មេរោគអេដស៍បំប្លែងខ្លួនប្រភេទថ្មី ឆ្លងកាន់តែខ្លាំង ធ្វើឲ្យធ្លាក់ខ្លួនឈឺកាន់តែលឿន (មានវីដេអូ)

មេរោគអេដស៍បំប្លែងខ្លួនប្រភេទថ្មី ដែលគេស្គាល់ថា VB គឺជាប្រភេទវីរុសដែលងាយឆ្លងជាទីបំផុត។ លើសពីនេះ វីរុសអេដស៍បំប្លែងខ្លួន VB ក៏អាចធ្វើឲ្យអ្នកឆ្លងជំងឺ ធ្លាក់ខ្លួនឈឺលឿនជាងមុនទ្វេដងផងដែរ។

យោងតាមការសិក្សារបស់សាកលវិទ្យាល័យ Oxford នៃប្រទេសអង់គ្លេស បានបង្ហាញថា វីរុស VB ឥឡូវនេះបានឆ្លងដល់មនុស្សយ៉ាងតិច១០៩នាក់ហើយ។ ក្នុងនោះ មានរហូតដល់១០៧នាក់ឯណោះ ដែលស្ថិតនៅក្នុងប្រទេសហូឡង់។

ថ្វីត្បិតតែគេហៅថាជាវីរុសបំប្លែងខ្លួនប្រភេទថ្មីក៏ដោយ ប៉ុន្តែ VB ត្រូវបានគេគិតថា បានចរាចរយ៉ាងស្ងប់ស្ងាត់នៅក្នុងប្រទេសហូឡង់អស់រយៈពេលជាយូរមកហើយ។ យោងតាមគេហទំព័រ Contagion Live, ការវិភាគហ្សែនបានបង្ហាញថា បម្រែបម្រួលនេះបានកកើតឡើងនៅក្នុងទសវត្សរ៍ឆ្នាំ១៩៩០ ពីវីរុសបំប្លែងខ្លួន De Novo។

មេរោគអេដស៍ អាចធ្វើឲ្យប្រព័ន្ធភាពស៊ាំចុះខ្សោយបន្តិចម្តងៗ។ វាកាត់បន្ថយសមត្ថភាពនៃរាងកាយរបស់មនុស្ស ក្នុងការប្រយុទ្ធប្រឆាំងនឹងការឆ្លងមេរោគ និងជំងឺផ្សេងៗ។ ប៉ុន្តែដោយសារវីរុសបំប្លែងខ្លួន VB ខ្លាំងជាង នោះអ្នកដែលឆ្លងមេរោគនឹងមានហានិភ័យក្នុងការវិវត្តទៅជាជំងឺអេដស៍កាន់តែលឿន។

VB ក៏មានផ្ទុកមេរោគខ្ពស់ជាងប្រភេទមុនៗពី ៣.៥ ទៅ ៥.៥ដងផងដែរ។ អ្នកដែលឆ្លងមេរោគ VB អាចចម្លងមេរោគទៅអ្នកដទៃបានយ៉ាងងាយស្រួលជាទីបំផុត។

ទោះបីជាយ៉ាងណាក៏ដោយ ដំណឹង​ល្អ​គឺ​ថា ​វិធីសាស្ត្រ​ព្យាបាល​មេរោគ​អេដស៍នាពេល​បច្ចុប្បន្ន គឺអាច​ដំណើរការ​ល្អបើ​ធៀប​នឹងវីរុស VB៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ World Today News

ចុចអាន៖ មេរោគអេដស៍បំប្លែងខ្លួនប្រភេទថ្មីដ៏សាហាវ ឆ្លងមនុស្សជាង ១០០នាក់ហើយ