៤ យ៉ាង អ្នកហាត់ប្រាណមួយខែដំបូងគួររំពឹងទុក

មួយខែដំបូងនៃការហាត់ប្រាណគឺជាដំណាក់កាលពិបាក និងសំខាន់បំផុតសម្រាប់អ្នកទើបចាប់ផ្ដើម យោងទៅតាមអ្នកសរីរវិទ្យា Tom Holland បានឲ្យដឹងថាមនុស្សភាគច្រើនតែងបោះបង់ការតាំងចិត្តអំឡុងពេលនេះ ដូច្នេះមុនសម្រេចចិត្តហាត់អ្នកគួរដឹងពីចំណុចទាំំង ៤ យ៉ាងសិន ៖

១. ចាប់ផ្ដើមអស់កម្លាំងចិត្ត

ការសម្រុកទៅហាត់ប្រាណរាល់ថ្ងៃ និងចំណាយពេលយូរនាំឲ្យឆាប់ហត់ ឬបាក់ទឹកចិត្តក្នុងរយៈពេលខ្លី ។ លោក Holland ណែនាំថាអ្នកគួរចាប់ផ្ដើមសន្សឹមៗ ដោយហាត់មួយសប្ដាហ៍ ៣-៤ ដង ហើយមួយដងត្រឹម ២០-៣០ នាទីប៉ុណ្ណោះ ដោយឡែកការហាត់លើសកម្រិតអាចបណ្ដាលឲ្យរលាកសាច់ដុំបានយ៉ាងងាយ ។

២. ឈឺខ្លួន

លំហាត់ប្រាណធ្វើឲ្យមានដាច់រហែកមីក្រូសាច់ដុំដែលបង្កការឈឺចាប់នៅថ្ងៃបន្ទាប់ ប៉ុន្តែវាជារឿងធម្មតាទេហើយអ្នកនឹងស៊ាំក្រោយក្លាយជាទម្លាប់ពេញលេញ ។ ចំណែកវិធីសម្រួលសាច់ដុំវិញគឺការដើរតិចៗ ព្រោះវាជួយឲ្យឈាមហូរទៅសាច់ដុំដោយរលូន ។

៣. មិនទាន់ប្រែប្រួលរូបរាង

អ្នកហាត់ប្រាណប្រាកដជារំពឹងនូវរាងស្អាត និងសុខភាពល្អ ប៉ុន្តែខែដំបូងអ្នកមិនទាន់អាចសម្គាល់ភាពខុសគ្នានៅឡើយទេ យ៉ាងណាកុំបាក់ទឹកចិត្តឲ្យសោះត្រូវតែតស៊ូទៅមុខដើម្បីភាពជោគជ័យ ។

៤. ឃ្លានច្រើនខុសប្រក្រតី

រាងកាយកាន់តែបញ្ចេញថាមពលពោះកាន់តែឃ្លាន នេះជាបញ្ហាមិនគួរមើលរំលងសម្រាប់អ្នកចូលចិត្តហូបសិនចាំហាត់ប្រាណតាមក្រោយ ។ អ្នកជំនាញណែនាំថាយើងគួរបរិភោគអាហារពេលព្រឹកច្រើនហើយសម្បូរប្រូតេអ៊ីនទើបមិនសូវឃ្លាន ។

លោក Holland រំលឹកទៀតថា ការហាត់ប្រាណកែប្រែខ្លួនជារឿងពិបាក និងទាមទារការតស៊ូខ្ពស់ ដូច្នេះបើបោះបង់ចោលពាក់កណ្ដាលទីពិតជាគួរឲ្យស្ដាយណាស់ ៕

ប្រែសម្រួល ៖ វារី

ចុចអាន ៖ លំហាត់ប្រាណ ៣ ប្រភេទ អាចជួយឲ្យបេះដូងមានសុខភាពល្អ