ព័ត៌មានអន្ដរជាតិ

ពូទីន៖ រុស្ស៊ី នឹងសម្រេចបានគោលដៅយោធាទាំងអស់ បើអ៊ុយក្រែន មិនឯកភាពលើកិច្ចព្រមព្រៀង

បានផុស

៨ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

បន្ទាប់ពីចូលរួមក្នុងក្បួនព្យុហយាត្រាយោធាដ៏ធំនៅប្រទេសចិន ប្រធានាធិបតីរុស្ស៊ី វ្ល៉ាឌីមៀរ ពូទីន បានបញ្ជាក់យ៉ាងច្បាស់ថា ទីក្រុងមូស្គូ នឹងសម្រេចបាននូវគោលដៅយោធាទាំងអស់របស់ខ្លួន ប្រសិនបើអ៊ុយក្រែន មិនយល់ព្រមបង្កើតឲ្យមានកិច្ចព្រមព្រៀងសន្តិភាពទេនោះ។

ប្រធានាធិបតីរុស្ស៊ី វ្ល៉ាឌីមៀរ ពូទីន (រូបថត៖ Reuters)

តាមការផ្សាយរបស់ BBC នៅថ្ងៃព្រហស្បតិ៍ទី៤ខែកញ្ញាឆ្នាំ២០២៥ លោកពូទីន បានប្រាប់អ្នកកាសែតថា «យើងប្រហែលយល់ព្រមលើដំណោះស្រាយដែលអាចទទួលយកបាន ដើម្បីបញ្ចប់ជម្លោះជាមួយអ៊ុយក្រែន។ បើមិនដូច្នោះទេ យើងនឹងត្រូវដោះស្រាយរាល់កិច្ចការរបស់យើងដោយយោធាហើយ»។

ទោះបីជាយ៉ាងណាក៏ដោយ លោកពូទីនបានសង្កត់ធ្ងន់ថា រុស្ស៊ីនឹងមិនបោះបង់តំបន់ Donbas ភាគខាងកើតអ៊ុយក្រែន ដែលទាហានរបស់លោកបានដណ្តើមយកនោះទេ។

មេដឹកនាំរុស្ស៊ីក៏ទាមទារម្តងហើយម្តងទៀតដែរឲ្យអ៊ុយក្រែន ឈប់ចង់ចូលជាសមាជិកអង្គការណាតូទៀតទៅ និងត្រូវបញ្ឈប់នូវអ្វីដែលលោកហៅថា ការរើសអើងប្រឆាំងជនជាតិរុស្សី។

មុននេះ មេដឹកនាំវិមានក្រឹមឡាំងអះអាងថា លោកឈានដល់ការកំណត់លក្ខខណ្ឌជាក់លាក់ជាមួយមេដឹកនាំអាមេរិក ដូណាល់ ត្រាំ ហើយ ស្តីពីការបញ្ចប់សង្រ្គាមនៅអ៊ុយក្រែន ក្នុងអំឡុងកិច្ចប្រជុំកំពូល នៅរដ្ឋអាឡាស្កាកាលពីខែសីហា។

យ៉ាងណាមិញ លោក ពូទីន មិនបានបញ្ជាក់ទេថាតើលោកនឹងចូលចរចាសន្តិភាពដោយផ្ទាល់ជាមួយប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ក្រោមការសម្របសម្រួលរបស់លោក ត្រាំ ដែរឬក៏យ៉ាងណា៕

អត្ថបទ៖ សុខ សុវណ្ណ

ចុចអាន៖ ពូទីន ប្រាប់ថាឈានដល់ការកំណត់«លក្ខខណ្ឌ» ជាមួយ ត្រាំ ស្តីពីការបញ្ចប់សង្រ្គាមអ៊ុយក្រែន