កម្ពុជា រកឃើញជំងឺអឹមផក ឬ ជំងឺអុតស្វា ករណីទី១២ នៅភ្នំពេញ

នៅរសៀលថ្ងៃទី១៥ ខែកុម្ភៈ ឆ្នាំ២០២៤ នេះ ក្រសួងសុខាភិបាល បានចេញ សេចក្តីប្រកាសព័ត៌មាន ស្តីពី ការរកឃើញជំងឺអ៊ឹមផក (Mpox) (ឈ្មោះដើម ជំងឺអុតស្វា) ករណីទី១២ ដោយយោងតាមលទ្ធផល ទទួលបានពី វិទ្យាស្ថានជាតិសុខភាពសាធារណៈ នៅថ្ងៃទី១៣ ខែកុម្ភៈ ឆ្នាំ២០២៤ បានបញ្ជាក់ថា មានករណី ជំងឺអឹមផក (Mpox) ចំនួន ១ ករណីបន្ថែមទៀត លើបុរសម្នាក់ដែលមានទីលំនៅ នៅខណ្ឌមានជ័យ រាជធានី ភ្នំពេញ និងបានដាក់ឱ្យព្យាបាលនៅមន្ទីរពេទ្យត្រឹមត្រូវ។ ដូច្នេះជំងឺអឹមផកដែលបានរកឃើញសរុបមានចំនួន ១២ករណី។

ក្រសួងសុខាភិបាល បញ្ជាក់ថា និន្នាការនៃការចម្លងជំងឺអឹមផក នៅព្រះរាជាណាចក្រកម្ពុជា មានការកើនឡើង ស្របគ្នានិងនិន្នាការនៅលើសកលលោក។ យោងតាមការផ្សព្វផ្សាយរបស់អង្គការសុខភាព ពិភពលោក នៅថ្ងៃទី២៥ ខែមករា ឆ្នាំ២០២៤ ជំងឺអឹមផក បាន និងកំពុងផ្ទុះរាលដាលក្នុងប្រទេសចំនួន ១១៧ ដែលក្នុងនោះមានករណីឆ្លងជំងឺអឹមផក សរុបចំនួន ៩៣ ០៣០នាក់ និងករណីស្លាប់ចំនួន ១៧៦ នាក់ នៅលើពិភពលោក។

ដោយសង្កេតឃើញករណីជំងឺអឹមផក ត្រូវបានរកឃើញជាបន្តបន្ទាប់នៅ ព្រះរាជាណាចក្រកម្ពុជា នាពេលថ្មីៗនេះ ក្រសួងសុខាភិបាល នឹងជូនបច្ចុប្បន្នភាពអំពីស្ថានភាពជំងឺអឹមផក រៀងរាល់សប្តាហ៍ ឬតាមស្ថានភាពតម្រូវ។ សូមបងប្អូនប្រជាពលរដ្ឋទាំងអស់គ្នា យកចិត្តទុកដាក់ប្រុង ប្រយ័ត្នថែរក្សាសុខភាពផ្ទាល់ខ្លួន និងក្រុមគ្រួសារ ដើម្បីបង្ការនូវការរីករាលដាលជំងឺអឹមផកជាចង្កោម ឬទ្រង់ទ្រាយធំជាយថាហេតុ ដោយចូលរួមស្វែងយល់នូវរបៀបចម្លង និងត្រូវអនុវត្តនូវវិធានការបង្ការយ៉ាង ម៉ឹងម៉ាត់។

ព័ត៌មានពិស្ដារ៖