របៀបសន្សំប្រាក់ឱ្យសល់សម្រាប់អ្នកដែលមានចំណូលទាប

ចំណូលតិចតែចំណាយច្រើន វាមិនមែនជារឿងដែលល្អនោះទេ។ អ្នកមានជម្រើសពីរ នៅក្នុងការទប់ទល់នឹង​ហានិភ័យលើផ្នែកហិរញ្ញវត្ថុ។ ទី១ ត្រូវបង្កើនចំណូលរបស់អ្នកឱ្យកាន់តែច្រើនជាលំដាប់ និងទី២ គឺកាត់បន្ថយការ​ចំណាយ និងសន្សំឱ្យបានច្រើន។ ជម្រើសទី១ គឺពិបាកបន្តិច ដែលត្រូវការពេលវេលាច្រើន ប្រសិនបើអ្នកចង់​សល់ប្រាក់ភ្លាមៗ គួរជ្រើសរើសជម្រើសទី២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខាងក្រោមនេះ គឺជាបច្ចេកទេសមួយចំនួន ដែលជួយឱ្យអ្នកសល់ប្រាក់ បើទោះជាអ្នកមានប្រាក់ខែ ឬចំណូលតិច​ក៏ដោយ៖

១. ទិញឬជួលផ្ទះដែលអ្នកចំណាយប្រហែល ៣៥ភាគរយ នៃប្រាក់ចំណូលប្រចាំខែ

ជម្រក គឺសម្រាប់រស់នៅប្រកបដោយសុខុមាលភាព។ សម្រាប់អ្នកដែលមិនមានផ្ទះខ្លួនឯង គួរស្វែងរកផ្ទះជួល​ណាដែលមានតម្លៃទាបសមរម្យ ឬដែលមានតម្លៃមិនលើសពី ៣៥ភាគរយ នៃប្រាក់ខែប្រចាំខែ។ សម្រាប់អ្នក​ដែលមានផ្ទះខ្លួនឯង អ្នកគួរតែកាត់បន្ថយការចំណាយលើការប្រើប្រាស់ទឹក ភ្លើង និងគ្រឿងអេឡិចត្រូនិចផ្សេងៗ ដែលមិនចាំបាច់ ឬការងារដែលអាចធ្វើខ្លួនឯងបាន។

២. មិនគួរបង្កើតបំណុលច្រើន

សម្រាប់អ្នកដែលមានប្រាក់ខែតិច មិនគួរប្រើប្រាស់របស់របរទំនើបៗហួសពេក ដែលត្រូវចំណាយការថែទាំច្រើន។ អ្នកគួរតែកាត់បន្ថយលើការបង់សេវាប្រចាំសប្តាហ៍ ឬប្រចាំខែ ទៅលើកម្មវិធីមួយចំនួន ដូចជា ចម្រៀង និងខ្សែភាព​យន្តជាដើម ហើយមិនគួរទៅខ្ចីប្រាក់គេយកមកចាយវាយ ដោយមិនបង្កើតចំណូល។

៣. កាត់បន្ថយដើរកម្សាន្តទៅកន្លែងដែលថ្លៃៗ

មួយសប្តាហ៍ធ្លាប់តែទៅដើរលេងម្តង គួរបន្ថយមកត្រឹម២សប្តាហ៍ ឬមួយខែម្តងវិញ ដើម្បីអាចឱ្យអ្នកសល់ប្រាក់ខ្លះ។ ការចូលហាងអាហារថ្លៃៗ ក៏គួរតែកាត់បន្ថយ។ កាត់បន្ថយការទៅមើលកុន ឬទៅកន្លែងណាដែលត្រូវចំណាយច្រើន។

៤. ទិញតែរបស់ណាដែលចាំបាច់ប៉ុណ្ណោះ

របស់ចាំបាច់មានដូចជា ម្ហូបអាហារ ថ្នាំសង្កូវ សម្លៀកបំពាក់ ជាដើម។ អ្នកមិនគួរប្រើប្រាក់របស់អ្នក ទិញរបស់របរ​ណាដែលអ្នកគ្រាន់តែចង់បាននោះ និងកាត់បន្ថយការទិញសម្ភារៈ ឬអាហារដែលអ្នកចូល​ចិត្តេលមានតម្លៃថ្លៃៗ​នោះចេញខ្លះ។

៥. ដាក់ឱ្យមានការសន្សំស្វ័យប្រវត្តិ

អ្នកគួរតែយកប្រាក់ទៅតម្កល់ទុកនៅក្នុងធនាគារ ជាជាងយកមកទុកនៅនឹងខ្លួន។ ប្រសិនបើអ្នកដាក់ក្នុងធនាគារនោះ ហានិភ័យនៃការបាត់បង់ និងចាយវាយរបស់អ្នកនឹងត្រវកាត់បន្ថយ។​ ម្យ៉ាង អ្នកអាចចំណេញការប្រាក់បន្ថែមទៀតផង។ អ្នកគួរតែបង្កើតគណនីសន្សំមួយផ្សេងទៀត ដើម្បីកាត់យកប្រាក់របស់លោកអ្នករៀងរាល់ ១០ភាគរយ នៃប្រាក់ខែរបស់​អ្នកទុកដោយស្វ័យប្រវត្តិ។

ចំណុចសំខាន់ៗខាងលើនេះ មានប្រសិទ្ធភាពបំផុត ក្នុងការសន្សំប្រាក់ ដើម្បីសល់សម្រាប់វិនិយោគ នាថ្ងៃអនាគត៕