សុខភាព

ការរបើកសុកកូនមុនសម្រាល និងគ្រោះថ្នាក់ពីម្ដាយទៅកូន

បានផុស

៥ years មុន

នៅ

ថ្ងៃចន្ទ ៣ ឧសភា ២០២១

ដោយ

ការរបើកសុខកូនមុនសម្រាល គឺជាការរបើកណាមួយរបស់សុក ដែលធម្មតានៅជាប់នឹងស្បូន ហើយដែលបណ្តាលឲ្យមានកំណកដុំឈាមមិនធម្មតានៅចន្លោះសុកកូន និងស្បូន។ ការរបើកសុកកូននេះធ្វើឲ្យមានការថយចុះសារជាតិចិញ្ចឹមពីម្តាយទៅកូន ជាហេតុធ្វើឲ្យកូនអាចស្លាប់ក្នុងពោះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក) មូលហេតុ ដែលធ្វើឲ្យមានការរបើកសុកកូនមុនសម្រាល

ជួនកាលយើងមិនដឹងមូលហេតុច្បាស់លាស់ដែលធ្វើឲ្យរបើកសុកកូននេះទេ តែមានកត្តាមួយចំនួនអាចឲ្យរបើកសុកកូនបានដូចជា៖

– ការបុកប៉ះទង្គិចទៅលើពោះស្ត្រី

– ការឡើងសំពាធឈាមខ្លាំង

– មានជំងឺបម្រុងក្រឡាភ្លើង

– មានទឹកភ្លោះច្រើន

– ស្ត្រីអាយុច្រើនមានកូន

– មានកូនក្នុងពោះច្រើន

– ការចោះទឹកភ្លោះ (amniocentèse)

– ជំងឺទឹកនោមផ្អែម

– ស្ត្រីមានបញ្ហាកំណកឈាម

ខ) រោគសញ្ញា ដែលអាចឲ្យយើងដឹង ឬសង្ស័យ

– ការឈឺពោះភ្លាមៗ និង ខ្លាំងខុសធម្មតា

– មានការធ្លាក់ឈាមខ្មៅបន្តិចបន្តួចតាមទ្វារមាស

– ជួនកាលស្ត្រីមានសភាពស្លេកស្លាំង ឡេសឡាស់ឈានដល់ការបាត់បង់ស្មារតីដោយខ្វះគ្រាប់ឈាម

– ការស្ទាបពោះស្ត្រី មានលក្ខណៈឈឺខ្លាំង

គ) ការប្រឈមទៅលើស្ត្រី និងកូនក្នុងផ្ទៃ

– សម្រាប់ស្ត្រីពរពោះ

• បណ្តាលឲ្យបាត់បង់ឈាមច្រើន

• បណ្តាលឲ្យមានបញ្ហាកំណកឈាម

• ប្រឈម នឹងការវះកាត់បន្ទាន់

– សម្រាប់កូន

• ធ្វើឲ្យខ្វះអុកស៊ីហ្សែនសម្រាប់កូន

• ធ្វើឲ្យកូនខ្សោយ

• កូនអាចស្លាប់ក្នុងពោះ

ឃ) ការព្យាបាល ក្នុងករណីបែបនេះ

– ការវះកាត់យកកូនចេញជាបន្ទាន់ ប្រសិនបើនៅរស់

– ការសម្រាលតាមទ្វាមាស ប្រសិនបើកូនស្លាប់ហើយសភាពម្តាយអំណោយផលក្នុងការសម្រាល

– អន្តរាគមន៍ដោយប្រើថ្នាំ រួមទាំងបញ្ចូលឈាម ដើម្បីសង្គ្រោះម្តាយទៅតាមករណីនីមួយៗ

បញ្ជាក់៖ ការពិនិត្យដោយល្អិតល្អន់ រួមជាមួយការធ្វើអេកូសាស្ត្រ អាចឲ្យក្រុមគ្រូពេទ្យធ្វើរោគវិនិច្ឆ័យ ឬសង្ស័យពីការរបើកសុកកូនមុនសម្រាលនេះ ហើយអាចធ្វើការសង្គ្រោះបន្ទាន់ជួយដល់ស្ត្រីជាម្តាយ និងកូនក្នុងផ្ទៃ។ “ ប្រសិនបើមានធ្លាក់ឈាមមិនធម្មតា មានសភាពឡេសឡាស់ ឫការបម្រាស់របស់កូនថយចុះជាដើម-ល- ស្ត្រីពរពោះគួរតែអញ្ជើញមកជាបន្ទាន់ ដើម្បីពិគ្រោះជាមួយគ្រូពេទ្យឯកទេសនៅមន្ទីរពេទ្យកាល់ម៉ែត! ”៕

អត្ថបទ៖ រស្មី

សូមចុចអាន៖ ហេតុអ្វីបានជាទារកទើបកើត ត្រូវរុំខ្លួន?