ស្លាប់៤នាក់ក្នុងបាតុកម្មហិង្សាដឹកនាំដោយយុវជន Gen Z នៅ Ladakh ប្រទេសឥណ្ឌា

យោងតាមការចេញផ្សាយរបស់សារព័ត៌មាន Al Jazeera កាលពីថ្ងៃទី២៥ខែកញ្ញា Ladakh ដែលជាតំបន់វាលខ្សាច់នៅតំបន់ភ្នំហិម៉ាឡៃនិងជាចំណុចស្នូលនៃភាពតានតឹងរវាងឥណ្ឌា និងចិននាពេលថ្មីៗនេះ ត្រូវបានរង្គើរដោយសារការតវ៉ាយ៉ាងហិង្សាទាមទាររកសិទ្ធិឯករាជ្យ ​ដឹកនាំដោយយុវជន Gen Z ។

ក្រុមបាតុករ រួមមានទាំងនិស្សិត បានប៉ះទង្គិចជាមួយប៉ូលិសនៅទីក្រុង Leh និងបានដុតការិយាល័យគណបក្ស Bharatiya Janata (BJP) ដែលកាន់អំណាច និងដុតរថយន្តរបស់ប៉ូលិស។ យ៉ាងហោចណាស់បាតុករ ៤នាក់បានស្លាប់ និងរាប់សិបនាក់រងរបួស ដោយសារតែការប្រើកាំភ្លើងឆ្លើយតបរបស់ប៉ូលិស។ អាជ្ញាធរ​ឥណ្ឌាក៏បានបញ្ជាក់ថា កម្លាំង​សន្តិសុខ​រាប់​សិប​នាក់​បាន​រង​របួស​ក្នុង​ការ​ប៉ះ​ទង្គិច​គ្នា​នេះ​ដែរ។

គួររម្លឹកថាភាពចលាចលកើតឡើងបន្ទាប់ពីមានការមិនសប្បាយចិត្តរបស់ប្រជាជនតំបន់នេះជាច្រើនឆ្នាំចាប់តាំងពីLadakh បានបាត់បង់ការគ្រប់គ្រងជាឯករាជ្យរបស់ខ្លួននៅក្នុងឆ្នាំ ២០១៩ នៅពេលដែលរដ្ឋាភិបាលរបស់លោកនាយករដ្ឋមន្ត្រី ណារិនដ្រា ម៉ូឌី បានបំបែកតំបន់នេះចេញពីទីក្រុង Jammu និងតំបន់កាស្មៀរ ហើយដាក់វានៅក្រោមការគ្រប់គ្រងរបស់សហព័ន្ធ។

ក្រុមអ្នកតវ៉ាចង់ឱ្យ Ladakh បញ្ចូលទៅក្នុងតារាងទីប្រាំមួយនៃរដ្ឋធម្មនុញ្ញរបស់ប្រទេសឥណ្ឌា ដែលនឹងផ្តល់ឱ្យតំបន់នេះនូវការការពារពិសេស ដូចជាសហគមន៍កុលសម្ព័ន្ធក្នុងស្រុកអាចធ្វើការសម្រេចចិត្តដោយខ្លួនឯងលើទឹកដី ការធ្វើកសិកម្ម និងរបៀបរស់នៅផ្សេងទៀត ជំនួសឱ្យអ្វីៗទាំងអស់ត្រូវបានគ្រប់គ្រងដោយផ្ទាល់ពីឥណ្ឌា។

រហូត​មក​ដល់​ពេល​នេះ ការ​ចរចា​រវាង​ថ្នាក់​ដឹកនាំ​របស់តំបន់ Ladakh និង​រដ្ឋាភិបាល​ឥណ្ឌា មិន​ទាន់បាន​ដោះស្រាយ​បញ្ហា​នោះ​ទេ។ កិច្ចពិភាក្សាជុំថ្មីមួយត្រូវបានគ្រោងធ្វើនៅថ្ងៃទី ៦ ខែតុលាខាងមុខ។

គួរបញ្ជាក់ថា Ladakh មានសារៈសំខាន់ខ្លាំងណាស់ព្រោះវាជាប់ព្រំដែនប្រទេសចិន ហើយតំបន់នេះនៅតែតានតឹងបន្ទាប់ពីការប៉ះទង្គិចគ្នារវាងឥណ្ឌានិងចិនកាលពីឆ្នាំ ២០២០៕

អត្ថបទ៖ ប៊ុន សុភាព