​រ៉ូបអាពាហ៍ពិពាហ៍ទាំង ៩ ល្បីល្បាញខ្លាំងជាងគេ និងបានចារឹកក្នុងទំព័រប្រវត្តិសាស្ត្រ

បន្ទាប់ពីអាពាហ៍ពិពាហ៍កូនប្រុសច្បង David  Beckham បានបញ្ចប់ទៅថ្មីៗកន្លងទៅ ទស្សនិកជននៅតែបន្តជជែកគ្នាអំពីមង្គលការនេះមិនទាន់ឈប់នៅឡើយ។ ពួកគេស្ញប់ស្ញែងនូវភាពប្រណីតនៃពិធីមិនថាការតុបតែង ភោជនីយអាហារ និងសម្លៀកបំពាក់របស់កូនកំលោះ  ឬកូនក្រមុំឡើយ គ្រប់យ៉ាងសុទ្ធតែថ្លៃៗ និងចំណាយខ្ពស់បំផុត។

យ៉ាងណាមិញ ​ពេលនិយាយដល់សម្លៀកបំពាក់អាពាហ៍ពិពាហ៍ ទស្សនិកជនស្រាប់តែនឹកដល់រ៉ូបល្បីៗចំនួន ៩ ដែលបានគ្រងដោយបុគ្គលជួរមុខលំដាប់ពិភពលោកកាលពីមុន។ រ៉ូបទាំងនោះត្រូវបានគ្រងដោយកូនក្រមុំទាំងខ្សែរាជវង្ស តារាហូលីវូដ តារាសម្ដែង តារាចម្រៀង និងតារាបង្ហាញម៉ូដជាដើម។ មិនតែប៉ុណ្ណោះ វាត្រូវបានគេចារជាប្រវត្តិសាស្ត្រ ដែលមានមនុស្សលើកមកនិយាយច្រើនជាងគេផងដែរ។

ព្រះនាង Diana

រ៉ូប​អាពាហ៍ពិពាហ៍​ដែល​គេ​និយាយ​ច្រើន​បំផុត​ក្នុង​ប្រវត្តិសាស្ត្រ​គ្មាន​​អ្នក​ណា​ផ្សេង​ក្រៅ​ពី​ព្រះនាង Diana នៃ​ប្រទេសវែល (Wales) ឡើយ។ ក្នុងថ្ងៃរៀបអភិសេកជាមួយព្រះអង្គម្ចាស់ Charles កាលពីឆ្នាំ ១៩៨១ ព្រះនាងដាយអាណាបានគ្រងរ៉ូបដ៏អស្ចារ្យដែលតុបតែងយ៉ាងប្រណីត សុទ្ធតែប៉ាក់ដោយដៃផ្ទាល់ជាមួយនឹងគុជចំនួន ១ម៉ឺនគ្រាប់ ។ រ៉ូបនេះមានសម្រុងរហូតដល់ ២៥ហ្វីត ដែលជាប្រវែងវែងបំផុតក្នុងប្រវត្តិសាស្ត្រ និងមានតម្លៃ ១៥១,០០០ផោន (ជិត ២០ម៉ឺនដុល្លារ)។

តារាបង្ហាញម៉ូដ Victoria Beckham

Victoria Adams បានរៀបការជាមួយកីឡាករបាល់ទាត់ David Beckham នៅប្រទេសអៀរឡង់ក្នុងឆ្នាំ ១៩៩៩ ដោយនាងបានស្លៀករ៉ូបយ៉ាងសាមញ្ញបំផុត។ ​ដោយសាររ៉ូបនេះវាសាមញ្ញពេក ទើបគេល្បីខ្លាំងក្នុងប្រវត្តិសាស្ត្រ ព្រោះថាកូនកំលោះ និងកូនក្រមុំ សុទ្ធតែជាកំពូលតារា ប៉ុន្តែពួកគេជ្រើសរើសស្លៀកពាក់ធម្មតាៗទៅវិញ។

តារាចម្រៀង​ Beyoncé

កាលពីឆ្នាំ ២០០៨ តារាចម្រៀង និងអ្នកនិពន្ធបទចម្រៀងលំដាប់ពិភពលោក Beyoncé បានរៀបការជាមួយលោក Jay-Z ក្នុងសម្លៀកបំពាក់អាពាហ៍ពិពាហ៍ដែលមិនមែនជាម៉ាកប្រណីតអ្វីនោះទេ។ ផ្ទុយ​ទៅ​វិញ វា​ជា​រ៉ូប​អាពាហ៍ពិពាហ៍​ដែល​ត្រូវ​បាន​រចនា និង​កាត់ដេរ​ដោយ​ម្ដាយ​របស់​នាងគឺអ្នកស្រី Tina Knowles។

អ្នកម្នាង Kate Middleton

កាលពីខែមេសា ឆ្នាំ២០១១ ផ្ទុះការចាប់អារម្មណ៍ជាខ្លាំងទៅលើពិធីមង្គលការរបស់នាង Kate Middleton ដែលក្រោយមកនាងបានក្លាយជាអ្នកម្នាងនៃចក្រភពអង់គ្លេស។ រ៉ូបអាពាហ៍ពិពាហ៍របស់អ្នកម្នាងអង្គនេះ មានភាពឆើតឆាយ ដែលជាសម្លៀកបំពាក់កាត់ដេរពិសេសពីម៉ាក Alexander McQueen ត្រូវបានរៀបចំថ្វាយតែកូនក្រមុំខ្សែរាជវង្សប៉ុណ្ណោះ។

តារាបង្ហាញម៉ូដ Kate Moss

កំពូល​តារា​ម៉ូដែល Kate Moss បាន​រៀប​ការ​ជាមួយ​នឹង​តារា​សម្ដែង​ជួរ​មុខលោក The Kills Jamie Hince ក្នុង​ឆ្នាំ២០១១។ កាលណោះនាងស្លៀក​រ៉ូប​ពណ៌​ភ្លុក ជាមួយ​ការ​ប៉ាក់​ដ៏​ប្រណីត​ពីអ្នកច្នៃម៉ូដល្បីលោក John Galliano។ វាជារ៉ូបដែល​ត្រូវ​បាន​គេ​និយាយ​ច្រើន​ជាង​គេ ​ក្នុង​ឆ្នាំ​នោះ​ផង​ដែរ។

តារាបង្ហាញម៉ូដ Kim Kardashian

ក្នុងឆ្នាំ ២០១៤ នាង Kim Kardashian បានចូលរោងការជាមួយតារារ៉េប Kanye West ដោយនាងស្លៀករ៉ូបអាពាហ៍ពិពាហ៍ដៃវែង ជាមួយនឹងចរជើងសំពត់ដ៏ប្រណីត។ ​រ៉ូបនេះជា​​ម៉ាកយីហោ​របស់ Givenchy Haute Couture ដែល​រចនា​ដោយលោក Riccardo Tisci។

តារាហូលីវូដ Angelina Jolie

មង្គលការដ៏ល្បីលើពិភពលោករបស់កំពូលតារាស្រី Angelina Jolie និង Brad Pitt នៅក្នុងឆ្នាំ ២០១៤ គឺជាពិធីមង្គលការដ៏ធំបំផុតប្រចាំឆ្នាំដែលទាក់ទាញភ្នែកមនុស្សរាប់លាននាក់ឱ្យតាមដានមិនដាច់។ ពេលនោះកូនក្រមុំ Angelina Jolie បានស្លៀករ៉ូបក្រណាត់សូត្រពណ៌ស របស់ប្រេន Versace។ អ្វីដែលគេចាប់អារម្មណ៍ខ្លាំងពីរ៉ូបនេះ គឺដោយសារវាជាស្នាដៃរបស់កូនក្រមុំផ្ទាល់ ដែលជាអ្នកចេញម៉ូដរ៉ូប។

តារាសម្ដែង Meghan Markle

Meghan Markle បានរៀបអភិសេកជាមួយព្រះអង្គម្ចាស់ Harry ក្នុងឆ្នាំ ២០១៨ ដែលនេះជាលើកទីមួយសម្រាប់គ្រួសាររាជវង្សអង់គ្លេសដែលបានផ្សាយពិធីផ្ទាល់ទៅកាន់ពិភពលោក។ នេះ​ជា​ពិធី​មង្គលការ​ដ៏​ធំ​មួយ​ទៀត​ដែល​ត្រូវ​បាន​មហាជនតាមមើល​គ្រប់​ជំហាន។ ដោយឡែកចំពោះ Meghan Markle នាងបានស្លៀករ៉ូបអាពាហ៍ពិពាហ៍យ៉ាងសាមញ្ញ គ្មានម៉ូដឆើតឆាយអ្វីទេ ដែលវាជាប្រេនរបស់ Givenchy ។

តារាបង្ហាញម៉ូដ Hailey Bieber

Hailey Bieber រៀបមង្គលការជាមួយកំពូលតារា Justin Birber ក្នុងឈុតសម្លៀកបំពាក់ដែលមានការតុបតែងលម្អគុជ និងប៉ាក់ដ៏ប្រណីតជាមួយនឹងនិមិត្តសញ្ញារបស់ក្រុមហ៊ុន Off-White។ បើនិយាយពីតម្លៃ វាថ្លៃខ្លាំងណាស់ណាទេ ​ប៉ុន្តែរ៉ូបនេះទទួលបានចំណាប់អារម្មណ៍ច្រើន ព្រោះវានៅលើស្បៃគ្របមុខមានប៉ាក់អក្សរថា “TILL DEATH DO US PART” (យើងជាចំណែកនៃគ្នា រហូតដល់យើងស្លាប់) ៕

ប្រែសម្រួល៖ សន្យា

ចុចអាន៖ មានតែមួយគ្មានពីរ! រ៉ូប​ប្រណីតបំផុតរបស់បុត្រីស្ដេច ប្រ៊ុយណេ គ្រងក្នុងពិធីអភិសេកថ្ងៃមុន

ចុចអាន៖ ជឿឬមិនជឿ រ៉ូបថ្លៃបំផុតលើលោកមានតម្លៃ ៣០លានដុល្លារ?