ព័ត៌មានអន្ដរជាតិ

លោក Chaikasem និង Anutin មានសក្តានុពលជាប់ឆ្នោតដូចគ្នា ក្រោយបក្សប្រជាជនប្រគល់សេរីភាពដល់សមាជិកសភា

បានផុស

១០ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

ចាប់ពីម៉ោងជាង១២រសៀលថ្ងៃទី៥ខែកញ្ញានេះ រដ្ឋសភាថៃបានដំណើរការបោះឆ្នោតផ្តល់សេចក្តីទុកចិត្តដល់បេក្ខភាពនាយករដ្ឋមន្ត្រីមកពីគណបក្សភូមិចៃថៃ និង គណបក្សភឿថៃ បន្ទាប់ពីតំណែងនាយករដ្ឋមន្ត្រីថៃបានទំនេរចាប់តាំងពីតុលាការធម្មនុញ្ញបានចេញសាលក្រមសម្រេចបណ្តេញនាយករដ្ឋមន្ត្រី ផែថងថាន ស៊ីណាវ៉ាត្រ កាលពីថ្ងៃទី២៩ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការប្រជុំនៅពេលព្រឹក សភាថៃបានបើកឲ្យមានការជជែកដេញដោលគ្នាក្នុងចំណោមសមាជិកសភាតំណាងរាស្រ្ត១ព្រឹក ក្នុងនោះ មានការឡើងបញ្ចេញមតិរបស់តំណាងរាស្រ្តមកពីបក្សនានា ជាពិសេស មកពីគណបក្សប្រជាជន (Prachachon) ដែលស្នើឲ្យសភាពន្យាពេលបោះឆ្នោតជ្រើសរើសនាយករដ្ឋមន្ត្រី ដោយសារតែទុកលទ្ធភាពឲ្យនាយករដ្ឋមន្ត្រីស្តីទី លោក Phumtham Wechayachai មានសិទ្ធិស្នើរំលាយសភា។

ប៉ុន្តែប្រធានរដ្ឋសភា លោក Wan Muhammad Noor Matha បានប្រកាសមិនផ្អាកដំណើរការនេះទេ ហើយក៏បានណែនាំបេក្ខជននាយករដ្ឋមន្ត្រី២រូបដែលត្រូវបានស្នើឡើងសម្រាប់ការបោះឆ្នោតផ្តល់សេចក្តីទុកចិត្តនេះ។ បេក្ខជននាយករដ្ឋមន្ត្រី២រូបនោះ រួមមាន ទី១ លោក Anutin Charnvirakul មកពីគណបក្សភូមិចៃថៃ និងទី២ លោក Chaikasem Nitisiri តំណាងគណបក្សភឿថៃ។

បក្ខជនទាំង២ខាងលើនេះ សុទ្ធតែមានសក្តានុពលជាប់ជានាយករដ្ឋមន្ត្រីថៃទី៣២ រៀងៗខ្លួន បន្ទាប់ពីជំហររបស់គណបក្សប្រឆាំងដែលមានសមាជិកសភាច្រើនរហូតដល់១៤៣ បានស្ថិតក្នុងភាពមិនច្បាស់លាស់ក្នុងការគាំទ្រដល់បេក្ខភាពណាមួដាច់ណាត់ ហើយ ទុកលទ្ធភាពឲ្យសមាជិកសភារបស់ខ្លួនមានសិទ្ធិសម្រេចគាំទ្រដល់បេក្ខជនដែលគេពេញចិត្ត។

គណបក្សភឿថៃរហូតដល់ដំណាក់កាលចុងក្រោយ បានប្រកាសផ្តល់សម្បទានឲ្យគណបក្សប្រឆាំងទាំងអស់ ដោយសុខចិត្តរំលាយសភាភ្លាមៗ ក្រោយទទួលបានការអនុម័តពេញលេញជាប់ជានាយករដ្ឋមន្ត្រីពេញសិទ្ធិដែលអាចស្នើរំលាយសភាបាន។ ការប្រកាសផ្លាស់ប្តូរចុងក្រោយនេះ បន្ទាប់នាយករដ្ឋមន្ត្រីស្តីទី Phumtham Wechayachai ដែលចេញពីគណបក្សភឿថៃបរាជ័យក្នុងការស្នើព្រះរាជក្រមរំលាយសភាកាលពីថ្ងៃទី២កញ្ញា ហើយ នៅថ្ងៃទីបីស្ថាប័នព្រះមហាក្សត្រថៃបានបញ្ជូនលិខិតនោះមកវិញ ដោយ លើកហេតុផលមិនពេញលក្ខខណ្ឌផ្លូវច្បាប់។

នៅថ្ងៃទី២ខែកញ្ញា គណបក្សភូមិចៃថៃរបស់លោក Anutin Charnvirakul បានចុះហត្ថលេខាយល់ព្រមជាមួយគណបក្សប្រជាជនក្នុងការទទួលយកលក្ខខណ្ឌរំលាយសភាត្រឹមរយៈពេល៤ខែ ហើយនិងធ្វើប្រជាមតិដើម្បីកែប្រែរដ្ឋធម្មនុញ្ញ។ ទោះបីជាបែបនេះក្តី សមាជិកគណបក្សប្រជាជនដែលធ្លាប់តស៊ូប្រឆាំងការគ្រប់គ្រងដោយរបបយោធាថៃ បានបង្ហាញក្តីកង្វល់ជាបន្តបន្ទាប់អំពីជំហរគាំទ្របក្សភូមិចៃថៃដែលមានសាវតាជាអ្នកយោធានិយមដែរនោះ។

ចុងក្រោយ ស្ថានភាពរបស់បេក្ខជនទាំងពីរគឹសុទ្ធតែមានសក្តានុពលក្នុងាការជាប់ជានាយករដ្ឋមន្ត្រីទី៣២ដូចគ្នា ហើយ គណបក្សភឿថៃនៅតែមានលទ្ធភាពធំដដែល ដោយសារតែសមាជិកសភាបក្សនេះមានច្រើនរហូតដល់១៤២ ខណៈ តម្រូវការសមាជិកសភាចំនួន២៤៧ ដើម្បីបានជាប់ជានាយករដ្ឋមន្ត្រីពេញសិទ្ធិ។ គណបក្សភូមិចៃថៃមានសមាជិកសភា៦៩ ដែលត្រូវការច្រើនពីបក្សផ្សេងៗទៀត និងជាពិសេសពីគណបក្សប្រជាជនតែម្តង៕

រ៉ាន់ រើយ