ថៃ ​​ប្រកាស​អាសន្ន​ភ្លៀង​ធ្លាក់​ខ្លាំង​ក្នុង​ខេត្ត​ចំនួន​៥២ ខណៈឥទ្ធិពលព្យុះថ្មីជិតមកដល់

នាយកដ្ឋានឧតុនិយមថៃបានចេញការព្រមានពីភ្លៀងធ្លាក់ខ្លាំងពាសពេញតំបន់ចំនួនបី ដោយដាក់ខេត្តចំនួន ៥២ ឱ្យមានការប្រុងប្រយ័ត្នខ្ពស់ចំពោះទឹកជំនន់ភ្លាមៗ និងបំណាក់ដី ខណៈថៃកំពុងព្រួយបារម្ភពីឥទ្ធិពលព្យុះថ្មី Bualoi ខិតជិតមកដល់។ នេះបើយោងតាមការចេញផ្សាយរបស់សារព័ត៌មាន Khaosod នៅថ្ងៃទី២៦ខែកញ្ញា។

ភ្លៀងធ្លាក់ខ្លាំងបំផុត ត្រូវបានព្យាករណ៍នៅតំបន់ភាគខាងជើង ឦសាន និងខាងកើត ប្រទេសថៃ ជាពិសេសនៅខេត្ត Phitsanulok, Phetchabun, Loei, Chaiyaphum, Khon Kaen, Nakhon Ratchasima, Buri Ram, Chanthaburi និង Trat ។ ផ្នែកខ្លះនៃតំបន់កណ្តាល រួមទាំងទីក្រុងបាងកក ក៏នឹងប្រឈមនឹងភ្លៀងធ្លាក់ផងដែរ។

ការព្យាករណ៍នេះសន្មត់ថា អាកាសធាតុមានសភាពធ្ងន់ធ្ងរ ដោយសារខ្យល់មូសុងឆ្លងកាត់ភាគខាងជើង និងភាគឦសានខាងលើ ចូលទៅក្នុងប្រព័ន្ធសម្ពាធទាបលើប្រទេសឡាវ ដែលពង្រឹងដោយខ្យល់មូសុងនិរតីដ៏ខ្លាំងក្លាដែលគ្របលើសមុទ្រ Andaman ប្រទេសថៃ និងឈូងសមុទ្រថៃ។

លើសពីនេះក៏មានការ​ព្រមាន​អំពី​ដែន​សមុទ្រ​ ដោយរលក​សមុទ្រ​មាន​ពីកម្ពស់ពី ២-៣ ម៉ែត្រ​នៅ​សមុទ្រ​Andaman​ខាង​លើ និង​ជាង ៣ ម៉ែត្រ​នៅ​តំបន់​មាន​ខ្យល់​ព្យុះ។ ទូកតូចៗត្រូវបានណែនាំអោយនៅជាប់ច្រាំងយ៉ាងហោចណាស់មួយថ្ងៃទៀត ខណៈកប៉ាល់ទាំងអស់គួរតែប្រុងប្រយ័ត្នឲ្យបានខ្ពស់។

បន្ថែមលើក្តីបារម្ភ ព្យុះត្រូពិច Bualoi ដ៏ខ្លាំងក្លាកំពុងរំកិលពីប៉ាស៊ីហ្វិកចូលទៅក្នុងសមុទ្រចិនខាងត្បូង ហើយត្រូវបានគេរំពឹងថានឹងបោកបក់នៅភាគខាងជើងប្រទេសវៀតណាមចន្លោះពីថ្ងៃទី២៩ និង ៣០ ខែកញ្ញា។ អាជ្ញាធរថៃបារម្ភថាឥទ្ធិពលរបស់វាអាចធ្វើឱ្យមានភ្លៀងធ្លាក់នៅតំបន់ខ្លះនៃប្រទេសបន្ថែមទៀត។

គួរបញ្ជាក់ថានាយកដ្ឋានឧតុនិយមថៃកាលពីថ្ងៃទី២៤ ក៏បានចេញការព្រមានលើកទី ៩ របស់ខ្លួនចំពោះព្យុះទីហ្វុង Ragasa ដោយព្យាករណ៍ថានឹងមានភ្លៀងធ្លាក់ខ្លាំងនៅក្នុងខេត្តចំនួន ៣៦ នៅទូទាំងភាគខាងជើង ឦសាន កណ្តាល ខាងកើត និងទីក្រុងបាងកក ចាប់ពីថ្ងៃទី២៤ ដល់ថ្ងៃទី ២៦ ខែកញ្ញានេះផងដែរ៕

អត្ថបទ៖ ប៊ុន សុភាព