យន្តហោះឯកជនរបស់ ថាក់ស៊ីន ទៅ​ដល់​ក្រុងបាងកក មុនពេលសវនាការរបស់តុលាការ

អតីតនាយករដ្ឋមន្ត្រីថៃ ថាក់ស៊ីន ស៊ីណាវ៉ាត្រ បានវិល​ត្រឡប់​ទៅ​ដល់ប្រទេសថៃវិញហើយនៅរសៀលនេះ ដោយបានចុះចតនៅអាកាសយានដ្ឋានដនមឿង តាមយន្តហោះឯកជន Bombardier Global 7500។ ការមកដល់របស់គាត់កើតឡើងមួយថ្ងៃមុនពេលគាត់គ្រោងនឹងបង្ហាញខ្លួននៅតុលាការកំពូលនៅថ្ងៃទី៩ ខែកញ្ញា។

យន្តហោះរបស់លោក ថាក់ស៊ីន បានហោះចេញពីប្រទេសសិង្ហបុរីនៅព្រឹកថ្ងៃចន្ទ​នេះ បន្ទាប់​ពី​ការចាកចេញ​ពីទីក្រុងឌូបៃកាលពីថ្ងៃទី​៧​ខែកញ្ញា។ យោងតាមទិន្នន័យតាមដានជើងហោះហើរពី Flightradar24 យន្តហោះនេះបានចូល​​ក្រុង​ដនមឿង​នៅ​ម៉ោង ២និង​៥៥​រសៀល។

យោង​តាម​ការ​ចុះផ្សាយ​របស់ Khaosod ​លោក ថាក់ស៊ីន ដែលដំបូងឡើយបានប្រាប់អ្នកគាំទ្រថា​លោកនឹងធ្វើដំណើរទៅពិនិត្យសុខភាពនៅប្រទេសសិង្ហបុរីនោះ បានបង្វែរទៅទីក្រុងឌូបៃវិញកាលពីសប្តាហ៍មុន បន្ទាប់ពីត្រូវបានឃុំខ្លួនអស់រយៈពេលជាងពីរម៉ោងដោយមន្ត្រីអន្តោប្រវេសន៍ថៃមុនពេលចេញដំណើរ។

ការវិលត្រឡប់របស់គាត់បំពេញតាមការសន្យាជាសាធារណៈថា គាត់នឹងត្រឡប់មកប្រទេសថៃវិញនៅថ្ងៃទី​៨​ខែកញ្ញា ដើម្បីចូលរួមដំណើរការរបស់តុលាការនៅថ្ងៃបន្ទាប់៕

ដោយ៖ ឈាង