ព័ត៌មានអន្ដរជាតិ

ថៃចេញការព្រមានពលរដ្ឋខ្លួន ក្រោយជំងឺគ្រុនស្វិតដៃជើងផ្ទុះឡើងជាថ្មីនៅឡាវ

បានផុស

៧ ខែ មុន

នៅ

ថ្ងៃអង្គារ ៤ វិច្ឆិកា ២០២៥

ដោយ

Chheang

នាយកដ្ឋានគ្រប់គ្រងជំងឺរបស់ប្រទេសថៃ (DDC) បានចេញសេចក្តីជូនដំណឹងដល់អ្នកដំណើរដែលគ្រោងនឹងទៅលេងប្រទេសឡាវ បន្ទាប់ពីករណីនៃជំងឺគ្រុនស្វិតដៃជើងប្រភេទថ្មី ត្រូវបានរកឃើញនៅក្នុងខេត្ត Savannakhet។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃចន្ទទី៣ខែវិច្ឆិកា នាយកដ្ឋានថៃបានប្រកាសថា ការរីករាលដាលនៃមេរោគជំងឺគ្រុនស្វិតដៃជើងប្រភេទទី១ (cVDPV1) ត្រូវបានរកឃើញនៅក្នុងកុមារពីរនាក់ដែលគ្មានរោគសញ្ញានៅក្នុងទីក្រុង Savannakhet កាលពីថ្ងៃទី៧ខែតុលា បន្ទាប់ពីករណីមុនកើតនៅក្នុងខែសីហា ពាក់ព័ន្ធនឹងកុមារដែលមានអាការៈខ្សោយអវយវៈ។

DDC បានរៀបរាប់ថា «នេះបង្ហាញពីការផ្ទុះឡើងនៃជំងឺនៅក្នុងតំបន់»។

លោកវេជ្ជបណ្ឌិត Montien Kanasawat អគ្គនាយក DDC បានបញ្ជាក់ថា មេរោគនេះត្រូវបានរកឃើញនៅក្នុងសំណាកលាមកពីកុមារពីរនាក់ ដែលជាប់ពាក់ព័ន្ធទៅនឹងករណីដំបូង។ លោកបានព្រមានថា «មានហានិភ័យនៃជំងឺរាលដាលដល់ប្រទេសថៃ ជាពិសេសនៅតាមតំបន់ព្រំដែនដែលមានវ៉ាក់សាំងទាប»។

ជំងឺគ្រុនស្វិតដៃជើង គឺជាការឆ្លងមេរោគដ៏ធ្ងន់ធ្ងរដែលវាយប្រហារប្រព័ន្ធសរសៃប្រសាទ ដែលអាចនាំឲ្យខ្វិន ឬស្លាប់។ វារីករាលដាលតាមរយៈអាហារ ឬទឹកដែលមានមេរោគ ហើយមិនមានការព្យាបាលទេ ប៉ុន្តែការចាក់វ៉ាក់សាំងផ្តល់នូវការការពារប្រកបដោយប្រសិទ្ធភាព។

លោកវេជ្ជបណ្ឌិត Direk Khampaen អគ្គនាយករងនៃ DDC បាននិយាយថា ជាការឆ្លើយតប មន្រ្តីត្រួតពិនិត្យជំងឺបានបង្កើនការឃ្លាំមើល នៅតាមច្រកព្រំដែនរវាងប្រទេសថៃ និងឡាវ រួមទាំងការពិនិត្យអ្នកដំណើរ និងតាមដានរបាយការណ៍សុខភាពក្នុងតំបន់។

លោកបានជំរុញឲ្យមាតាបិតាធានាថា កុមារថៃអាយុពី១ដល់៥ឆ្នាំ និងកុមារបរទេសអាយុក្រោម១៥ឆ្នាំ ដែលរស់នៅក្នុងខេត្តជាប់ព្រំដែនឡាវដែលមានហានិភ័យ ដូចជា Mukdahan, Amnat Charoen, Ubon Ratchathani និង Nakhon Phanom ត្រូវបានចាក់វ៉ាក់សាំងការពារជំងឺគ្រុនស្វិតដៃជើងឲ្យបានពេញលេញ។

សូមជម្រាបថា នេះជាករណីថ្មីលើកដំបូងគិតចាប់តាំងពីឆ្នាំ២០១៧ ដែលប្រទេសឡាវកើតមានជំងឺគ្រុនស្វិតដៃជើងជាថ្មីឡើងវិញ ខណៈការចាក់វ៉ាក់សាំងជំងឺនេះមានការថយចុះនៅក្នុងតំបន់មួយចំនួន៕

ដោយ៖ ឈាង