សុខភាព

ស្វែងយល់ពីជំងឺដុំស្បូន ដែលស្ដ្រីគ្រប់រូបគួរប្រុងប្រយ័ត្ន

បានផុស

៥ years មុន

នៅ

ថ្ងៃសុក្រ ២ កក្កដា ២០២១

ដោយ

ស្ត្រីភាគច្រើនតែងតែមានការព្រួយបារម្ភអំពីសាច់ដែលដុះនៅលើស្បូន។ ជាទូទៅដុំសាច់ស្បូន ជាដុំសាច់ស្លូត ហើយមិនសូវឲ្យមានជាសញ្ញាអ្វីទេ។ វាច្រើនកើតលើស្ត្រីដែលមាន អាយុលើសពី៣០ឆ្នាំ។ វាអាចមានទំហំចាប់ពីប៉ុនគ្រាប់ម្រេច ដល់ប៉ុនផ្លែក្រូចថ្លុង។

Uterine Fibroid Disease | Minimally Invasive Vascular

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១) ដុំស្បូនមានបីទីតាំង៖

– ដុំសាច់នៅលើសាច់ស្បូន (fibrome sous séreux)

– ដុំសាច់នៅក្នុងសាច់ស្បូន (fibrome interstitiel)

– ដុំសាច់នៅក្នុងរន្ធស្បូន (fibrome sous muqueux)

២) មូលហេតុ៖

រហូតមកដល់បច្ចុប្បន្ននេះ គេមិនទាន់រកឃើញមូលហេតុច្បាស់លាស់នៅឡើយទេ។ ប៉ុន្តែគេសង្កេតឃើញថា មានកត្តាប្រឈមមួយចំនួនដូចជា:

– កត្តាអ័រម៉ូន (facteurs hormonaux): គេសង្កេតឃើញថា ស្ត្រីពេញវ័យ ឬ ក្នុងវ័យបន្តពូជមានការ កកើត ឬ កើនទំហំនៃដុំសាច់ស្បូន តែដល់ពេលស្ត្រីអស់រដូវ ទំហំដុំស្បូនរួមតូចមកវិញ។

– តំណពូជ

– ជាតិសាស្ត្រ: គេច្រើនឃើញពួកពូជសាសន៍ស្បែកខ្មៅមានដុះសាច់ស្បូនច្រើនជាងពូជសាសន៍ស្បែកស។

៣) រោគសញ្ញារបស់ដុំស្បូន៖

– មានឈាមរដូវធ្លាក់ច្រើនជាងធម្មតា ដុំៗ ឬអាចមានឈាមធ្លាក់ពាក់កណ្ដាលវដ្ដរដូវ

– ចុកពោះពេលមករដូវ

– ឈឺធ្ងន់ៗក្នុងអាងត្រគាក

– បត់ជើងតូចញឹកញាប់ ទល់លាមក

៤) ផលប៉ះពាល់៖

– ធ្លាក់ឈាមរហូតធ្វើឲ្យស្លេកស្លាំង

– ការបង្កកំណើតមានការថយចុះ ដោយសារទីតាំងរបស់ដុំស្បូន

– ពេលមានផ្ទៃពោះ វាអាចបង្កឲ្យកូនរលូត ឬកើតមិនគ្រប់ខែ

– សង្កត់ទៅលើសរីរាង្គជិតខាង បើដុំនៅខាងមុខ វាសង្កត់លើប្លោកនោម ធ្វើឲ្យរំខានដល់ ការបត់ជើងតូច (នោមញឹក) បើសង្កត់ខាងក្រោយ ធ្វើឲ្យទល់លាមក។

៥) ការព្យាបាល៖

– ដោយការប្រើថ្នាំលេប ដែលកំណត់ដោយគ្រូពេទ្យជំនាញ

– ដោយការវះកាត់ ៖

• ដុំសាច់នៅលើសាច់ស្បូន និង ដុំសាច់នៅក្នុងសាច់ស្បូន: បកយកដុំសាច់ចេញ ឬ កាត់ស្បូន (coelio scopie ឬ laparotomie)

• ដុំសាច់នៅក្នុងរន្ធស្បូន: កាត់ស្បូន ឬ កាត់ដុំសាច់ស្បូនដែលមានទំហំតូចល្មម ដោយធ្វើការវះកាត់តាមក្រោម (hystéroscopie)។

បញ្ជាក់៖ បច្ចេកទេសវះកាត់ជំនាញ អមដោយបច្ចេកវិទ្យាវេជ្ជសាស្ត្រទំនើបថ្មីៗចុងក្រោយបង្អស់ កំពុងតែដំណើរការជាប្រចាំនៅមន្ទីរពេទ្យកាល់ម៉ែត។

បើមានអាការ:ដូចបានជម្រាបជូខាងលើ សូមមេត្តាមកពិគ្រោះជាមួយវេជ្ជបណ្ឌិតជំនាញនៅមន្ទីរពេទ្យកាល់ម៉ែតដើម្បីស្វែងរកមូលហេតុពិតប្រាកដ និងស្វែងយល់អំពីជម្រើសនៃការព្យាបាលឲ្យបានត្រឹមត្រូវ ប្រកបដោយប្រសិទ្ធិភាព និងសុវត្ថិភាពខ្ពស់៕

អត្ថបទ៖ រស្មី

សូមចុចអាន៖ ការគ្មានកូន និងរលូតកូនញឹកញាប់ អាចបណ្តាលមកពីជំងឺស្អិតស្បូន