យល់ដឹង! ប្រើអាល់កុលខុសបច្ចេកទេសអាចបង្កើនហានិភ័យដល់ស្បែក

ស្របពេលដែលវីរុសកូវីដ-១៩ ហាក់មិនថមថយនូវការរីករាលដាល គ្រប់គ្នាត្រូវតែមានការប្រុងប្រយ័ត្ន ព្រមទាំងរក្សាអនាម័យខ្ពស់ជានិច្ច។

ការរក្សាអនាម័យត្រូវបានក្រសួងសុខាភិបាលណែនាំឱ្យសម្អាតដៃជាប្រចាំជាមួយសាប៊ូនិងទឹក ជែល ឬអាល់កុល។ល។ ក្នុងនោះអាល់កុល ជាទំនិញពេញនិយមដែលមនុស្សនាំគ្នាប្រញាយទិញទុកលាងដៃ ដើម្បីសម្លាប់មេរោគ។

ទោះយ៉ាងណា ប្រជាពលរដ្ឋមួយចំនួនមិនទាន់ចេះពីរបៀបលាងសម្អាតដៃដោយប្រើអាល់កុលដូចនៅតាមមន្ទីពេទ្យនៅឡើយ។ តាមពិត អាល់កុលនៅក្នុងកម្រិត ៩៧-៩៩% មិនអាចការពារបានទាំងស្រុងនោះទេ ព្រោះវាឆាប់ស្ងួត ដែលនាំឱ្យប្រសិទ្ធភាពនៃការសម្លាប់វីរុសមានកម្រិតទៅតាមនោះ។

អ្នកជំនាញផ្នែកវេជ្ជសាស្ត្រមួយចំនួនព្រមានថា ការលាងសម្អាតដៃដោយប្រើជាតិអាល់កុលច្រើនពេក និងខុសបច្ចេកទេស អាចបង្កើនហានិភ័យនៃការខូចស្បែកធ្ងន់ធ្ងរ។

អ្នកជំនាញបញ្ជាក់ថា ប្រសិនលាងដៃជាមួយអាល់កុលច្រើនជ្រុល នឹងបណ្ដាលឱ្យស្បែកស្ងួត ក៏ដូចជាខូចអាចក្លាយជាពពួកបាក់តេរីនៃជំងឺ ហើយក៏បង្កើនហានិភ័យនៃវីរុសចូលក្នុងខ្លួនតាមរយៈស្បែកខូចបាន។

ការប្រើអាល់កុលក្នុងកម្រិតលើសលុប នាំឱ្យស្បែកដៃឆាប់ស្ងួតប្រះ គ្មានសំណើម ហើយអាចនឹងប្រតិកម្មក៏មាន។ ​ជាពិសេសអាល់កុល ដាក់លក់តាមទីផ្សារដែលគ្មានម៉ាកសញ្ញាត្រឹមត្រូវ អាចជារបស់ក្លែងក្លាយ ដែលនាំឱ្យកម្រិតគ្រោះថ្នាក់កើនកាន់តែខ្ពស់ថែមទៀត។

ដូច្នេះ ការលាងសម្អាតដៃជាមួយសាប៊ូនិងទឹក ជាជម្រើសល្អបំផុត សម្រាប់សុខភាពផ្ទាល់ខ្លួនក៏ដូចជាក្រុមគ្រួសារទាំងមូល។ រីឯការលាងដៃជាមួយអាល់កុលគួរតែជាជម្រើសបន្ទាប់ ពេលចេញក្រៅផ្ទះ ឬធ្វើដំណើរជាដើម ដើម្បីបង្ការការខូចស្បែក៕

ប្រែសម្រួល៖ សន្យា

ប្រភព៖ UNICEF

ចុចអាន៖ ជិះឡានជាមួយអ្នកផ្ទុកកូវីដ តែមិនបានប៉ះពាល់ ឬនិយាយគ្នា អាចឆ្លងអត់?

ចុចអាន៖ អ្វី​ខ្លះ​អ្នក​បើកបរ និង​អ្នក​ដំណើរ​លើ​រថយន្ត​សាធារណៈ​ ​គួរ​អនុវត្ត​ការពារ​កូវីដ