ញូវយ៉ក ប្រកាសអាសន្នជំងឺគ្រុនស្វិតដៃជើង ដោយភ័យថា មានអ្នកឆ្លងរាប់ពាន់នាក់ទៅហើយ

ក្រុមមន្ត្រីរដ្ឋញូវយ៉ក បានប្រកាសពីគ្រោះមហន្តរាយជុំវិញការផ្ទុះជំងឺគ្រុនស្វិតដៃជើងនៅក្នុងរដ្ឋនេះ។

សេចក្តីប្រកាសនេះ ធ្វើឡើងដោយការិយាល័យរបស់អភិបាលរដ្ឋ លោកស្រី Kathy Hochul កាលពីថ្ងៃសុក្រទី០៩ខែកញ្ញា។

នៅក្នុងសេចក្តីប្រកាស ក្រុមមន្ត្រីបាននិយាយថា វិធានការនេះ អនុញ្ញាតឲ្យភ្នាក់ងាររដ្ឋចាំបាច់ទាំងអស់ ចាត់វិធានការសមស្រប ដើម្បីជួយដល់រដ្ឋាភិបាលក្នុងតំបន់ និងបុគ្គលក្នុងការទប់ស្កាត់ រៀបចំ ឆ្លើយតប និងសង្គ្រោះ ពីគ្រោះអាសន្ន។

រដ្ឋនេះ បានរកឃើញករណីនៃមេរោគគ្រុនស្វិតដៃជើងនៅក្នុងតំបន់ Rockland កាលពីថ្ងៃទី២១ខែកក្កដា។ ចាប់តាំងពីពេលនោះមក ការពិនិត្យមើលទឹកសំណល់ ក៏បានរកឃើញមេរោគនៅក្នុងទីក្រុងញូវយ៉ក និងតំបន់ Orange និង Sullivan។ កាលពីថ្ងៃសុក្រ ក្រុមមន្ត្រីបានបង្ហាញថា តំបន់ Nassau ក៏ បានរកឃើញមេរោគនៅក្នុង ទឹកសំណល់ផងដែរ។

មជ្ឈមណ្ឌលគ្រប់គ្រង និងបង្ការជំងឺ (CDC) បានបង្ហាញក្នុងខែសីហាថា ការស៊ើបអង្កេតបន្ថែម បានរកឃើញសំណាកវិជ្ជមាននៃមេរោគស្វិតដៃជើងយ៉ាងតិច ២១ នៅក្នុងទីក្រុងញូវយ៉ក។

កាលពីខែមុន មន្ត្រីក្នុងតំបន់ Rockland County បានព្រមានថា ទោះគិតត្រឹមពេលនេះ ទើបតែមានករណីតែមួយត្រូវបានរកឃើញក៏ដោយ ប៉ុន្តែចំនួនពិតប្រាកដនៃអ្នកឆ្លងនៅញូវយ៉កអាចមានរាប់ពាន់នាក់ឯណោះ៕

ប្រែសម្រួល៖ Vann Vann

ប្រភព៖ Daily Mail 

ចុចអាន៖ សហរដ្ឋអាមេរិក រកឃើញករណីជំងឺគ្រុនស្វិតដៃជើង ជាលើកដំបូង ក្នុងរយៈពេលជិតមួយទសវត្សរ៍