ Johor នៅព្រឹកថ្ងៃអាទិត្យទី២៤ខែសីហានេះ ដោយបង្កការញ័រដល់រដ្ឋជាច្រើនផ្សេងទៀតនៅភាគខាងត្បូងប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយកដ្ឋានឧតុនិយមម៉ាឡេស៊ី (MetMalaysia) ការរញ្ជួយដីនេះបានកើតឡើងនៅវេលាម៉ោង ៦ និង ១៣នាទីព្រឹក ម៉ោងក្នុងស្រុក នៅជម្រៅ ១០គីឡូម៉ែត្រ។ ការញ័រត្រូវបានគេសង្កេតឃើញកើតឡើងក្នុងតំបន់ជាច្រើននៃរដ្ឋ Johor, Negeri Sembilan, Melaka និងភាគខាងត្បូង Pahang។ អភិបាលក្រុង Johor លោក Datuk Onn Hafiz Ghazi បានបញ្ជាក់ថា រហូតមកដល់ពេលនេះ មិនទាន់មានរបាយការណ៍ស្តីពីការស្លាប់ ឬការខូចខាតទ្រព្យសម្បត្តិណាមួយឡើយ ហើយអាជ្ញាធរបានណែនាំសាធារណជនឲ្យនៅឆ្ងាយពីសំណង់ដែលមិនមានសុវត្ថិភាព។

សូមជម្រាបថា នៅខែមីនាឆ្នាំ២០២៥ បន្ទាប់ពីគ្រោះរញ្ជួយដីដ៏ខ្លាំងក្លាដែលបានវាយប្រហារប្រទេសមីយ៉ាន់ម៉ា និងផ្នែកខ្លះនៃប្រទេសថៃ និងវៀតណាម អ្នកជំនាញម៉ាឡេស៊ីបានព្រមានថា ប្រទេសនេះគួរតែរក្សាការប្រុងប្រយ័ត្នចំពោះគ្រោះរញ្ជួយដី ទោះបីជាវាស្ថិតនៅក្រៅរង្វង់ភ្លើងប៉ាស៊ីហ្វិកក៏ដោយ។

នេះមិនមែនជាលើកទីមួយទេ ដែលម៉ាឡេស៊ីបានជួបប្រទះនឹងការរញ្ជួយដី ជាមួយនឹងចំណុចកណ្តាលដែលកើតចេញពីផ្ទៃដីរបស់ខ្លួន។

យោងតាមរបាយការណ៍ខែសីហាឆ្នាំ២០២៥របស់ The Star ទីក្រុង Johor បានជួបប្រទះការរញ្ជួយដីបែបនេះចំនួនពីរដងមកហើយនៅដើមឆ្នាំ១៩២២។ លើកទីមួយបានកើតឡើងនៅថ្ងៃទី៣១ខែមករាគឺនៅកម្រិត ៥,៤រ៉ិចទ័រ និងលើកទីពីរនៅថ្ងៃទី៧ខែកុម្ភៈ ៥,០រ៉ិចទ័រ៕