ព័ត៌មានអន្ដរជាតិ

គ្រាន់តែចូលកាន់អំណាចភ្លាម អានុទីន ពង្រីកការប្រើអំណាចយោធាគាបភាគខាងត្បូង

បានផុស

១០ ខែ មុន

នៅ

ថ្ងៃពុធ ១ តុលា ២០២៥

ដោយ

នាយករដ្ឋមន្ត្រីថៃនិងរដ្ឋមន្ត្រីមហាផ្ទៃ លោក អានុទីន ចានវីរៈគុល (Anutin Charnvirakul) បានចេញបញ្ជាពង្រីកការរឹតត្បិតដោយកម្លាំងយោធានៅតំបន់ភាគខាងប្រទេសថៃដែលកំពុងតែផ្ទុះនូវបញ្ហាអសន្តិសុខ ដោយសារតែការបង្កៃគ្រាប់បែក និង ការវាយប្រហារនៅតាមទីតាំងផ្សេងៗ។

នាយករដ្ឋមន្ត្រីថៃទី៣២ លោក Anutin Charnvirakul។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការផ្សាយរបស់សារព័ត៌មាន The Nation ស្រុកចំនួន២០ស្ថិតនៅភាគខាងត្បូងប្រទេសត្រូវបានពង្រីកវិធានការរឹតបន្តឹងសន្តិសុខរយៈពេល១ឆ្នាំ ចាប់តាំងពីថ្ងៃទី១ខែតុលានេះដល់ថ្ងៃទី៣០ខែកញ្ញាឆ្នាំ២០២៦។ រដ្ឋាភិបាលរបស់លោក អានុទីន បានផ្តល់ហេតុផលថា វិធានការនេះដើម្បីរក្សាស្ថិរភាព និងការពារសហគមន៍មូលដ្ឋាន ចំពេលមានហានិភ័យសន្តិសុខជាបន្តបន្ទាប់នៅក្នុងខេត្តទាំងនោះ។

គណៈរដ្ឋមន្ត្រថៃនៅថ្ងៃទី៣០ខែកញ្ញា បានប្រជុំនិងអនុម័តនូវសំណើររបស់ទីបញ្ជាការប្រតិបត្តិការសន្តិសុខផ្ទៃក្នុង (ISOC) ឲ្យពន្យាសេចក្តីប្រកាសស្តីពីការរឹតត្បិតសន្តិសុខក្រោមអំណាចយោធា នៅស្រុកចំនួន២០នៅភាគខាងត្បូងប្រទេសរយៈពេល១ឆ្នាំទៀត ស្របពេលដែលភាគខាងថៃប្រឈមនឹងអំពើហិង្សាដ៏សាហាវក្នុងរយៈពេលចុងក្រោយនេះដែលនាំទៅដល់អសន្តិសុខក្នុងប្រទេសថៃ។

មានការរិះគន់ថា ការពន្យាពេលលើការប្រតិបត្តិរបស់ ISOC នាំទៅដល់ការរំលោភបំពាន ការចាប់ខ្លួនដោយគ្មានការចោទប្រកាន់តាមអំណាចផ្លូវច្បាប់ និងការរឹតត្បិតលើការចល័តរបស់ប្រជាជននៅភាគខាត្បូង។ ក្តីកង្វល់ក៏បានលើកឡើងជុំវិញអំពីការខ្វះតម្លាភាពលើការត្រួតពិនិត្យលើការប្រតិបត្តិរបស់ ISOC ដែលមានប្រវត្តិជាយូរមកហើយ។

តាមការចេញផ្សាយរបស់វិទ្យាស្ថាន ISEAS-Yusof Ishak Institute ទីបញ្ជាការប្រតិបត្តិការសន្តិសុខផ្ទៃក្នុងរបស់យោធាថៃ (ISOC) ទទួលបន្ទុកលើគម្រោងកិច្ចការស៊ីវិលជាច្រើន ក្នុងអំឡុងពេលនៃការតស៊ូរបស់ប្រទេសជាមួយការបះបោរកុម្មុយនិស្តរវាងពាក់កណ្តាលទសវត្សរ៍ឆ្នាំ ១៩៦០និងពាក់កណ្តាលទសវត្សរ៍ឆ្នាំ ១៩៨០។

ចាប់តាំងពីរដ្ឋប្រហារខែកញ្ញា ឆ្នាំ ២០០៦និងខែឧសភា ឆ្នាំ ២០១៤ ដែលបានផ្តួលរំលំរដ្ឋាភិបាលជាប់ឆ្នោត ISOC ត្រូវបានផ្តល់អំណាចដ៏គ្រោះថ្នាក់ និងប្រើប្រាស់កាន់តែខ្លាំងឡើងដោយរបបយោធា ដើម្បីកំណត់ទិសដៅនយោបាយរបស់ប្រទេស។

អំណាចរបស់យោធាថៃ មិនត្រឹមតែប្រើកម្លាំងប៉ុណ្ណោះទេ ប៉ុន្តែក៏ប្រើអាវុធនយោបាយសង្គមផងដែរ។ ISOC តំណាងឱ្យឧបករណ៍ដ៏មានសក្តានុពលដែលក្រុមឥស្សរជនខាងអភិរក្សនិយម អាចបំផ្លាញ និងគ្រប់គ្រងលទ្ធិប្រជាធិបតេយ្យក្នុងការបោះឆ្នោត ហើយតាមរយៈនោះយោធាអាចរក្សាអំណាចរបស់ខ្លួន៕

រ៉ាន់ រើយ