WHO ព្រមានថា XBB.1.5 ជាវីរុសកូវីដបំប្លែងខ្លួនក្លាយពូជ ឆ្លងខ្លាំងបំផុត មិនធ្លាប់ជួបសោះ (មានវីដេអូ)

អង្គការសុខភាពពិភពលោក (WHO) បានព្រមានថា វីរុសកូវីដប្រភេទថ្មី ដែលមានរហស្សនាមថា “The Kraken” គឺជាវីរុសបំប្លែងខ្លួនក្លាយពូជ ឆ្លងខ្លាំងបំផុតលើពិភពលោក ដែលមិនធ្លាប់ត្រូវបានគេជួបប្រទះសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីរុសបំប្លែងខ្លួនចុងក្រោយបំផុតនេះ ដែលក្លាយពូជពី អូមីក្រុង ហើយមានឈ្មោះជាផ្លូវការថា XBB.1.5 បានវាយប្រហាររួចទៅហើយក្នុងសហរដ្ឋអាមេរិក។ នៅទីនោះ គេគិតថា​ XBB.1.5 គឺនៅពីក្រោយការឆ្លងថ្មីប្រហែល៧០ភាគរយ នៅក្នុងតំបន់ដែលរងផលប៉ះពាល់ខ្លាំងបំផុត។

ឥឡូវនេះ វាបានចាប់ផ្តើមវាយលុកក្នុងចក្រភពអង់គ្លេស។ ប៉ុន្តែ XBB.1.5 ហាក់ដូចជាបណ្តាលឲ្យមានអាការ ស្រាលដូចអូមីក្រុងទម្រង់ដើមដែរ។

វេជ្ជបណ្ឌិត Maria Van Kerkhove អ្នកដឹកនាំបច្ចេកទេសរបស់ WHO ផ្នែកកូវីដ បានប្រាប់សន្និសីទសារព័ត៌មាននៅថ្ងៃព្រហស្បតិ៍ទី០៥ខែមករានេះថា “យើងមានការព្រួយបារម្ភអំពីការរីករាលដាលរបស់វា ជាពិសេសក្នុងប្រទេសមួយចំនួននៅអឺរ៉ុបនិងសហរដ្ឋអាមេរិក។ ក្តីបារម្ភរបស់យើងគឺថាតើវាឆ្លងបានខ្លាំងដល់កម្រិតណា”។

ស្ថិតិពីមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានបង្ហាញថា មេរោគនេះ គឺនៅពីក្រោយ ៤១ភាគរយនៃករណីឆ្លងនៅអាមេរិក។

ទន្ទឹមនឹងនេះដែរ នៅក្នុងចក្រភពអង់គ្លេស ទិន្នន័យពី GISAID និង CoVariants.org បង្ហាញថា XBB.1.5 ទទួលខុសត្រូវចំពោះករណីតិចជាង ៨ភាគរយប៉ុណ្ណោះ ក្នុងរយៈពេលពីរសប្តាហ៍គិតត្រឹមថ្ងៃទី០២ខែមករា។

XBB.1.5 ក៏​ត្រូវ​បាន​គេ​រក​ឃើញ​នៅ​ក្នុង​ប្រទេសមួយចំនួនទៀតផងដែរ ​រួម​មាន​​បារាំង អាល្លឺម៉ង់ ហូឡង់ អេស្ប៉ាញ អៀរឡង់ អូស្ត្រាលី សិង្ហបុរី និង​ឥណ្ឌា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកវិទ្យាសាស្រ្តព្រមានអំពី វីរុសកូវីដបំប្លែងខ្លួនប្រភេទថ្មី ដែលមានសមត្ថភាពសាហាវ