ក្រសួងសុខាភិបាល ត្រួតពិនិត្យការអនុវត្តការងារលើកកម្ពស់គុណភាព និងសមធម៌សុខាភិបាល

វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ បានដឹកនាំកិច្ចប្រជុំ ស្តីពី ការពិនិត្យវឌ្ឍនភាព និងលទ្ធផលសកម្មភាព នៃការអនុវត្តការងារក្នុងគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2) នាថ្ងៃទី១ ខែកក្កដា ឆ្នាំ២០២៤។

ការប្រជុំនេះ រៀបចំឡើង ដោយទទួលការអនុញ្ញាតពី សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។ គោលបំណង នៃកិច្ចប្រជុំបានផ្តោតទៅលើ៖

១. បង្ហាញអំពីវឌ្ឍនភាព និងបញ្ហាប្រឈម មានក្នុងសកម្មភាពដែលបានឯកភាព (Agreed Action)

២. ពិភាក្សាអំពី លទ្ធផលសកម្មភាពដែលបានរាយការណ៍តាមផ្នែកនីមួយៗរួមមាន៖ ផ្នែកបច្ចេកទេស ផ្នែកហិរញ្ញវត្ថុ និងផ្នែកលទ្ធកម្ម នៃគម្រោង H-EQIP 2

៣. ពិនិត្យ និងពិភាក្សារកដំណោះស្រាយ ដើម្បីជម្រុញការងារឱ្យបានរលូន

៤. ការកំណត់ផែនការដែលត្រូវអនុវត្តបន្ត

កិច្ចប្រជុំនេះ ក៏មានការអញ្ជើញចូលរួមពី អគ្គនាយកបច្ចេកទេសសុខាភិបាល អគ្គនាយករដ្ឋបាល និងហិរញ្ញវត្ថុ តំណាងទីភ្នាក់ងារជាតិបញ្ជាក់ចំណាយ តំណាងធនាគារពិភពលោក និងលោក លោកស្រី ជាក្រុមការងារអនុវត្ត នៃគម្រោង៕