វ៉ាក់សាំង Sputnik V កាត់បន្ថយ អត្រាមរណភាពមនុស្សវ័យចំណាស់ ដល់ទៅ៩៦,៦%

មូលនិធិវិនិយោគផ្ទាល់របស់រុស្ស៊ី (RDIF) បាននិយាយកាលពីថ្ងៃចន្ទទី១ខែវិច្ឆិកាថា ការសិក្សាមួយដែលធ្វើឡើងដោយក្រសួងសុខាភិបាលនៃទីក្រុង Buenos Aires ប្រទេសអាហ្សង់ទីន បានបង្ហាញពីប្រសិទ្ធភាពខ្ពស់នៃវ៉ាក់សាំងកូវីដ Sputnik V ដែលផលិតដោយរុស្ស៊ី ក្នុងការការពារមនុស្សដែលមានអាយុចាប់ពី ៦០ ឆ្នាំឡើងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់ RDIF បាននិយាយថា “លទ្ធផលនៃការសិក្សាបង្ហាញថា អត្រាឆ្លងបានថយចុះជាង ៨៨% ក្នុងចំណោមអ្នកដែលបានចាក់វ៉ាក់សាំងនេះគ្រប់២ដូស ហើយអត្រាមរណភាពក្នុងក្រុមអាយុនេះ បានថយចុះរហូតដល់ទៅ៩៦,៦%”។

មនុស្សវ័យចំណាស់អាយុលើស៦០ឆ្នាំ ប្រមាណ ៦៦០,០០០នាក់ក្នុងទីក្រុង Buenos Aires ដែលត្រូវបានចាក់វ៉ាក់សាំង Sputnik V, AstraZeneca ឬ Sinopharm បានចូលរួមក្នុងការស្រាវជ្រាវនេះ ដែលធ្វើឡើងនារដូវក្តៅឆ្នាំ២០២១។

យោងតាមការសិក្សាមួយផ្សេងទៀត បានបង្ហាញថា ដូសទី១នៃ Sputnik V បានបញ្ចេញប្រសិទ្ធភាពពី ៧៨,៦ ទៅ ៨៣,៧% ចំពោះមនុស្សដែលមានអាយុពី ៦០ ដល់​ ៧៩ឆ្នាំ។

មនុស្សភាគច្រើននៅក្នុងទីក្រុង Buenos Aires បានទទួលវ៉ាក់សាំងរុស្ស៊ីប្រភេទនេះ ហើយបានជួយករណីឆ្លងកូវីដថ្មី ធ្លាក់ចុះដល់ទៅ១៥ដង ក្នុងរយៈពេល៥ខែចុងក្រោយ។ នេះបើយោងតាម ​​RDIF៕

ប្រែសម្រួល៖ Vann Vann

ប្រភព៖ ANI

ចុចអាន៖ វ៉ាក់សាំង Sputnik V ដែល កម្ពុជា អនុញ្ញាតប្រើប្រាស់បន្ទាន់ បើចាក់ជាដូសជំរុញ ក៏មិនមានផលប៉ះពាល់ដែរ