សុខភាព

អ្នកគួរធ្វើអ្វី ពេលពស់ចឹក?

បានផុស

៣ years មុន

នៅ

ថ្ងៃពុធ ១៧ កុម្ភៈ ២០២១

ដោយ

ពស់ចឹក នៅតែជាគ្រោះថ្នាក់មួយដែលគេជួបប្រទះជារឿយៗ ជាពិសេសនៅតំបន់ស្រែចម្ការខ្មែរយើងនិងជាពិសេសនៅពេលមានគ្រោះទឹកជំនន់ជនលិច។ ថ្វីបើដំបូងឡើយស្នាមខាំជារបួសតូចបន្តិចបន្តួច តែក្នុងករណីខ្លះវាអាចបណ្តាលជាជំងឺធ្ងន់ធ្ងរភ្លាមៗ និងអាចបណ្តាលឲ្យស្លាប់ផងក៏មាន។

ក) ប្រភេទពស់ពិស

ក្នុងចំណោមពស់ប្រមាណជិត ៦០ប្រភេទ ដែលគេស្គាល់ក្នុងប្រទេសកម្ពុជា ក្រុមអ្នកជំនាញខាងសត្វពស់បានសំគាល់ឃើញថា មានពស់ពិស១២ ប្រភេទ ជាមូលហេតុបង្កឲ្យមានគ្រោះថ្នាក់ដល់មនុស្ស។

ក្នុងនោះពស់៦ ប្រភេទដែលបង្កគ្រោះថ្នាក់ញឹកញាប់ដោយសារវារស់នៅជិតៗភូមិឋានយើងមានៈ

– ពស់វែកក្របី

– ពស់វែកដំបូក

– ពស់ហនុមាន

– ពស់ក្រាយឬថ្នាំងអំពៅសខ្មៅ

– ពស់បៃតង ២ប្រភេទទៀត

មាន ៥ ប្រភេទទៀតវាច្រើនរស់នៅក្នុងព្រៃឆ្ងាយពីភូមិៈ

– ពស់វែករនៀម

– ពស់ពព្លាក់

– ពស់ស្រកាចាស

– ពស់ក្រាយ លឿងខ្មៅ

– ពស់ក្រាយក្បាលក្រហម

ពស់ទី១២ គឺពស់សមុទ្រ ដែលអាចបង្កគ្រោះថ្នាក់ដល់អ្នកនេសាទសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ) រោគសញ្ញា និងការព្យាបាល

ជាការពិត ថ្នាំបន្សាបពិសពស់ មានប្រសិទ្ធភាពតែក្នុងករណីមានពិសពស់ចូលក្នុងខ្លួនមនុស្ស ហើយពិសនោះនៅមានសកម្មភាព។ មានសញ្ញា ឬ អាការៈមួយចំនួន ដែលគ្រូពេទ្យតាមដានស្វែងរក ហើយវត្តមានរបស់វាតម្រូវឲ្យប្រើថ្នាំបន្សាបពិសភ្លាម ទោះដឹងថាវាអាចមានប្រតិកម្មកើតឡើងក្តី។

សញ្ញាទាំងនោះមានដូចជា៖

– ស្រវាំងភ្នែក ងងឹតមុខ ធ្លាក់ត្របកភ្នែកដូចងងុយដេក

– រឹងមុខមាត់ពិបាកនិយាយស្តី

– ទន់ក ក្អួតចង្អោរ

– មានអាការៈស្ហុក (ខ្សោយ ត្រជាក់ចុងដៃ ជើង ស្លេកស្លាំង ជីពចរញាប់ )

– បែកញើសត្រជាក់ និងចេញទឹកមាត់នៅដំណាក់កាលដំបូងនៃប្រតិកម្មរបស់ពិស

– ជើងដៃចេះតែកន្ត្រាក់តិចៗ

– ពិបាកដកដង្ហើមជាសញ្ញាចុងក្រោយ ដែលត្រូវព្យាបាលជាបន្ទាន់។

សញ្ញាផ្សេងទៀតដែលត្រូវប្រើថ្នាំជាបន្ទាន់ដែរមាន៖

– កន្លែងដែលពស់ខាំ រាលដាល (ឡើងហើម ក្រហម ) លឿន

– មានចេញពងទឹកដូចរលាកភ្លើង

– មានចេញស្នាមជាំលើខ្លួន

– ដំបៅហូរឈាមមិនឈប់

– ឡេះឡះ រវើរវាយ សន្លឹមងងុយដេក

– គ្មានទឹកនោម ជាដើម ។

សញ្ញាខាងលើនេះសុទ្ធតែជាសញ្ញានៃអាការៈ ដែលធ្ងន់ធ្ងរអាចគ្រោះថ្នាក់ដល់ជីវិត ក៏ប៉ុន្តែថ្នាំបន្សាបពិសប្រើទាន់ពេលវេលាអាចជួយជីវិតបាន។ ចំណុចមួយទៀតដែលជួយជីវិត គឺវិធីដែលអាចពន្យារពេលកុំឲ្យពិសចូលទៅក្នុងប្រព័ន្ធឈាមរត់លឿនពេក ក្នុងគោលបំណងនេះ ក្រោយត្រូវពស់ខាំភ្លាម គប្បីទប់អបអវយវៈ ដែលរងការខាំនោះឲ្យនៅហ្នឹង កុំឲ្យសាច់ដុំកន្ត្រាក់ខ្លាំង។

ឧទាហរណ៍៖ ប្រសិនបើជើងត្រូវពស់ខាំ ការខំប្រឹងរត់ឬដើរនឹងនាំឲ្យពិសកាន់តែឆាប់ចូលដល់ប្រព័ន្ធឈាមរត់ នឹងឆាប់ចេញរោគសញ្ញានៃពិស។ ក្នុងករណីនេះគេគប្បីរកអ្នកជួយគ្រាឬសែងទៅរកកន្លែងសង្គ្រោះឬមន្ទីរពេទ្យ។

សំគាល់៖ វិធីមួយចំនួន ដែលធ្លាប់អនុវត្តពីមុនមកភាគច្រើនឲ្យគុណវិបត្តិជាងឲ្យផលប្រយោជន៍ដូចជាៈ

– ការចងរឹតពីខាងលើរបួសៈ ភាគច្រើនវាអាចបណ្តាលឲ្យផ្នែកខាងក្រោមចំណងខ្វះឈាមទៅចិញ្ចឹមនិងត្រូវស្លាប់កោសិកាសាច់ដុំ ដែលជារឿយៗតម្រូវឲ្យកាត់ចោលដើម្បីសង្គ្រោះជីវិត។

– ការវះបើកមុខកន្លែងស្នាមខាំក្នុងបំណងឲ្យពិសហូរចេញវិញ ជួនកាលបណ្តាលឲ្យហូរឈាមមិនឈប់និងបាត់បង់ឈាមជាច្រើន រហូតដល់សភាពស្ហុក។

– ការបឺតជញ្ជក់កន្លែងខាំក៏មិនអាចបឺតយកពិសចេញបានដែរ។

– កន្លែងមានរបួសជាទីដែលប្រព័ន្ធការពារលើស្បែកយើង ត្រូវមានចន្លោះប្រហោងអាចឲ្យមេរោគផ្សេងៗចូលបានយ៉ាងងាយ ដូចនេះការដាក់បំពោកនូវវត្ថុផ្សេងៗ ឬថ្នាំដែលមិនស្អាតអាចបន្ថែមមេរោគនឹងធ្វើឲ្យដំបៅក្លាយ។

គ) ចំណុចគួរចងចាំ និងអនុវត្ត

– ថ្នាំប្រឆាំងពិសពស់ជាឱសថដ៏សំខាន់ តែវាអាចបណ្តាលឲ្យមានគ្រោះថ្នាក់ធ្ងន់ធ្ងរបានដែរ។

– ថ្នាំពិសពស់មានផលប្រយោជន៍ និងប្រសិទ្ធភាពតែកាលណាមានពិសពស់ក្នុងខ្លួនជនរងគ្រោះ ជាពិសេសក្នុងរបត់ឈាម។

– គ្រប់ករណីពស់ចឹកឬសង្ស័យថា ពស់ចឹកមិនសុទ្ធតែចាំបាច់ត្រូវចាក់ថ្នាំបន្សាបពិសទេ។

– បើមានពស់ខាំ មុនមកដល់មន្ទីរពេទ្យ គប្បីទប់អបអវយវៈ ដែលរងរបួសនោះកុំឲ្យវាមានចលនាខ្លាំង។

– មិនត្រូវចងរឹតតឹងពីខាងលើ ឬ វះបង្ហូរឈាម ឬ បឺតឈាមទេ ព្រោះវានាំឲ្យខាតពេលនិងអាចមានគ្រោះថ្នាក់។

– ប្រសិនបើប្រាកដជាពស់ខាំ ត្រូវប្រញាប់មកមន្ទីរពេទ្យ ដែលមាន ហើយអាចប្រើថ្នាំបន្សាបពិសដោយសុវត្ថិភាពបាន។

– ក្នុងករណីមានសញ្ញាពិសក្នុងខ្លួនជនរងគ្រោះ ក្រុមគ្រូពេទ្យនឹងវិនិច្ឆ័យប្រភេទក្រុមពស់ ដែលបង្កហេតុ ដើម្បីត្រូវប្រើថ្នាំបន្សាបឲ្យត្រូវនឹងក្រុមពស់។ ក្រោយកំណត់បានហើយក្រុមគ្រូពេទ្យនៃមន្ទីរពេទ្យកាល់ម៉ែត នឹងរៀបចំត្រៀមមធ្យោបាយសម្រាប់ព្យាបាលករណីមានប្រតិកម្មជាយថាហេតុ និងប្រើប្រាស់ថ្នាំបន្សាបពិស ដោយចាក់តាមសរសៃវ៉ែនផ្ទាល់ឬលាយជាមួយសេរ៉ូម។ ជួនកាលគ្រូពេទ្យត្រូវប្រើប្រាស់មធ្យោបាយផ្សេងៗទៀត ដូចជាម៉ាស៊ីនដកដង្ហើម អុកស៊ីហ្សែន ថ្នាំជំនួយបេះដូង ឬការប្រើផលិតផលឈាម ឬការបង្គ្រប់ជាតិទឹក ជាដើមរួមផ្សំជាមួយ រហូតដល់ថ្នាំព្យាបាលពិសមានប្រសិទ្ធភាព និងដើម្បីជួយជីវិតបាន៕

អត្ថបទ៖ រស្មី

សូមចុចអាន៖ វិធីសាស្ដ្រព្យាបាលការបាក់កឆ្អឹងភ្លៅ និងការយល់ដឹងពីការគំរាមកំហែង