KPT+

បើបានទៅលេងនៅប្រទេសកូរ៉េខាងត្បូង រឿង ១០ យ៉ាងនេះហាមធ្វើដាច់ខាត

បានផុស

៦ years មុន

នៅ

ថ្ងៃអង្គារ ២៤ វិច្ឆិកា ២០២០

ដោយ

ប្រទេសនីមួយៗលើសកលលោកសុទ្ធតែមានទំនៀមទម្លាប់ និងការប្រកាន់ជំនឿផ្សេងៗគ្នាទៅតាមតំបន់។ រឿងខ្លះអាចធ្វើបាននៅក្នុងស្រុកយើង តែមិនអាចអនុវត្តនៅក្នុងប្រទេសគេបានទេ។ ហេតុនេះ ប្រសិនបើអ្នកបានទៅលេង ឬសិក្សា ឬធ្វើការនៅប្រទេសកូរ៉េខាងត្បូងលើកដំបូង មានតំណមមួយចំនួន អ្នកត្រូវចៀសវាង កុំធ្វើឲ្យសោះ៖

១. កុំសម្ដែងភាពមិនពេញចិត្តទៅលើការកែសម្រស់

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅប្រទេសកូរ៉េខាងត្បូង ការវះកាត់កែសម្រស់ ជារឿងពេញនិយមបំផុត។ ប្រសិនបើនៅតាមផ្លូវអ្នកអាចប្រទះឃើញថា ស្ត្រីជនជាតិកូរ៉េដែលមើលទៅបានធ្វើការកែកុនចំណុចខ្លះ អ្នកមិនគួរធ្វើការទស្សន៍ទាយឮៗ ឬនិយាយពិភាក្សាគ្នាជាមួយមិត្តពីការកែកុនទាំងនោះឡើយ។ ការតាមមើលដាច់កន្ទុយភ្នែកឬលួចសំលឹងក៏ត្រូវបានហាមដូចគ្នា ព្រោះជារឿងអសីលធម៌។

២. កុំនិយាយខ្លាំងៗពេក

ប្រសិនបើអ្នកស្ថិតនៅក្នុងឡានក្រុង រថភ្លើង ឬកន្លែងតូចចង្អៀតតែមានមនុស្សច្រើន វាមើលទៅមិន សមរម្យនោះទេ ដែលអ្នកនិយាយដោយប្រើសំឡេងឮពេក ទោះជាអ្នកនិយាយភាសាកំណើតរបស់ខ្លួន។ ម្យ៉ាងទៀតទោះបីអ្នកមានអារម្មណ៍បែបណាក៏ដោយ សូមកុំបញ្ចេញវាខ្លាំងពេក ខណៈកំពុងស្ថិតនៅទីសាធារណៈ ព្រោះជីវិតពិតនៅក្នុងប្រទេសនេះ មិនដូចនៅក្នុងរឿងដែលអ្នកបានមើលនោះទេ

៣. កុំអង្គុយផ្ដេសផ្ដាស

រាល់ពេលដែលត្រូវជិះឡានក្រុង ឬរថភ្លើង អ្នកត្រូវមើលឲ្យបានច្បាស់ ព្រោះគ្រប់កន្លែងអង្គុយទាំងអស់មិនមែនសុទ្ធតែអាចអង្គុយបាននោះទេ។ ជាក់ស្ដែងចំពោះកៅអីខ្លះ គឺទុកសម្រាប់ជន ពិការ ស្ត្រីមានផ្ទៃពោះ ឬមនុស្សចាស់ជរាដោយមានដាក់សញ្ញាបញ្ជាក់ត្រឹមត្រូវ។ ហេតុនេះប្រសិនបើមិនច្បាស់ពីរឿងនេះទេ អ្នកអាចសួរជនជាតិដើមដែលនៅទីនោះជាមួយអ្នកបន្ថែមកាន់តែល្អ។

៤. កុំនិយាយដល់ប្រទេសជប៉ុនច្រើនពេក

ប្រទេសកូរ៉េខាងត្បូង និង ជប៉ុន ធ្លាប់មានប្រវត្តិមិនល្អជាមួយគ្នា កាលពីសង្គ្រាមលោកលើកទី២។ ហេតុនេះដើម្បីចៀសវាងនូវបញ្ហាផ្សេងៗ អ្នកមិនគួរលើកយកប្រធានបទទាក់ទងនឹងប្រទេសជប៉ុន មកនិយាយច្រើនពេកនោះទេ នៅពេលដែលកំពុងស្ថិតនៅក្នុងប្រទេសកូរ៉េខាងត្បូង។

៥. កុំស្លៀកពាក់បញ្ចេញសាច់ពេក

អ្នកមិនគួរស្លៀកពាក់បញ្ចេញសាច់ពេកនៅប្រទេសកូរ៉េខាងត្បូងនោះឡើយ ជាពិសេសបញ្ចេញស្មា បង្ហាញខ្នង ឬអាវវាលបញ្ចេញដើមទ្រូង។ វាមិនមែនជារឿងលេងសើចនោះទេ ព្រោះមានអ្នកដំណើរជាច្រើនដែលស្លៀកពាក់មិនសមរម្យ ត្រូវបានស្ដីបន្ទោសដោយស្ត្រីដែលជាជនជាតិកូរ៉េផងដែរ។

៦. កុំលាបាតដៃឡើងលើនៅពេលចង្អុលនរណាម្នាក់

ជនជាតិកូរ៉េមួយចំនួនធំមិនពេញចិត្តនឹងកាយវិការលាបាតដៃឡើងពេលចង្អុលនរណាម្នាក់ទេ ព្រោះថា កាយវិការនេះ ជាកាយវិការទុកប្រើនៅពេលដែលហៅសត្វឆ្កែ។ ហេតុនេះ ប្រសិនបើចង់ហៅនរណាម្នាក់ឲ្យមកជិតខ្លួន អ្នកត្រូវផ្កាប់បាតដៃចុះក្រោម ហើយអាចប្រើកាយវិការបែបនេះដើម្បីតាក់ស៊ីជិះដូចគ្នា។

៧. កុំប្រើប៊ិចក្រហម

អ្នកគួរចៀសវាងការប្រើប៊ិចក្រហម ជាពិសេសនៅពេលដែលចង់សរសេរឈ្មោះនរណាម្នាក់។កាលពីអតីតកាល ប្រជាជនកូរ៉េបានប្រើប៊ិចក្រហមដើម្បីសរសេរឈ្មោះសមាជិកគ្រួសាររបស់អ្នកស្លាប់ នៅក្នុងពិធីបុណ្យសព និងសម្រាប់ចុះសៀវភៅគ្រួសារ។ ជាការល្អគួរប្រើតែប៊ិកខៀវ ឬប៊ិកពណ៌ខ្មៅបានហើយ។

៨. កុំពាក់ស្បែកចូលផ្ទះ

មុននឹងចូលភោជនីយដ្ឋាន ឬផ្ទះរបស់នរណាម្នាក់ ត្រូវសង្កេតថា មានស្បែកជើងដាក់នៅខាងក្រៅដែរទេ? បើសិនជាមាន អ្នកត្រូវតែដោះស្បែកជើងទុកនៅខាងក្រៅ ហើយបើតាមជំនឿរបស់ប្រជាជនកូរ៉េ អ្នកដែលត្រូវចូលក្នុងផ្ទះកុំព្យាយាមឈរនៅមាត់ទ្វាយូរពេក ព្រោះគេមានជំនឿថា ការនៅមាត់ទ្វានោះយូរនឹងមានព្រលឹងបិសាចចូលខ្លួន។

៩. កុំដាក់ចង្កឹះដោតឡើងលើ

ប្រទេសនៅក្នុងអាស៊ី ក៏ដូចជាកូរ៉េ ភាគច្រើនប្រកាន់ទម្លាប់នេះដូចគ្នា។ អ្នកមិនគួរប្រើចង្កឹះដោតទៅចានបាយនោះឡើយ ព្រោះវាប្រៀបដូចជាធូបដែលគេដោតនៅក្នុងពិធីបុណ្យសពដូច្នោះឯង។ ប្រសិនបើអ្នកមិនចង់ឲ្យអ្នកដទៃនឹកឃើញដល់ពិធីបុណ្យនៅពេលកំពុងញ៉ាំអាហារទេ សូមកុំធ្វើបែបនេះឲ្យសោះ។

១០. កុំបដិសេធភេសជ្ជៈពីអ្នកវ័យចាស់ជាង

ការគោរពចំពោះចាស់ៗ ជាផ្នែកសំខាន់មួយនៃវប្បធម៌របស់កូរ៉េ។ ដូច្នេះប្រសិនបើចាស់ៗជូនភេសជ្ជៈឬស្រា អ្នកត្រូវទទួលយក ទោះបីជាមិនចេះផឹកក៏ដោយ។ ប៉ុន្តែក្រោយពីទទួល អ្នកអាចផឹកទឹកជំនួសស្រា តែមិនត្រូវបដិសេធកាយវិការនេះទេ៕

ប្រែសម្រួល៖ សន្យា

ប្រភព៖ koreaboo

ចុចអាន៖ជីវិតកម្សត់មុនជោគជ័យនៃកំពូលតារាទូរទស្សន៍ ELLEN DEGENERE

ចុចអាន៖ពីក្រោយជោគជ័យ នៃក្រុមហ៊ុន nike

Related Topics:ប្រទេសកូរ៉េខាងត្បូង