សុខភាព

កុំទុកឲ្យមាត់ស្ងួត ប្រយ័ត្នប៉ះពាល់សុខភាពមាត់យូរអង្វែង

បានផុស

៣ years មុន

នៅ

ថ្ងៃសៅរ៍ ២០ ឧសភា ២០២៣

ដោយ

បញ្ហាស្ងួតមាត់ធ្វើឲ្យយើងពិបាកទ្រាំជាខ្លាំង មិនថាវាកើតឡើងត្រឹមតែមួយរយៈពេលខ្លី ឬយូរក៏ដោយ។ ជាក់ស្ដែង មានកត្តាជាច្រើនដែលបណ្ដាលឲ្យយើងស្ងួតមាត់ ដូចជាប្រភេទថ្នាំជាក់លាក់ ការឆ្លងមេរោគ កង្វះជាតិទឹក និងការព្យាបាលជំងឺមហារីកជាដើម។ ការព្យាបាលដោយកាំរស្មី និងគីមី ឬប្រភេទថ្នាំមួយចំនួន អាចធ្វើឲ្យខូចក្រពេញទឹកមាត់ ដែលធ្វើឲ្យយើងត្រូវជួបបញ្ហាស្ងួតមាត់ជាញឹកញាប់។

១. បញ្ហាស្ងួតមាត់ និងសុខភាពមាត់

នៅក្នុងករណី ដែលយើងខ្វះការព្យាបាលចំពោះបញ្ហាស្ងួតមាត់នេះ វាអាចបណ្ដាលឲ្យមានបញ្ហាផ្សេងៗជាច្រើន រួមទាំង៖

ធុំក្លិនមាត់ (ខ្យល់ដង្ហើមមិនល្អ)
រលាកប្រហោងឆ្អឹង
ការឆ្លងមេរោគផ្សិត
រលាកអញ្ចាញធ្មេញ
ទម្រង់ធ្មេញមិនត្រូវគ្នា

យូរៗទៅ យើងអាចនឹងមានការផ្លាស់ប្ដូររសជាតិ ពិបាកលេបទឹកមាត់ ព្រមទាំងអាចផ្លាស់ប្ដូរការនិយាយផងដែរ។ បន្ថែមពីនេះ យើងអាចសម្គាល់ឃើញស្នាមប្រេះ និងស្នាមមុតនៅគែមបបូរមាត់ ឬរលាកអណ្ដាត។ ស្ងួតមាត់អាចនឹងជាសះស្បើយដោយខ្លួនឯងនៅរយៈពេលមួយខែទៅពីរខែបន្ទាប់ពីការព្យាបាលដោយប្រើគីមី ប៉ុន្តែវាក៏អាចបន្តដល់រយៈពេល៦ខែ ទៅ១ឆ្នាំបន្ទាប់ពីការព្យាបាលដោយកាំរស្មីទៅលើក្បាល និងក។

២. តិចនិកកម្ចាត់បញ្ហាស្ងួតមាត់

មិនថាយើងស្ងួតមាត់ បណ្ដាលមកពីមូលហេតុណាមួយឡើយ យើងចាំបាច់ត្រូវរកវិធានការដោះស្រាយ ហើយវិធីសាស្ត្រខាងក្រោមនេះ គឺល្អបំផុតសម្រាប់បំបាត់អាការៈស្ងួតមាត់នេះ។

ញ៉ាំទឹកឲ្យច្រើន

ទឹកមានសារសំខាន់ណាស់ចំពោះសុខភាពយើងរាល់គ្នា ហើយពិសេស វាអាចជួយកម្ចាត់អាការៈស្ងួតមាត់បានយ៉ាងមានប្រសិទ្ធភាព។ ចូរបំពេញជាតិទឹកឲ្យបានគ្រប់គ្រាន់ ដោយការញ៉ាំទឹកយ៉ាងហោចណាស់ឲ្យបាន៨ ទៅ១២កែវក្នុងមួយថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទំពាស្ករកៅស៊ូ ឬជញ្ជក់ស្ករគ្រាប់

ជាទូទៅ ការទំពាស្ករកៅស៊ូ ឬជញ្ជក់ស្ករគ្រាប់ដែលពុំមានជាតិស្ករ អាចផ្ដល់ផលវិជ្ជមានដល់គ្នាយើងមួយចំនួន។។ ប៉ុន្តែ ចូរជៀសវាងការញ៉ាំស្ករដែលមានកាឡូរី និងកាបូអ៊ីដ្រាតលើសកម្រិត ពីព្រោះវាអាចប៉ះពាល់ដល់សុខភាពរបស់យើងធ្ងន់ធ្ងរនៅពេលក្រោយ។

ជៀសវាងការញ៉ាំគ្រឿងស្រវឹង កាហ្វេអ៊ីន និងទឹកផ្លែឈើដែលមានជាតិអាស៊ីដ

ពិតណាស់ នៅពេលដែលយើងស្ងួតមាត់ ការញ៉ាំកាហ្វេ ឬឡាតេ និងទឹកផ្លែឈើដែលផ្សំពីផ្លែក្រូច ក៏ដូចជាញ៉ាំស្រាក្រហមនៅពេលល្ងាច វានឹងធ្វើឲ្យបញ្ហាស្ងួតមាត់នេះកាន់តែអាក្រក់ទៅ។ ម្យ៉ាងវិញទៀត ចូរជ្រើសរើសយកតែផលិតផលប្រើប្រាស់ណា ដែលពុំមានជាតិអាកុល។

កុំជក់បារី

ការជក់បារីមិនត្រឹមតែប៉ះពាល់ដល់សុខភាពជាទូទៅប៉ុណ្ណោះទេ វាក៏អាចធ្វើឲ្យយើងកាន់តែស្ងួតមាត់លើសដើម។ ដូចនេះ ការឈប់ជក់បារី មានសារសំខាន់ខ្លាំងណាស់ចំពោះសុខភាពទាំងមូល ក៏ដូចជាបញ្ហាស្ងួតមាត់នេះផងដែរ។

ដុះធ្មេញបន្ទាប់ពីញ៉ាំអាហាររួច

គ្នាយើងអាចជ្រលក់ច្រាសដុះធ្មេញជាមួយនឹងទឹកក្ដៅឧណ្ហៗ ដើម្បីជៀសវាងការដាច់រលាត់អញ្ចាញធ្មេញ។ បន្ថែមពីនេះ ចូរដុះធ្មេញរាល់ពេលដែលយើងអាហាររួច និងនៅមុនពេលចូលគេង ក៏ដូចជាប្រើទឹកខ្ពុរមាត់ដែលមានជាតិFluoride ដើម្បីការពារការពុកធ្មេញ៕

អត្ថបទផ្ដល់ដោយ៖Hello Keupet

ចុចអាន៖ផ្លែឈើទាំង ៥ មុខអាចកាត់បន្ថយខ្លាញ់ក្បាលពោះយ៉ាងមានប្រសិទ្ធភាព