សុខភាព

ផ្លែសារី មិនត្រឹមផ្អែមឆ្ងាញ់ តែអត្ថប្រយោជន៍ ចំពោះសុខភាពវិញ ពិតជានឹកស្មានមិនដល់

បានផុស

២ years មុន

នៅ

ថ្ងៃពុធ ២០ មេសា ២០២២

ដោយ

សារីគឺជាផ្លែឈើស្រួយ ផ្អែម ឆ្ងាញ់ ហើយសម្បូរដោយកាកសរសៃច្រើន ដែលផ្ដល់ប្រយោជន៍ដល់រាងកាយយើង។ ក្រៅពីកាកសរសៃ ផ្លែសារីអាចជួយប្រឆាំងនឹងអុកស៊ីតកម្ម ការរលាក បង្កើនភាពស៊ាំ ជួសជុល DNA ពីជាតិពុល និងការរំលាយអាហារបានល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខាងក្រោមនេះជាគុណប្រយោជន៍ទាំង ៦យ៉ាងរបស់ផ្លែសារី៖

១. ផ្ទុកថាមពលគ្រប់គ្រាន់ ហើយមិនធ្វើឲ្យឡើងទម្ងន់ ចង់ញ៉ាំច្រើនប៉ុណ្ណាក៏បានដោយមិនបាច់បារម្ភរឿងឡើងគីឡូនោះទេ ព្រោះថាសារីធម្មតាផ្ទុកថាមពល ៩៦កាឡូរី ។ការសិក្សាបានឲ្យដឹងថា បុរសត្រូវការថាមពល ២៧០០គីឡូកាឡូរី រីឯស្ត្រីវិញត្រូវការថាមពល ២២០០គីឡូកាឡូរី អ្វីដែលសំខាន់គឺថាមពលនោះបានមកពីអាហារសុខភាព និងធម្មជាតិ( មិនមែនអាហារកែច្នៃ )។ ដូច្នេះហើយសារីគឺជា ជម្រើសដ៏ល្អដើម្បីបំពេញថាមពលសម្រាប់អ្នកមិនចង់ឡើងគីឡូ។

២.សម្បូរជាតិកាកសរសៃ ផ្លែសារីល្អបំផុតត្រង់ជាតិកាកសរសៃហ្នឹងហើយ ទាំងរលាយ និងមិនរលាយ។ វាផ្ទុកជាតិកាកសរសៃពី ៥.៥ក្រាម ទៅ ៧ក្រាម ដែលជួយឲ្យយើងឆាប់ឆ្អែត។ មិនទាន់អស់ទេ ជាតិកាកសរសៃក៏ជួយរាងកាយយើងមិនឲ្យមានជាតិខ្លាញ់ទៀតផង បើជាតិកាកសរសៃដែលមិនរលាយវិញធ្វើឲ្យយើងបត់ជើងស្រួល មិនឲ្យទល់លាមក។ លើសពីនេះទៀត ជាតិកាកសរសៃអាចកាត់បន្ថយកូលេស្តេរ៉ុលដែលប៉ះពាល់បេះដូងយើង និងជួយរក្សាស្ថេរភាពនៃជាតិស្ករដែរ។

៣.បណ្ដេញជាតិពុល ជាតិកាកសរសៃដែលមានក្នុងផ្លែសារី អាចប្រឆាំងនឹងការរលាកពោះវៀនធំបានដោយការស្រូបទឹកដែលរក្សាទុកក្នុងពោះវៀនធំ និងធ្វើឲ្យចលនាពោះវៀនកាន់តែងាយស្រួល។ អត្ថប្រយោជន៍ដ៏ធំមួយទៀតពីជាតិកាកសរសៃគឺ បន្សាបជាតិពុល តាមរយៈធ្វើឲ្យចលនាពោះវៀនរលូន និងទៀងទាត់ កម្ចាត់ជាតិពុលជារៀងរាល់ថ្ងៃ ដោយមិនបាច់បារម្ភច្រើន។

៤.ផ្ដល់វីតាមីន C បង្កើនភាពស៊ាំ សារធាតុចិញ្ចឹមសំខាន់មួយទៀតដែលផ្លែសារីមានគឺ វីតាមីន C។ វីតាមីន C ប្រហែល១០មីលីក្រាមមាននៅក្នុងផ្លែនេះ។ វីតាមីន C គឺជាសារធាតុប្រឆាំងអុកស៊ីតកម្មដែលការពាររាងកាយពីឌីកាល់សេរី និងរក្សាវ័យឱ្យនៅក្មេង ក៏ដូចជា មានសុខភាពល្អ ។ វាដើរតួយ៉ាងសំខាន់ក្នុងសុខភាព និងជួសជុលជាលិកានៃស្បែក សរសៃចង និងឆ្អឹង។

៥.ប្រឆាំងការរលាក ការរលាកគឺជា ដំណើរការធម្មជាតិដែលរាងកាយអាចជាសះស្បើយពីការគ្រោះថ្នាក់ ឬរបួសណាមួយ។ ប៉ុន្តែបើការរលាកនៅតែបន្ត វាក្លាយទៅជារ៉ាំរ៉ៃ។ ដូច្នេះសារីផ្ទុកសារធាតិពួក Phytonutrient ដូចជា Flavonoids ដែលប្រឆាំងការលាក។ ការសិក្សាបានបង្ហាញថា Phytonutrients ប្រឆាំងអុកស៊ីតកម្ម ប្រឆាំងនឹងការរលាក ប្រឆាំងនឹងប្រតិកម្មទំនាស់ ការកន្ត្រាក់ជំងឺមហារីក ប្រឆាំងភាពចាស់ ការពារប្រព័ន្ធប្រសាទ និងច្រើនទៀត។

៦.ជំនួយខួរក្បាល ឆ្អឹងរឹងមាំ សារធាតុចិញ្ចឹមដ៏សំខាន់មួយទៀតនៅក្នុងផ្លែសារីគឺប៉ូតាស្យូម ។ វាជួយដល់ចង្វាក់បេះដូងលោតប្រក្រតី ជួយដល់សរសៃប្រសាទ សាច់ដុំរបស់រាងកាយ រក្សាឆ្អឹងឱ្យរឹងមាំ និងមានសុខភាពល្អជាដើម ។ ប៉ូតាស្យូមជួយជំរុញសកម្មភាពសរសៃប្រសាទ ធ្វើឱ្យក្លាយជាសារធាតុចិញ្ចឹមដ៏សំខាន់សម្រាប់សុខភាពខួរក្បាល។ប៉ូតាស្យូមត្រូវបានគេស្គាល់ថាជួយបង្កើនកម្រិតខួរឆ្អឹង និងរក្សាឆ្អឹងឱ្យរឹងមាំ។

សរុបមក យើងអាចនិយាយបានថា ផ្លែសារី គឺជាអាហារដ៏មានអត្ថប្រយោជន៍យ៉ាងខ្លាំងចំពោះសុខភាពទូទៅនៃរាងកាយមនុស្ស។ ការទទួលទានសារីមួយផ្លែក្នុងមួយថ្ងៃអាចជួយឱ្យអ្នកស្រកទម្ងន់ បន្សាបជាតិពុលក្នុងប្រព័ន្ធរាងកាយរក្សាបេះដូង ខួរក្បាល និងឆ្អឹងឱ្យមានសុខភាពល្អ ក៏ដូចជាប្រយុទ្ធប្រឆាំងនឹងជំងឺជាច្រើនផងដែរ ៕

ប្រែសម្រួល៖ ស្រីខួច

ចុចអាន៖ផ្លែឈើទាំង ៥ នេះ ជនជាតិ ជប៉ុន តែងណែនាំញ៉ាំក្នុងរដូវរងា និងស្លឹកឈើជ្រុះ

ចុចអាន៖ផ្លែសារី ល្អបំផុតសម្រាប់ស្ត្រីពពោះ និងកូនក្នុងផ្ទៃ