ព័ត៌មានអន្ដរជាតិ

បក្សប្រឆាំងធំបំផុតនៅថៃ ទាមទារដាច់ខាតឲ្យ«រំលាយសភា និងធ្វើប្រជាមតិកែរដ្ឋធម្មនុញ្ញ» ជាថ្នូរគាំទ្របេក្ខភាពនាយករដ្ឋមន្ត្រីថ្មី

បានផុស

៨ ខែ មុន

នៅ

ថ្ងៃសៅរ៍ ៣០ សីហា ២០២៥

ដោយ

គណបក្សប្រឆាំងធំបំផុតរបស់ប្រទេសថៃ គឺគណបក្សប្រជាជន (People’s Party) កំពុងដាក់ការតថ្លៃអំណាចចុងក្រោយជាមួយគណបក្សដែលនៅមានសិទ្ធិតែងតាំងបេក្ខជនសម្រាប់តំណែងនាយករដ្ឋមន្ត្រី ដោយដាក់ការទាមទារដាច់ខាត គឺ «ត្រូវរំលាយសភានិងធ្វើប្រជាមតិធ្វើវិសោធនកម្មរដ្ឋធម្មនុញ្ញ» ជាថ្នូរបោះឆ្នោតគាំទ្របេក្ខជននាយករដ្ឋមន្ត្រីឲ្យឡើងកាន់អំណាច ទោះបីក្នុងរយៈពេលខ្លីក៏ដោយ។

លោក Thanathorn Juangroongruangkit ប្រធានគណបក្សប្រជាជនដែលជាបក្សប្រឆាំងធំបំផុត។ FB

លោក Thanathorn Juangroongruangkit ប្រធានគណបក្សប្រជាជន ដែលត្រូវបានបង្កើតឡើងប្រមូលផ្តុំតំណាងរាស្រ្តនៃគណបក្សឆ្ពោះទៅមុខ (Move Forward Party) ដែលត្រូវរំលាយដោយតុលាការធម្មនុញ្ញកាលខែសីហាឆ្នាំ២០២៤។ គណបក្សឆ្ពោះទៅមុខ បានឈ្នះការបោះឆ្នោតកាលពីខែឧសភាឆ្នាំ២០២៣ ប៉ុន្តែប្រធានគណបក្សនេះ លោក ភីថា លឹមចារើនរ៉ាត បានរងបណ្តឹងជាច្រើន និង ត្រូវបានរារាំងមិនឲ្យឡើងជានាយករដ្ឋមន្ត្រី ដោយសារសមាជិកព្រឹទ្ធសភាបោះឆ្នោតប្រឆាំងគាត់ ព្រោះតែការប៉ុនប៉ងធ្វើវិសោធនកម្មរដ្ឋធម្មនុញ្ញ ដើម្បីបន្ថយអំណាចក្សត្រ និង ការដកអំណាចយោធពីការជាប់ពាក់ព័ន្ធនយោបាយ។

យោងសារព័ត៌មានថៃ ខាវសុត លោក Thanathorn Juangroongruangkit ប្រធានគណបក្សប្រជាជន បានសារភាពថា លោកបានជួបជាមួយលោកថាក់ស៊ីនព្រឹកថ្ងៃសៅរ៍នេះ។ នៅក្នុងជំនួបនោះ លោក បានអះអាងថា លោកថាក់ស៊ីនចង់ពិគ្រោះជាមួយលោកថាតើបក្សប្រជាជននឹងបោះឆ្នោតគាំទ្រលោក Chaikasem Nitisiri ជានាយករដ្ឋមន្ត្រីមកពីគណបក្សភឿថៃដែរឬទេ។

តាមការដកស្រង់សម្តី លោក Thanathorn បាននិយាយថា៖«លោកបានប្រាប់លោកថាក់ស៊ីនថា គណបក្សប្រជាជនមានជំហរច្បាស់លាស់លើបញ្ហានេះ ហើយពួកគេបានប្រកាសវាអស់រយៈពេលពីរខែមកហើយ។ លក្ខខណ្ឌសម្រាប់គាំទ្របេក្ខជននាយករដ្ឋមន្ត្រីណាមួយគឺត្រូវរំលាយសភាក្នុងរយៈពេលបួនខែនិងធ្វើប្រជាមតិដើម្បីធ្វើវិសោធនកម្មរដ្ឋធម្មនុញ្ញ។ នេះជាអ្វីដែលលោកប្រាប់ថាក់ស៊ីន»។

ទាំងគណបក្សភឿថៃ និងគណបក្សភូមិចៃថៃសុទ្ធតែបញ្ចុះបញ្ចូលគណបក្សប្រជាជន ដែលមានសមាជិកសភាដល់ទៅ១៤៣ក្នុងសភាពេលនេះសម្រាប់ការគាំទ្របេក្ខជនរបស់ខ្លួនឲ្យក្លាយជានាយករដ្ឋមន្ត្រី ហើយ គណបក្សទាំងពីរបានបង្ហាញសញ្ញាវិជ្ជមានពីការគាំទ្ររបស់គណបក្សប្រឆាំងដ៏ធំមួយនេះ។

គណបក្សរដ្ឋមន្ត្រីថ្មី នឹងឡើងមកជាការបង្គ្រប់កិច្ចប៉ុណ្ណោះ ដើម្បីត្រៀមខ្លួនប្រកាសរំលាយរដ្ឋសភា ដើម្បីបើកផ្លូវឲ្យមានការបោះឆ្នោតសភាឡើងវិញក្នុងរង្វង់ប៉ុន្មានខែខាងមុខនេះ ពោលគឺនៅមុនអាណត្តិជាង១ឆ្នាំ ដែលអាណត្តិរដ្ឋាភិបាលនេះនឹងផុតនៅខែឧសភាឆ្នាំ២០២៧។

មូលហេតុដែលត្រូវការបោះឆ្នោតជ្រើសរើសនាយករដ្ឋមន្ត្រីផ្លូវការ ដើម្បីរំលាយសភា ដោយសារតែនាយករដ្ឋមន្ត្រីស្តីទីគ្មានសិទ្ធិអំណាចក្នុងការប្រកាសរំលាយសភានោះទេ ហើយ អំណាចនេះត្រូវបានប្រគល់សិទ្ធិទៅដល់នាយករដ្ឋមន្ត្រីដែលទទួលបានការទុកចិត្តពីសភាតែមួយគាត់៕

រ៉ាន់ រើយ