អាមេរិក-ចិន ឈានដល់កិច្ចព្រមព្រៀងរក្សាទុក TikTok ឲ្យនៅដំណើរដូចដើម

នៅក្នុងបទសម្ភាសន៍ជាមួយ Reuters កាលពីថ្ងៃចន្ទ ទី១៥ ខែកញ្ញា រដ្ឋមន្ត្រីក្រសួងហិរញ្ញវត្ថុអាមេរិកលោក Scott Bessent បាននិយាយថា សហរដ្ឋអាមេរិក​ និងប្រទេសចិនបានឈានដល់ក្របខ័ណ្ឌសម្រាប់កិច្ចព្រមព្រៀងមួយ ដើម្បីរក្សា TikTok ឲ្យនៅដំណើរការលើទឹកដីមួយនេះ។ ប៉ុន្តែព័ត៌មានលម្អិតគឺមិនទាន់បញ្ចាក់ច្បាស់លាស់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីមន្ត្រីជាន់ខ្ពស់អាមេរិក និងចិនបានបញ្ចប់កិច្ចពិភាក្សានៅទីក្រុង Madrid លោក Bessent បាននិយាយថា ពួកយើងមានក្របខ័ណ្ឌសម្រាប់កិច្ចព្រមព្រៀង TikTok ។ ជាក់ស្ដែង ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន ស៊ី ជិនពីង នឹងជួបនិយាយគ្នាតាមទូរស័ព្ទនៅថ្ងៃសុក្រ ដើម្បីបញ្ចប់កិច្ចព្រមព្រៀងនេះ។ ប៉ុន្តែ រដ្ឋមន្ត្រីក្រសួងហិរញ្ញវត្ថុអាមេរិករូបនេះ ក៏មិនបានបង្ហាញពីព័ត៌មានលម្អិតជាក់លាក់ណាមួយនោះទេ។

ដោយឡែក អ្នកចរចាកំពូលរបស់ចិន លោក Li Chenggang ក៏បានថ្លឹងថ្លែងផងដែរថា ភាគីទាំងពីរបានចូលរួមក្នុងការផ្លាស់ប្តូរដោយស្មោះត្រង់ និងស៊ីជម្រៅទាក់ទងនឹង TikTok និងកង្វល់ពាក់ព័ន្ធរបស់ចិន។ ជាពិសេស ប្រទេសទាំងពីរបានឈានដល់ការឯកភាពក្នុងក្របខ័ណ្ឌមូលដ្ឋានស្តីពីកិច្ចសហប្រតិបត្តិការក្នុងការដោះស្រាយបញ្ហាពាក់ព័ន្ធដូចជា TikTok ការកាត់បន្ថយឧបសគ្គ និងការលើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មដែលពាក់ព័ន្ធ។

ក្នុងពេលទន្ទឹមគ្នានោះ លោកត្រាំ ក៏បានសរសើរលទ្ធផលនៅលើប្រព័ន្ធផ្សព្វផ្សាយសង្គម ដោយមាន​ប្រសាសន៍​ថា ការ​ចរចា​បាន​ប្រព្រឹត្ត​ទៅ​ល្អ​ណាស់ ខណៈពេលដែលគាត់មិនបានរៀបរាប់ពីឈ្មោះ TikTok នោះទេ។ ប៉ុន្តែលោកបានសង្កត់ធ្ងន់ថា យុវជននៅអាមេរិកនឹង រីករាយចំពោះកិច្ចព្រមព្រៀងនេះជាក់ជាមិនខានឡើយ៕

យ៉ាងណាមិញ នាពេលកន្លងមកការហាមប្រាម TikTok កើត​ចេញ​ពីការព្រួយបារម្ភរបស់សហរដ្ឋអាមេរិក ​លើ​បញ្ហា​សន្តិសុខជាតិ និង​​​ទិន្នន័យ​ឯកជន។ សមាជិកសភា និងមន្ត្រីស៊ើបការណ៍សម្ងាត់ បានព្រមានថា ក្រុមហ៊ុន ByteDance ដែលមានមូលដ្ឋាននៅក្នុងប្រទេសចិន អាចត្រូវបានបង្ខំដោយច្បាប់របស់​ចិន​ឲ្យ​ប្រគល់ទិន្នន័យអ្នកប្រើប្រាស់ ឬ​បង្ហោះ​ព័ត៌មាន​មិន​ពិត។ ក្រោយមក នៅឆ្នាំ​២០២៤ អតីត​​​ប្រធានាធិបតី​អាមេរិក លោក ចូ បៃដិន បានចុះហត្ថលេខាលើច្បាប់ដែលតម្រូវ​ឲ្យ ByteDance លក់ប្រតិបត្តិការ TikTok នៅសហរដ្ឋអាមេរិក ឬប្រឈមនឹងការហាមឃាត់៕

អត្ថបទ៖ សាង ស្រីល័ក្ខ

ចុចអាន៖កូរ៉េខាងត្បូង អាមេរិក និងជប៉ុន ធ្វើសមយុទ្ធរួមគ្នាជាថ្មី ត្រៀមទប់ទល់ កូរ៉េខាងជើង