មេដឹកនាំ​កូរ៉េខាងជើង អំពាវនាវ​ឲ្យ​មានកម្លាំង​ទ័ព​ជើងទឹកខ្លាំងជាងមុន ដើម្បី«ដាក់ទណ្ឌកម្មសត្រូវ»

មេដឹកនាំកូរ៉េខាងជើង លោក គីម ជុងអ៊ុន បានអំពាវនាវ​ឲ្យ​ពង្រឹងសមត្ថភាពប្រយុទ្ធរបស់កងទ័ពជើងទឹក ដោយនិយាយថា ពួកគេត្រូវតែអាច«ទប់ស្កាត់ ប្រឆាំង និងដាក់ទណ្ឌកម្ម​ឲ្យ​បានខ្លាំង​ក្លា» ចំពោះការញុះញង់របស់សត្រូវ។

យោងតាមទីភ្នាក់ងារសារព័ត៌មានកណ្តាលកូរ៉េ (KCNA) លោក គីម បានធ្វើការកត់សម្គាល់​នេះ​កាលពីថ្ងៃអាទិត្យ​ទី​៥​ខែ​តុលា​ឆ្នាំ​២០២៥ អំឡុងពេលចុះ​​ទៅធ្វើ​​ទស្សនកិច្ច​នាវាពិឃាត Choe Hyon ដែលជានាវាពិឃាតពហុបំណងទម្ងន់ ៥ ០០០​តោនដំបូងរបស់កូរ៉េខាងជើង។

លោក គីម បាននិយាយ​ថា «សមត្ថភាពដ៏អស្ចារ្យនៃកងទ័ពជើងទឹករបស់យើង គួរតែត្រូវបានអនុវត្តនៅក្នុងមហាសមុទ្រដ៏ធំសម្បើម ដើម្បីទប់ស្កាត់ ឬប្រឆាំង និងដាក់ទណ្ឌកម្មលើការបង្កហេតុរបស់សត្រូវ» ដោយសង្កត់ធ្ងន់ថា គណបក្សកម្មករដែលកំពុងកាន់អំណាចនឹងជំរុញទៅមុខ«ដោយគ្មានការជាប់គាំងសូម្បីតែបន្តិច» ក្នុងការពង្រីកអំណាចប្រយុទ្ធរបស់កងទ័ពជើងទឹក។

កូរ៉េខាងជើង​បាន​បង្ហាញ​នាវា​ Choe Hyon ក្នុង​ខែមេសា ដោយ​ពណ៌នា​ថា ​វា​បាន​បំពាក់​ដោយ​មីស៊ីល​​បាលិស្ទិក​ល្បឿន​លឿន មីស៊ីល​គ្រូស​ និង​សមត្ថភាព​វាយប្រហារ​ផ្សេងទៀត។ កាលពីខែមិថុនា ប្រទេសនេះបានបើកដំណើរការ​នាវា​មួយ​គ្រឿង​ទៀតនៃថ្នាក់ដូចគ្នា​នេះ​គឺ Kang Kon បន្ទាប់ពីជួសជុល​រួច​រាល់​ក្រោយ​វាបានលិច​ទឹក​​នៅ​ចំ​ថ្ងៃសម្ពោធកាល​ពី​ខែឧសភា។

រដ្ឋាភិបាល​លោក គីម បានប្រកាសផែនការដាក់ឲ្យ​ប្រើប្រាស់នាវាពិឃាត​ទម្ងន់ ៥ ០០០​តោនបន្ថែមទៀតនៅខែតុលាឆ្នាំ​២០២៦​ខាង​មុខ ដោយបានគូសបញ្ជាក់ពីកិច្ចខិតខំប្រឹងប្រែងរបស់ខ្លួន ដើម្បីបង្កើនកម្លាំងទ័ពជើងទឹក រួមជាមួយនឹងកម្មវិធីមីស៊ីល និងនុយក្លេអ៊ែរ៕

ដោយ៖ ឈាង