ប្រទេសស៊ីរី រៀបចំការបោះឆ្នោតជាលើកដំបូងចាប់តាំងពីរបបលោក អាសាដ ដួលរលំ

ប្រទេសស៊ីរីបានរៀបចំការបោះឆ្នោតសភាលើកដំបូងរបស់ខ្លួន ជិតមួយឆ្នាំបន្ទាប់ពីការទម្លាក់មេដឹកនាំដ៏យូរលោក បាស្សា អាល់អាសាដ (Bashar Al-Assad) ដែលជាការកត់សម្គាល់ជំហានបណ្តោះអាសន្នក្នុងការផ្លាស់ប្តូរនយោបាយរបស់ស៊ីរី បន្ទាប់ពីសង្គ្រាមស៊ីវិលជាងមួយទសវត្សរ៍។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៦ខែតុលា។

សភាប្រជាជនថ្មីដែលមានសមាជិក ២១០ នាក់នឹងបម្រើការរយៈពេល ៣០ខែ ហើយព្រាងរដ្ឋធម្មនុញ្ញ និងច្បាប់បោះឆ្នោតថ្មី ដោយមានអាសនៈពីរភាគបីត្រូវបានជ្រើសរើសដោយការិយាល័យបោះឆ្នោតតាមខេត្ត និងមួយភាគបីត្រូវបានតែងតាំងដោយប្រធានាធិបតីបណ្តោះអាសន្ន Ahmed al-Sharaa ។

ការបោះឆ្នោតបានធ្វើឡើងក្រោមសន្តិសុខដ៏តឹងរ៉ឹងនៅក្នុងទីក្រុង Damascus, Aleppo, Latakia និងទីក្រុងផ្សេងទៀត ទោះបីជាការបោះឆ្នោតត្រូវបានពន្យារពេលនៅក្នុងតំបន់ Sweida និងតំបន់ដែលគ្រប់គ្រងដោយជនជាតិឃឺដក៏ដោយ។ បេក្ខជនបានប្រកួតប្រជែងយ៉ាងខ្លាំងក្លា ដោយអ្នកបោះឆ្នោតបានលើកឡើងពីភាពបើកចំហ និងសេរីភាពច្រើនជាងបើធៀបនឹងការបោះឆ្នោតសម័យលោក Assad ទោះបីជាអ្នករិះគន់បានអះអាងថា ប្រព័ន្ធនេះនៅតែអនុគ្រោះដល់ឥស្សរជន និងខ្វះលទ្ធិប្រជាធិបតេយ្យពេញលេញក៏ដោយ។

នៅទីក្រុង Latakia ដែលជាមូលដ្ឋានរឹងមាំរបស់របបលោក Assad បេក្ខជននិកាយស៊ុននីទទួលបានជ័យជំនះ បើទោះបីជាភាពតានតឹងផ្នែកនិកាយបន្តអូសបន្លាយរក៏ដោយ។ មេដឹកនាំបណ្តោះអាសន្នបានសាទរការបោះឆ្នោតនេះថាជាជំហានរួមមួយឆ្ពោះទៅរកការកសាងឡើងវិញ ខណៈដែលអ្នកចូលរួមបានពណ៌នាថាវាជាដំណើរការបោះឆ្នោតដ៏មានអត្ថន័យលើកដំបូងក្នុងជីវិតរបស់ពួកគេ៕

អត្ថបទ៖ ប៊ុន សុភាព