រុស្ស៊ី ធ្វើតេស្តថ្នាំចាក់ព្យាបាលជំងឺមហារីក ដោយជោគជ័យ និងត្រៀមដាក់លក់លើទីផ្សារ

ជាដំណឹងល្អមួយសម្រាប់ពិភពលោក ដែលប្រទេសរុស្ស៊ីប្រកាសថា ថ្នាំចាក់ព្យាបាលជំងឺមហារីករបស់ខ្លួន ទទួលបានជោគជ័យក្នុងការធ្វើតេស្ត ហើយត្រៀមដាក់លក់លើទីផ្សារហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Veronika Skvortsova ប្រធានទីភ្នាក់ងារវេជ្ជសាស្ត្រ-ជីវសាស្ត្រសហព័ន្ធរុស្ស៊ី បានប្រកាសនៅខាងក្រៅវេទិកាសេដ្ឋកិច្ចខាងកើតក្នុងទីក្រុង Vladivostok ថា ការសាកល្បងមុនគ្លីនិកអស់រយៈពេល៣ឆ្នាំ ថ្នាំចាក់នេះបានបង្ហាញលទ្ធផលជាទីគាប់ចិត្ត ពោលគឺមានប្រសិទ្ធភាព៦០-៨០% ព្យាបាលជំងឺមហារីកពោះវៀនធំ ដែលជាជំងឺបណ្តាលឲ្យមានអត្រាមនុស្សស្លាប់ខ្ពស់លើពិភពលោក។ បន្ទាប់មក អ្នកវិទ្យាសាស្រ្ត នឹងផលិតថ្នាំព្យាបាលជំងឺមហារីកខួរក្បាលនិងមហារីកស្បែក ព្រមទាំងជំងឺមហារីកផ្សេងៗទៀត តាមក្រោយ។

ទន្ទឹមនោះ តាមការផ្សាយរបស់ RT កាលពីថ្ងៃអាទិត្យទី៧ខែកញ្ញាឆ្នាំ២០២៥ ថ្នាំនេះមានឈ្មោះ Enteromix ដែលត្រូវផលិតឡើងដោយបច្ចេកវិទ្យា mRNA ដូចទៅនឹងវ៉ាក់សាំងកូវីដ-១៩ដែរ។ Enteromix ចូលទៅបំប៉នប្រព័ន្ធភាពស៊ាំរបស់អ្នកជំងឺ ដើម្បីប្រយុទ្ធប្រឆាំងនឹងកោសិកាមហារីក។

លោកស្រី Skvortsova និយាយថា «ការសាកល្បង បានបង្ហាញឲ្យឃើញពីសុវត្ថិភាពនៃថ្នាំចាក់ រួមទាំងការប្រើប្រាស់ម្តងហើយម្តងទៀត ក៏ដូចជាប្រសិទ្ធភាពខ្ពស់របស់វា ដែលត្រូវបានផ្សារភ្ជាប់ជាមួយនឹងការកាត់បន្ថយទំហំដុំសាច់ និងការថយចុះនៃការលូតលាស់ដុំសាច់ផងដែរ។ ការសិក្សាបានបង្ហាញពីលទ្ធភាពនៃការរស់រានមានជីវិតរបស់អ្នកជំងឺកាន់តែប្រសើរឡើង។ យើងបានបញ្ជូនឯកសារទៅក្រសួងសុខាភិបាលរួចហើយ ដើម្បីទទួលភ្លើងបៃតង សម្រាប់ការប្រើប្រាស់គ្លីនិកនៅចុងរដូវក្តៅខាងមុខ»។

ទោះបីជាយ៉ាងណាក៏ដោយ តម្លៃនៃថ្នាំចាក់នេះ មិនទាន់ត្រូវបានគេបង្ហាញនោះទេ ប៉ុន្តែមានដំណឹងថា វាមិនសូវជាថ្លៃនោះទេ៕

អត្ថបទ៖ សុខ សុវណ្ណ

ចុចអាន៖ រុស្សី នឹងសាកល្បងវ៉ាក់សាំងមហារីកផលិតដោយ AI និងប្រើឥតគិតថ្លៃដំបូងគេបង្អស់របស់ពិភពលោក