កម្ពុជា ទៅដកស្រង់បទពិសោធន៍​ពីអូស្ត្រាលី ដើម្បីបង្កេីត​មន្ទីរពិសោធន៍កម្រិត៣

លោកស្រីវេជ្ជបណ្ឌិត យក់​ សម្បត្តិ​ រដ្ឋលេខាធិការក្រសួងសុខាភិ​បាល បានដឹកនាំគណៈប្រតិភូ ទៅទស្សនៈកិច្ចសិក្សា​ នៅទីក្រុងម៉ែលប៊ន​ និងទីក្រុងស៊ីដនី ប្រទេសអូស្ត្រាលី​ ចាប់ពីថ្ងៃទី១​ ដល់ថ្ងៃទី៧ ​ខែមេសា ឆ្នាំ២០២៤​ ដកស្រង់បទពិសោធន៍​ពីការបង្កេីត​ដំណេីរការ​ និងគ្រប់គ្រងមន្ទីរពិសោធន៍កម្រិត៣ ដេីម្បីអភិវឌ្ឍមន្ទីរពិសោធន៍កម្រិត៣ ​នៅកម្ពុជា។

គណៈប្រតិភូមានការចូលរួមរបស់​ លោកស្រី Ha Nguyen ប្រធានក្រុមដឹកនាំរបស់​ធនាគារពិភពលោក ​(Task Team Leader of World Bank) លោកស្រី​ លី​ ណារ៉េត​ អ្នកគ្រប់គ្រងផ្នែកសុខភាព​ នៃធនាគារពិភពលោក​ ​វេជ្ជបណ្ឌិត​ ស៊ុង វិនតៈ រដ្ឋលេខាធិការ​ក្រសួងសុខាភិបាល វេជ្ជបណ្ឌិត​ ហុក​ គឹមចេង​ អគ្គនាយកបច្ចេកទេស​សុខាភិបាល​ និងមន្រ្តីជំនាញ​ពីវិទ្យាស្ថានជាតិសុខភាពសាធារណៈ​ ចំនួន ៤រូប​ តំណាង​ក្រសួងសេដ្ឋកិច្ច និងហិរញ្ញវត្ថុ​ ផងដែរ ព្រមទាំង លោកស្រី​ Karen Johnson ទីប្រឹក្សា​ ធនាគារពិភពលោក​ (laboratory expert)​ និងជាអ្នកសម្របសម្រួលដំណេីទស្សនកិច្ចនេះ។

ជាលទ្ធផល​ គណៈប្រតិភូបានរៀនសូត្រដកស្រង់បទពិសោធន៍​ពីការបង្កេីត​ដំណេីរការ​ និងគ្រប់គ្រងមន្ទីរពិសោធន៍កម្រិត៣ ដេីម្បីអភិវឌ្ឍមន្ទីរពិសោធន៍កម្រិត៣ ​នៅកម្ពុជា​ ដែលជាមន្ទីរពិសោធន៍ស្តង់ដារ​អន្តរជាតិ​ និងការទទួលស្កាល់ដោយអន្តរជាតិ​ ដេីម្បីត្រៀមលក្ខណៈឆ្លេីយតបបន្ទាន់ក្នុងករណីមានការរាតត្បាតជំងឺឆ្លងជាសកលដែលអាចកេីតឡេីងជាយថាហេតុនាពេលអនាគត។

ក្នុងរយៈពេលមួយអាទិត្យ នៃទស្សនកិច្ចសិក្សា​ គណៈប្រតិភូ​ បានទៅសិក្សាឈ្វេងយល់នៅមន្ទីរពិសោធន៍ Doherty នៃសាកលវិទ្យាល័យម៉ែលប៊ន​ និង​Bernet​ នៃសាកលវិទ្យាល័យ​ Monarsh នៃទីក្រុងម៉ែលប៊ន​ ព្រមទាំងមន្ទីរពិសោធន៍នៃមន្ទីរពេទ្យ​ Westmead​ មន្ទីរពិសោធន៍​ Centanery នៃសាកលវិទ្យាល័យ​ Western Sydney​ និង​មន្ទីរពិសោធន៍​ Kirby​ នែសាកលវិទ្យាល័យ​ New South Wale នៃទីក្រុងស៊ីដនី។

នៅតាមទីតាំងនីមួយៗ​ ដែលគណៈប្រតិភូបានទៅទស្សនកិច្ច​ គឺបានសិក្សាឈ្វេងយល់អំពីការរៀបចំ​បង្កេីត ដំណេីរការ​ ការគ្រប់គ្រង​ និងការថែទាំជួសជុល​មន្ទីរពិសោធន៍កម្រិត៣​ (Biosafety Laboratory Level 3-BSL3) រួមទាំងហេដ្ឋារចនាសម្ព័ន្ធរូបវ័ន្ត​ ច្បាប់​ គោលនយោបាយ​ និងគោលការណ៍ណែនាំប្រតិបត្តិ​ និងធនធានមនុស្ស។ លេីសពីនេះយ គណៈប្រតិភូបានឈ្វេងយល់ពី បញ្ហាប្រឈមដែលអាចកេីតមានឡេីង​ ដេីម្បីយកមកអនុវត្តបង្កេីតមន្ទីរពិសោធន៍កម្រិត៣​ ដែលក្រសួងសុខាភិបាលកំពុងរៀបចំនៅវិទ្យាស្ថានសុខភាពសាធារណៈ ដោយបច្ចុប្បន្ននេះ​ ក្រសួងមានមន្ទីរពិសោធន៍កម្រិត២​ កំពុងដំណេីរការ។ ការពង្រីកសមត្ថភាពមន្ទីរពិសោធន៍​ ពី​កម្រិត២ ទៅកម្រិត៣​ សម្រាប់ត្រៀមឆ្លេីយ​តប​ទប់ស្កាត់ការរាតត្បាតជាសាកលដែលអាចកេីតឡេីងជាយថាហេតុ​ នាពេលអនាគត​ និងដេីម្បីសម្រេចឱ្យបានជ្រុងមួយ​ ស្តីពីការលេីកកម្ពស់សុខុមាលភាពរបស់ប្រជាពលរដ្ឋ​ នៃយុទ្ធសាស្ត្របញ្ចកោណ​ ដំណាក់កាលទី១​ ក្រោមការដឹកនាំដ៏ប៉ិនប្រសប់​ និងរស់រវេីក​របស់​ សម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្រ្តី នៃព្រះរាជាណាចក្រកម្ពុជា៕